ރާއްޖޭގެ ކުޅިވަރަށް ހުނަރުވެރި އެތައް ކުޅުންތެރިންނެއް ނެރެދިން މަންމައެއް ކަމަށްވާ ހެންވޭރު ކޮޔާ، ސަލީމާ މުހައްމަދުފުޅު (ބަތްސަލީމާ) އުމުރުން 76 އަހަރުގައި ނިޔާވެއްޖެ އެވެ.
ސަލީމާ ދުނިޔެ ދޫކުރީ ވަރަށް ގިނަ ދުވަހު ބަލިވެ އުޅުމަށް ފަހު އެވެ. އޭނާ އަށް ހޮސްޕިޓަލުގައި ވެސް ތިން މަހެއްހާ ދުވަހު ފަރުވާ ދިނެވެ. އޭނާގެ ޖަނާޒާ ރޭގެ ފަތިސް ނަމާދަށް ފަހު ހުޅުމާލޭ ސަހަރާގައި ވަނީ ބާއްވައިފަ އެވެ.
ސަލީމާ އަކީ އޭނާގެ ޒުވާން ދުވަސްވަރު، މުޖުރާ ލަވައަށް ނެށުމުގައި ރާއްޖޭގެ އެންމެ ކުޅަދާނަ އެކެކެވެ. ގަނޑުވަރުތެރެއިން ތައާރަފުވި މުޖުރާ ލަވައަށް ނެށުމަކީ، ވަކި ބަނޑިތަކެއް ލައްވައިގެން، ލަސް ހަރަކާތްތަކެއް ބޭނުންކޮށްގެން ނަށާ ނެށުމެކެވެ. އެއީ މީގެ ތިރީހަކަށް އަހަރު ކުރިއާ ހަމައަށް ވެސް މާލޭގައި ޓިކެޓް ވިއްކައިގެން މުޖުރާ ލަވައަށް ނެށުމުގެ ޝޯތައް ބޭއްވި އެވެ.
ސަލީމާގެ ކުދިންގެ ތެރެއިން ކުޅިވަރުގައި ފާހަގަކުރެވެނީ އާއިޝަތު ނާޒިމާ އާއި އަލީ ޝަމީމް (ކޮޔަރޭ) އާއި އަހުމަދު ޝަމީމް (އާންސީ) އަދި އިބްރާހީމް ޝަމީމް (އިއްބެ) އެވެ.
ނާޒިމާ ބާސްކެޓްބޯޅަ ކުޅެނީ.
އޭގެ ތެރެއިން ނާޒިމާ އަކީ ރާއްޖެ ދުށް އެންމެ ހުނަރުވެރި އެއް އަންހެން ކުޅިވަރު ކުޅުންތެރިޔާ އެވެ. ސްކޫލް ދައުރުގައި ބާރު ދުވުންތެރިއެއްގެ ގޮތުގައި ފާހަގަކުރެވުނު ނާޒިމާ ވަނީ ގައުމީ ފެންވަރުގައި ވޮލީބޯޅަ އާއި ބާސްކެޓްބޯޅަ އާއި ނެޓްބޯޅަ ކުޅެ ބޮޑެތި ކާމިޔާބީތަކެއް ހޯދައިފަ އެވެ. އޭނާ ވަނީ ބައިނަލްއަގްވާމީ ފެންވަރުގައި ވޮލީބޯޅަ އާއި ނެޓްބޯޅަ ވެސް ކުޅެފަ އެވެ.
ކުޅިވަރު ކުޅުމުގެ ރޮނގުން ދިވެހި ސަރުކާރުން ގައުމީ އިނާމު ދީފައިވާ ނާޒިމާ ވަނީ 'ހަވީރު' އިން ހޮވާ އަހަރުގެ އެންމެ މޮޅު އަންހެން ކުޅުންތެރިޔާގެ މަގާމު ތިން ފަހަރު ހޯދައިފަ އެވެ.
ނާޒިމާ ބުނީ އޭނާ އާއި އެއްބަނޑުއެއްބަފާ އެހެން ކުދިން ކުޅިވަރުގައި ހޯދި ކާމިޔާބީގެ ފަހަތުގައި ހުރީ މަންމަ ކަމަށާއި، އެކަމުގެ ހުރިހާ ޝުކުރެއް ވެސް ހައްގުވަނީ މަންމަ އަށް ކަމަށެވެ.
"ނާޒިގެ ފަހަތުން ހުރިހާ ކަމެއްގައި އުޅޭނެ. އެއްވެސް ކަމެއް ވައްޓާނުލާނެ،" މިހާރު ކޯޗެއްގެ ގޮތުގައި މަސައްކަތްކުރާ ނާޒިމާ އެވެ.
"އަހަރެންގެ ހުވަފެންތައް ހަގީގަތަކަށް ހަދަން އަހަރެން ކުރި ވަރަށް ބުރެ ބުރަ މަސައްކަތް މަންމަ ކުރި."
އަލީ ޝަމީމް ވެޓްރަންސް މުބާރާތުގައި ނިއު އަށް ކުޅެނީ.
ނާޒިމާގެ ބޭބެ އަލީ ޝަމީމަކީ ނިއު ރޭޑިއަންޓަށް ފުޓްބޯޅަ ކުޅެ އެ ޓީމާ އެކު ނުވަދިހައިގެ ތެރޭގައި އެތައް ތަށްޓެއް ހާސިލްކުރި ކުޅުންތެރިއެކެވެ. ފަހުން ނިއުގެ އެސިސްޓަންޓް ކޯޗުކަމާއި މެނޭޖަރުކަން ވެސް ކުރި އެވެ. އެގޮތުން ނިއު އިން 2005 ގެ އޭއެފްސީ ކަޕުގައި ތާރީގީ ކާމިޔާބު ހޯދިއިރު އެ ޓީމު އެކުލަވާލުމުގައި އަލީ ޝަމީމް އިސް ދައުރެއް އަދާކުރެ އެވެ.
ރާއްޖެ އާއި ރާއްޖޭން ބޭރުގެ ވެޓްރަންސް މުބާރާތްތަކުގައި މިހާރު ވެސް މޮޅަށް ކުޅޭ އަލީ ޝަމީމް އަންނަނީ ރާއްޖޭގެ އެންމެ ބޮޑު ކިޑްސް ފުޓްބޯލް ފިއެސްޓާ އިންތިޒާމުކުރުމުގައި ވެސް އިސް ދައުރެއް އަދާކުރަމުންނެވެ.
އާންސީ (މ) އާއި ނާޒިމާ (ވ) ވެޓްރަންސް ކަޕް ފެށުމުގެ ރަސްމިއްޔާތުގައި އެފްއޭއެމްގެ ރައީސް ބައްސާމްއާ އެކު.
އޭނާގެ ބޭބެ އަހުމަދު ޝަމީމް (އާންސީ) އަކީ ވެސް ނިއުގެ ކުރީގެ ތަރިއެކެވެ. ފަހުން ވެޓްރަންސް މުބާރާތުގައި ވެސް ނިއު އަށް އޭނާ ކުޅުނެވެ. އެގޭ އިބްރާހީމް ޝަމީމަކީ ބާރަށް ހިނގުމުން ރާއްޖޭގެ އެއް ވަނަ އެވެ. އެ ކުޅިވަރުގައި އިބްރާހީމް ޝަމީމް ހެދި ގައުމީ ރެކޯޑް ދާދި ފަހުން ސްޕޯޓްސް މިނިސްޓްރީން ވަނީ ބަލައިގަނެ އޭނާ އަށް އެކަމުގެ ލިޔުން ދީފަ އެވެ.
ސަލީމާގެ ދަނބިދަރިއެއް ކަމަށްވާ، ނާޒިމާގެ ފިރިމީހާ މުހައްމަދު ނިޒާމް (ނިޒާމްބެ) އަކީ ރާއްޖޭގެ އެންމެ މޮޅު އެއް ފުޓްބޯޅަ ކޯޗެވެ. އޭނާ އަކީ ކުރީގެ މަޝްހޫރު ކުޅުންތެރިއެއް ވެސް މެ އެވެ.
ސަލީމާގެ ފިރިމީހާ އަކީ ސިފައިންގެ ތެރޭގައި ކުރިން މަސައްކަތްކުރި ރޯނުގޭ ތުއްތު ދީދީ އެވެ. އޭނާ ވަނީ މީގެ އަހަރުތަކެއް ކުރިން ނިޔާވެފަ އެވެ.
