ސިޔާސީ ޕާޓީތަކުގައި ރަޖިސްޓްރީ ވާން ހުށަހަޅާ ފޯމަށް ގެނައި ބަދަލުތަކާ ގުޅިގެން "ނޭނގި" ޕާޓީތަކަށް ވައްދާ މައްސަލައަށް ބޮޑު ހައްލެއް ގެނެވިއްޖެ ކަމަށް އިލެކްޝަންސް ކޮމިޝަން (އީސީ)ން މިއަދު ބުނެފި އެވެ.
ރާއްޖޭގެ ވޯޓު ލެވޭ އާބާދީގެ ބޮޑު އިންސައްތައެއް ސިޔާސީ ޕާޓީތަކުގައި ރަޖިސްޓްރީކޮށްފައި ވާއިރު، މީސްމީހުންނަށް ނޭނގި، ވަގު ފޯމު ހުށަހަޅައިގެން ސިޔާސީ ޕާޓީތަކަށް މީހުން ވައްދާ މައްސަލަ އާއި ރަޖިސްޓްރީކޮށްފައިވާ ޕާޓީ ބަދަލުކުރާ މައްސަލަ ބޮޑެވެ.
މިކަން ހައްލުކުރަން އީސީން މީގެ ދެ އަހަރު ކުރިން ޕާޓީތަކުން ހުށަހަޅާ ފޯމުތަކުގައި ހިމަނަން ޖެހޭ މައުލޫމާތު އިތުރުކުރި އެވެ. އަދި, އައިޑީ ކާޑުގައި ޖަހާފައި ހުރި ފޮޓޯ ނޫން ފޮޓޮއެއް ހުށަހަޅަން މަޖުބޫރުކޮށް ފޯމުގައި އޮންނަ ނަމްބަރަށް އެސްއެމްއެސްއަކުން އެންގުން ފަދަ ކަންކަން ކުރަން ފެށި އެވެ.
އޭގެ އިތުރުން ވަގު ފޯމު ހުށަހަޅާ ޕާޓީތައް ޖޫރިމަނާ ކުރާ ގޮތަށް ވެސް ގަވާއިދުގައި ކަނޑައެޅި އެވެ.
މި ބަދަލުތަކުގެ ކާމިޔާބީ "އަދަދު"އަށް ކިޔައިދެއްވަމުން އީސީގެ ނައިބު ރައީސް އިސްމާއިލް ހަބީބު ވިދާޅުވި ގޮތުގައި ނޭނގި ޕާޓިތަކަށް ވައްދާ މައްސަލައިގައި މިހާރު ޝަކުވާ އަންނަނީ ކުރިން އައި ވަރުގެ 0.10 އިންސައްތަ އެވެ.
"ފޯމަށް ގެނައި ބަދަލުތަކުން ނޭނގި ޕާޓީތަކަށް ވައްދާ މައްސަލަ ވަަރަށް ބޮޑަށް ކޮންޓްރޯލް ކުރެވިއްޖެ. ކުރިއާ އަޅާ ބަލާއިރު ވަރަށް މަދުން މިހާރު ޝަކުވާ އަންނަނީ" އޭނާ ވިދާޅުވި އެވެ.
މިހެން ނަމަވެސް އަދިވެސް ދުވާލަކު ހަތަރުު ވަރަކަށް ޝަކުވާ އަންނަ ކަމަށް ހަބީބު ވިދާޅުވި އެވެ. އޭނާ ވިދާޅުވި ގޮތުން ނަމަ މިއީ ފޯމަށް ބަދަލު ގެނައުމުގެ ކުރިން ނޭނގި ޕާޓީތަކުގައި ރަޖިސްޓްރީކޮށްފައި ތިބި މީހުންނެވެ.
ނޭނގި ޕާޓީތަކަށް ވައްދާ މައްސަލަތައް މަދުވާން މެދުވެރިވީ އަނެއް ސަބަބެއްގެ ގޮތުގައި ހަބީބު ފާހަގަކުރެއްވީ މިކަމަށް އާންމުން ހޭލުންތެރިވެފައިވާ މިންވަރެވެ.
އީސީން މިއަދު ވަނީ ޕާޓީތަކުގެ އަދާހަމަ ރަޖިސްޓްރީ އާންމުކޮށް ޝަކުވާ ހުށަހަޅަން ހުޅުވާލާފަ އެވެ. މަސް ދުވަހުގެ މުއްދަތަށް ހާއްސަ އިސްކަމެއް ދީގެން މި މަސައްކަތް އެ ކޮމިޝަނުން ފެށީ އިންތިހާބު ދުވަސްވަރުގައި ޕާޓީތަކުގައި ރަޖިސްޓްރީ ވުން އިތުރުވެފައިވާތީ އެވެ.
އެގޮތުން ހަބީބު ވަނީ ޝަކުވާއެއް އޮތް ނަމަ އީސީއަށް ހުށަހެޅުމަށް އެދިވަޑައިގެންފަ އެވެ.
ސިޔާސީ ޕާޓީތަކުގެ ދަފްތަރުގެ ލިސްޓު އީސީގެ ވެބްސައިޓުން ފެންނާނެ އެވެ. އަދި އެސްއެމްއެސް ކޮށްގެންނާއި ކޮމިޝަންގެ ޕޯޓަލް މެދުވެރިކޮށް އެ ޕާޓީއެއްގައި ރަޖިސްޓްރީވެފައި ވާތޯ ބެލޭނެ އެވެ.
