އަންނަ އަހަރު ދައުލަތަށް އާމްދަނީ އާއި ހިލޭ އެހީގެ ގޮތުގައި ވަންނަ ކޮންމެ 100ރ. އަކުން 22ރ. ދަރަނި ދައްކަން ހަރަދުވާނެ ކަމަށް 2024 އަށް ލަފާކޮށް ފިނޭންސް މިނިސްޓްރީން ހުށަހެޅި ބަޖެޓުގައި ލަފާކޮށްފި އެވެ.
އަންނަ އަހަރު ދަރަނި އަނބުރާ ދެއްކުމަށް 2.2 ބިލިއަން ރުފިޔާ ހަރަދުވާނެކަމަށް ލަފާކޮށްފައިވާއިރު، ދަރަނީގެ އިންޓްރެސްޓް ދެއްކުމަށް 5.2 ބިލިއަން ރުފިޔާ ހަރަދުވާނެ އެވެ.
ދައުލަތުގެ ސީދާ ދަރަނި
މިއަހަރު ނިމޭއިރު، ދައުލަތުގެ ސީދާ ދަރަނި 104.8 ބިލިއަން ރުފިޔާ އަށް އަރާނެ ކަމަށް ބަޖެޓުގައި ލަފާކޮށްފައިވާއިރު، މިއީ 2022 ވަނަ އަހަރާއި އަޅާ ބަލާއިރު 15.5 އިންސައްތް އިތުރުވުމެކެވެ.
އޭގެ އިތުރުން މިއަހަރު ނޮމިނަލް ޖީޑީޕީ 12 އިންސައްތަ ކުރިއަރާނެ ކަމަށް ލަފާކޮށްފައިވާއިރު، އޭގެ ސަބަބުން މި އަހަރު ތެރޭގައި ޖީޑީޕީގެ ނިސްބަތުން ދަރަނި، 98.4 އިންސައްތައަށް އަރާނެ ކަމަށް ބެލެވެ އެވެ.
އަންނަ 2024 ނިމޭއިރު، ދައުލަތުގެ ސީދާ ދަރަނި 117.8 ބިލިއަން ރުފިޔާއަށް އަރާނެ ކަމަށާއި، 2026 ނިމޭއިރު ސީދާ ދަރަނީގެ ސްޓޮކް 138 ބިލިއަން ރުފިޔާއަށް އަރާނެ ކަމަށް ބަޖެޓުގައި ވަނީ ލަފާކޮށްފަ އެވެ.
މިއާއެކު، ޖީޑީޕީގެ ނިސްބަތުން ދަރަނި 99.7 އިންސަައްތައަށް އަރައި، 2026 ގެ ނިޔަލަށް ދައުލަތުގެ ސީދާ ދަރަނި ޖީޑީޕީގެ ނިސްބަތުން 95 އިންސައްތައަށް ވުރެ ތިރިކުރުމަށް ކަނޑައަޅާފައިވާ ފިސްކަލް އަމާޒު ހާސިލު ނުވާނެ ކަމަށް ބެލެވެ އެވެ.
ގެރެންޓީ ދީފައިވާ ދަރަނި
2023 ވަނަ އަހަރުގެ ނިޔަލަށް ދައުލަތުން ގެރެންޓީ ދީފައިވާ ދަރަނި ދަށްވާނެ ކަމަށް ބަޖެޓުގެ އަދަދުތަކުން ދައްކަ އެވެ. 2020 ވަނަ އަހަރު ދައުލަތުން ގެރެންޓީ ދީފައިވާ ދަރަނި 19.9 ބިލިއަނަށް އެރި އެވެ. ނަމަވެސް, މިއަހަރު ނިމޭއިރު މި އަދަދު 15.3 ބިލިއަން ރުފިޔާއަށް ދަށްވާނެ ކަމަށް ލަފާކުރެވެ އެވެ. މިއީ ޖީޑީޕީގެ ނިސްބަތުން ބަލާއިރު 14.4 އިންސައްތަ އެވެ.
އޭގެ އިތުރުން 2024 ވަނަ އަހަރު ދައުލަތުން ގެރެންޓީ ދީފައިވާ ދަރަނީގެ އަދަދު އިތުރަށް ދަށްވެ 13.2 ބިލިއަން ރުފިޔާ، ނުވަތަ ޖީޑީޕީގެ ނިސްބަތުން 11.5 އިންސައްތައަށް ތިރިވާނެ ކަމަށް ދައުލަތުގެ ބަޖެޓުން ހާމަވެ އެވެ.
2022 ނިމުނު އިރު ދައުލަތުގެ ޖުމުލަ ދަރަނި ހުރީ 106 ބިލިއަން ރުފިޔާގަ އެވެ. މިއަހަރު ނިމޭއިރު މި އަދަދު އިތުރުވެ ދައުލަތުގެ ޖުމުލަ ދަރަނި ގާތްގަޑަކަށް 120 ބިލިއަން ރުފިޔާއަށް އަރާނެ ކަމަށް ލަފާކުރެވެ އެވެ.
މިއާއެކު، މިއަހަރުގެ ނިޔަލަށް ޖީޑީޕީގެ ނިސްބަތުން ޖުމުލަ ދަރަނި ހުންނާނީ 112.8 އިންސައްތައިގަ އެވެ. އަދި މި އަދަދު އިތުރުވެ 2024 ގައި 114.3 އިންސައްތައަށް މަތިވާނެ ކަމަށް ބެލެވެ އެވެ.
