އަންނަ އަހަރު ބޭއްވުމަށް ހަމަޖެހިފައިވާ މަޖިލިސް އިންތިހާބުގައި އިންތިހާބީ ދާއިރާތަކަށް އާބާދީ ކަނޑައާޅާފައިވާ ގޮތުގެ ފައިނަލް ރިޕޯޓު މިމަހު އާންމު ކުރާނެ ކަމަށް އިލެކްޝަންސް ކޮމިޝަނުގެ ނައިބު ރައީސް، އިސްމާއިލް ހަބީބް ވިދާޅުވެއްޖެ އެވެ.
އެކްސްގައި މިއަދު ކުރެއްވި ޕޯސްޓެއްގައި ހަބީބު ވިދާޅުވީ 20 ވަނަ މަޖިލީހުގެ އިންތިހާބީ ދާއިރާތަކަށް އާބާދީ ކަނޑައަޅާފައިވާ ގޮތުގެ ވަގުތީ ރިޕޯޓަށް ލިބިފައިވާ ޝަކުވާތައް އިލެކްޝަންސް ކޮމިޝަނުން ދިރާސާާ ކުރަމުންދާ ކަމަށެވެ.
"ލިބިފައިވާ ޝަކުވާ/ޚިޔާލުތައް އިލެކްޝަންސް ކޮމިޝަނުން ދަނީ ދިރާސާ ކުރަމުން. ދިރާސާކޮށް ނިމުމުން، ޝަކުވާ/ޚިޔާލު ހުށަހެޅި ފަރާތްތަކަށް އީސީ އިން ވަރަށް އަވަހަށް ޖަވާބު ދޭނެ. އަދި ދާއިރާތަކުގެ ފައިނަލް ރިޕޯޓު ނޮވެމްބަރު މަހުގެ ތެރޭގައި އާންމު ކުރުމަށް އީސީން ދަނީ މަސައްކަތް ކުރަމުން،" ހަބީބު ލިޔުއްވާފައިވެ އެވެ.
ވިހި ވަނަ މަޖިލީހުގެ އިންތިހާބީ ދާއިރާތަކުގެ ވަގުތީ ރިޕޯޓަށް ޝަކުވާ ހުށަހަޅަން ހުޅުވާލި ފުރުސަތުގައި 65 ޝަކުވާ ހުށަޅާފައިވެ އެވެ. އެންމެ ގިނައިން ޝަކުވާ ހުށަހަޅާފައި ވަނީ ދާއިރާ ކަނޑައެޅުމުގައި އެންމެ ބޮޑު ބަދަލެއް ގެނެސްފައިވާ އައްޑޫސިޓީ ފޭދޫ އިތުރު ދާއިރާއިންނެވެ. އެ ދާއިރާއިން އެކަނި 44 ޝަކުވާ ހުށަހެޅިއިރު، އައްޑޫގެ އެހެން ދާއިރާތަކުން ހަ ޝަކުވާއެއް ހުށަހަޅާފައިވެ އެވެ.
ކުރިއަށް އޮތް މަޖިލީހުގެ އިންތިހާބީ ދާއިރާތަކުގެ ގޮތުގައި އިލެކްޝަނުން ވަނީ 93 ދާއިރާ ހިމަނައިފަ އެވެ. މި ހިނގާ ދައުރުގައި މަޖިލީހުގައި ތިއްބަވަނީ 87 މެންބަރުންނެވެ.
އައްޑޫ ސިޓީ ފޭދޫގެ އިތުރުން ދެން އެންމެ ބޮޑު ބަދަލެއް އައިސްފައިވަނީ ހުޅުމާލެއަށެވެ. ކުރިން ހުޅުމާލެ އެންމެ ދާއިރާއެއް އޮތް ނަމަވެސް މި ފަހަރު ތިން ދާއިރާ ހިމެނެ އެވެ. އެއީ ހުޅުމާލެ އުތުރު ދާއިރާ، ހުޅުމާލެ މެދު ދާއިރާ، އަދި ހުޅުމާލެ ދެކުނު ދާއިރާ އެވެ.
އޭގެ އިތުރުން، ބ. އަތޮޅުގައި ހިތާދޫ ދާއިރާއެއް ވަނީ އިތުރުކޮށްފަ އެވެ. އެ ދާއިރާގައި ހިމެނެނީ ހިތާދޫގެ އިތުރުން އެ އަތޮޅު މާޅޮހާއި ދަރަވަންދޫ އެވެ. މީގެ ތެރެއިން މާޅޮހާއި ހިތާދޫއަކީ އޭދަފުށި ދާއިރާ އެވެ. ދަރަވަންދޫއަކީ ކެންދޫ ދާއިރާގެ ރަށެކެވެ.
ގއ. އަތޮޅުގައި ވެސް ދާއިރާއެއް އިތުރުކޮށްފައިވެ އެވެ. އެއީ ކުރިން ވިލިނގިލި ދާއިރާގައި ހިމެނޭ ކޮލަމާފުއްޓާއި ގެމަނަފުށި ދާއިރާގައި ހިމެނޭ ދެއްވަދޫ ހިމަނައިގެން ކޮލަމާފުށި ދާއިރާގެ ނަމުގައި އިތުރު ކުރި ދާއިރާ އެވެ.
ދެން ދާއިރާއެއް އިތުރުކޮށްފައިވަނީ ކ. އަތޮޅަށެވެ. އެއީ ގުރައިދޫ ދާއިރާގައި ހިމެނޭ ގުޅި އާއި ތުލުސްދޫ ދާއިރާގައި ހިމެނޭ ހުރާ އާއި ހިންމަފުށި ހިމަނައިގެން ހުރާ ދާއިރާގައި ނަމުގައި އިތުރުކޮށްފައިވާ ދާއިރާއެކެވެ.
ކޮންމެ އިންތިހާބީ ދައުރަކަށް ފަހު މަޖިލީހުގެ މެންބަރުންގެ އަދަދު އިތުރުވަމުން ދާތީ އެ އަދަދު ހިފެހެއްޓުމަށްޓަކައި މަޖިލީހުގެ އެކުލެވުން ބަދަލުކުރުމަށް ރައްޔިތުންގެ މަޖިލީހަށް ބިލެއް ވެސް ހުށަހަޅާފައިވެ އެވެ. އިންތިހާބީ ދާއިރާތައް މިހާރު އެކުލަވާލައިފައި ވަނީ އާބާދީގެ ކޮންމެ 5،000 މީހަކު ތަމްސީލުކުރެވޭ ގޮތަށް އަދި އެ އަދަދަށް ނުހިމެނޭ ކޮންމެ އަތޮޅެއްގައި ދެ މެންބަރުން ހިމެނޭ ގޮތަށެވެ.
