ރައްޔިތުންގެ މަޖިލީހުގެ އިންތިހާބީ ދާއިރާތަކުގެ ވަގުތީ ރިޕޯޓަށް ޝަކުވާ ހުށަހަޅަން ހުޅުވާލި ފުރުސަތުގައި އެ ރިޕޯޓަށް ހުށަހެޅި ހުރިހާ ޝަކުވާތަކެއް ބަލައި ނިންމާފައިވާ ކަމަށާއި އެ ޝަކުވާ ތަކަށް މިއަދު ޖަވާބު ދޭނެ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
އީސީގެ ނައިބު ރައީސް އިސްމާއީލް ހަބީބް އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ މިހާރު ކުރަމުން ގެންދަނީ ދާއިރާތަކުގެ ފައިނަލް ރިޕޯޓު އާންމު ކުރުމަށް ކުރަންޖެހޭ ޗާޓުތަކުގެ މަސައްކަތް ކަމަށެވެ.
އީސީން ކުރިން ބުނެފައިވާ ގޮތުގައި ރައްޔިތުންގެ މަޖިލީހުގެ އިންތިހާބީ ދާއިރާތަކުގެ ވަގުތީ ރިޕޯޓަށް ޝަކުވާ ހުށަހަޅަން ހުޅުވާލި ފުރުސަތުގައި އެ ރިޕޯޓަށް 65 ޝަކުވާއެއް ލިބުނެވެ. އެެ ކޮމިޝަނުން އޭރު ބުނީ ނޮވެމްބަރު 5، ގެ ކުރިން އެ ޝަކުވާތަކާ މެދު ކޮމިޝަނުން ގޮތެއް ކަނޑައަޅާނެ ކަމަށެވެ. އަދި ކަނޑައަޅާ ގޮތުގެ ޖަވާބު ޝަކުވާ ހުށަހެޅި ފަރާތްތަކަށް ވެސް ފޮނުވާނެ ކަމަށް ވެސް ބުންޏެވެ.
ކޮމިޝަނުން އޭރު އާއްމުކުރި ތަފާސްހިސާބުގައިވާ ގޮތުން 65 ޝަކުވާގެ ތެރެއިން 44 ޝަކުވާއަކީ އައްޑޫ ސިޓީ ފޭދޫ އުތުރު ދާއިރާއަށް ހުށަހަޅާފައިވާ ޝަކުވާ އެވެ. އައްޑޫގެ އެހެން ބައެއް ދާއިރާތަކަށް ހަ ޝަކުވާއެއް ލިބިފައިވެ އެވެ. އޭގެ ތެރޭގައި ފޭދޫ ދެކުނު ދާއިރާއަށް ހުށަހަޅާފައިވާ ޝަކުވާއެއް ވެސް ހިމެނެ އެވެ.
މީގެ ކުރިން ރައްޔިތުންގެ މަޖިލީހުގައި އޮންނަނީ އައްޑޫ ފޭދޫ ދާއިރާ އެވެ. ފޭދޫގެ އާބާދީ އިތުރުވުމާ ވެސް އެކު، ކޮމިޝަނުން ގެނައި ބަދަލަކީ އެ ރަށުގެ ކަނީރު މަގުން އުތުރަށް އޮންނަ ސަރަހައްދުގެ ބަޔަކާއި ރަށާ އެއް ފަސްގަނޑަކަށް އޮތް ނަމަވެސް ވަކި ރަށެއް ގޮތަށް ބަލަމުން އަންނަ މަރަދޫފޭދޫއަކީ ފޭދޫ އުތުރު ދާއިރާގެ ގޮތުގައި ކަނޑައެޅުމަށެވެ. ރަށުގެ ބާކީ ސަރަހައްދަކީ ފޭދޫ ދެކުނު ދާއިރާ ކަމަށް ވެސް ވަނީ ކަނޑައަޅައިފަ އެވެ.
އައްޑޫ ސިޓީގެ ދާއިރާތަކަށް ބޮޑު ބަދަލެއް އިލެކްޝަނުން ގެނައީ، މީގެ ކުރިން އައްޑޫ ސިޓީގެ ގުޅިފައިވާ ރަށްތަކާ ވަކިން އޮންނަ މީދޫގެ ދާއިރާގައި މަރަދޫފޭދޫ ހިމެނޭތީ އެ ރަށުގެ ގިނަ މީހުންގެ ކަންބޮޑުވުންތަކެއް ވެސް އެ ކަމުގައި އޮއްވަ އެވެ.
