ޖުޒާމް ބަލި ނުވަތަ ލެޕްރަސީ ފެތުރުން ހުއްޓުވި ފުރަތަމަ ގައުމެއްގެ ގޮތުގައި ރާއްޖެ ކަނޑައަޅައި ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ރާއްޖެއަށް މަރުހަބާ ކިޔައިފި އެވެ.
މި ކާމިޔާބާ ގުޅިގެން ހެލްތު މިނިސްޓްރީގެ ރަސްމީ އެކްސް އެކައުންޓުން ކުރި ޕޯސްޓެއްގައި ވަނީ މި ލަނޑުދަނޑިއަށް ހާސިލްވުމަށް މިހާރު އަދި މާޒީގައި ސިއްހީ ދާއިރާގައި މަސައްކަތް ކޮށްފައިވާ ހުރިހާ މަސައްކަތްތެރިންނަށް ޝުކުރު އަދާކޮށްފަ އެވެ.
މި ފާހަގަކުރުމުގެ ގޮތުން ޑަބްލިޔޫއެޗްއޯއިން ރާއްޖެއަށް ދިން ފިލައާ ހަވާލުވެވަޑައިގަތީ ހެލްތު މިނިސްޓަރު އަހުމަދު ނަސީމު އެވެ.
ޖުޒާމް ބަލި މުޅިން ނައްތައިލެވިފައިވާ ގައުމެއްގެ ގޮތުގައި ރާއްޖެ ކަނޑައެޅުމަށް މަސައްކަތް ފެށީ 2019 ވަނަ އަހަރު އެވެ.
ޖުޒާމްބައްޔަކީ ގައިންގަޔަށް އަރާ ޖަރާސީމަކުން ޖެހޭ ބައްޔެކެވެ. މި ބައްޔަށް ހާއްސަ ފަރުވާއެއް ނެތް ދުވަސްވަރު ރާއްޖޭގައި ބަލި ޖެހުނު މީހުން، އެކަހެރިކޮށް ރަށުގެ ވަކި ސަރަހައްދެއްގައި، އަދި ބައެއް މީހުން ފަޅުރަށްތަކެއްގައި ގެންގުޅެމުން ދިޔަ އެވެ.
ޖުޒާމް ބަލި ޖެހުނު މީހުން ގެންގުޅުނު ރަށްތަކަކީ މާލެ އަތޮޅު ވިލިވަރާއި ބިޔާދޫ އަދި ހުވަދު އަތޮޅު ހަވޮއްޑާ އާއި ފޮނަދޫ އެވެ.
ރާއްޖެއިން މެލޭރިއާ އާއި ފައިލޭރިއާ ފަދަ ބަލިތައް ނައްތައިލެވުނީ އާއްމުންނާއި ސިއްހީ ހިދުމަތްތެރިންނާއި ކަމާ ގުޅުން ހުރި އިދާރާތަކުގެ އެއްބާރުލުން ލިބިގެން ކަމަށް އެޗްޕީއޭއިން ބުނެ އެވެ.
