ވޯލްޑް ޓްރެވެލް އެވޯޑްސް (ޑަބްލިއުޓީއޭ) ގެ އެންމެ ޝަރަފުވެރި އެވޯޑު، "ވޯލްޑްސް ލީޑިން ޑެސްޓިނޭޝަން" ގެ އެވޯޑަށް ޖެހިޖެހިގެން ހަތަރު ވަނަ ފަހަރަށް ދިވެހިރާއްޖެ ނޮމިނޭޓުވެއްޖެ އެވެ.
ވޯލްޑު ޓުރެވެލް އެވޯޑުތަކަކީ 1993 އިން ފެށިގެން ދުނިޔޭގެ ދަތުރުފަތުރުގެ ސިނާއަތުގައި އެންމެ ޝަރަފުވެރި އަދި އެންމެ ފާހަގަކޮށްލެވޭ އެވޯޑުތަކުގެ ގޮތުގައި މަޝްހޫރުވެފައިވާ އެވޯޑެވެ. އޭގެ ތެރޭގައި ސަރަހައްދީ، އަދި ދުނިޔޭގެ ފެންވަރުގެ ކެޓެގަރީތަކަށް ހާއްސަ އެވޯޑުތައް ހިމެނެ އެވެ.
ފާއިތުވި ތިން އަހަރު ވެސް ވޯލްޑްސް ލީޑިން ޑެސްޓިނޭޝަންގެ އެވޯޑު ކާމިޔާބުކޮށް އެ އެވޯޑު މިލްކުކޮށްފައި ވަނީ ރާއްޖެއިންނެވެ. ޑަބްލިއުޓީއޭގެ އެވޯޑުތަކަކީ އާންމުކޮށް ހުޅުވާލައިގެން ވޯޓު ލުމުގެ ފުރުސަތު އެންމެނަށް ދީގެން ހޮވާ އެވޯޑުތަކެކެވެ. އެގޮތުން، މިއަހަރުގެ އެވޯޑަށް ވެސް ވޯޓުލުމުގެ ފުރުސަތު މިހާރު ވަނީ ހުޅުވާލާފަ އެވެ. އެ އެވޯޑު މިފަހަރު ރާއްޖެއަށް ލިބިއްޖެ ނަމަ، އެއީ ރާއްޖޭގެ ފަތުރުވެރިކަމަށް ލިބޭ ވަރަށް ބޮޑު ކުރިއެރުމަކަށް ވާނެ އެވެ.
އެވޯޑުތަކަށް ވޯޓުލުން މިމަހުގެ 17 ވަނަ ދުވަހާ ހަމައަށް ހުޅުވާލާފައިވާއިރު އޮންލައިންކޮށް އެ އެވޯޑުތަކަށް ވޯޓު ލެވޭނެ އެވެ.
ޑަބްލިއުޓީއޭއިން ދޭ އެންމެ ޝަރަފުވެރި އެވޯޑުގެ އިތުރުން ހަތް އެވޯޑަކަށް ދިވެހިރާއްޖެ ވަނީ ނޮމިނޭޓު ވެފަ އެވެ. އެއީ؛
- ވޯލްޑްސް ލީޑިން ބީޗް ޑެސްޓިނޭޝަން 2023
- ވޯލްޑްސް ލީޑިން ޑައިވް ޑެސްޓިނޭޝަން 2023
- ވޯލްޑްސް ލީޑިން ހަނީމޫން ޑެސްޓިނޭޝަން 2023
- ވޯލްޑްސް ލީޑިން އައިލެންޑު ޑެސްޓިނޭޝަން 2023
- ވޯލްޑްސް މޯސްޓު ރޮމޭންޓިކް ޑެސްޓިނޭޝަން 2023
- ވޯލްޑްސް ލީޑިން ޓޫރިސްޓު ބޯޑު 2023
އޭގެ އިތުރުން އިންޑިއަން އޯޝަން އެވޯޑު ކެޓެގަރީން ހަ އެވޯޑަކަށް ދިވެހިރާއްޖެ ނޮމިނޭޓުވެފައިވެ އެވެ.
ދިވެހިރާއްޖެއިން މި އަހަރު ވޯލްޑް ލީޑިން ޑެސްޓިނޭޝަނުގެ މަގާމު ދިފާއުކޮށްފި ނަމަ ރާއްޖެއަކީ އެ މަގާމު ހަތަރު ފަހަރު ހޯދި ދެ ވަނަ ގައުމަށް ވާނެ އެވެ. ވޯލްޑް ލީޑިން ޑެސްޓިނޭޝަނުގެ މަގާމު އެންމެ ގިނައިން ހޯދޑފައި ވަނީ ޔޫއޭއީ އިންނެވެ. ޔޫއޭއީއިން އެ އެވޯޑު ހަ ފަހަރު ހޯދާފައިވެ އެވެ.
