ނުރަސްމީ ދަތުރުފުޅެއްގައި އިންތިހާބީ ރައީސް އަދި މާލޭގެ މޭޔަރު ޑރ. މުހައްމަދު މުއިއްޒު މިރޭ ސިންގަޕޫރަށް ފުރާވަޑައިގަންނަވާނެކަން އެނގިއްޖެ އެވެ.
ޕީއެންސީގެ އިސް އޮފިޝަލަކު "އަދަދު" ނޫހަށް ޔަގީންކޮށްދެއްވި ގޮތުގައި އެމަނިކުފާނު ފުރާވަޑައިގަންނަވާނީ މިރޭ 23:40 ގައި ފުރާ ސިންގަޕޫރު އެއާލައިންސްގެ ފްލައިޓުންނެވެ.
އެމަނިކުފާނުގެ އަރިހުގައި މި ދަތުރުފުޅުގައި އެ ޕާޓީގެ އިސް ބޭފުޅުންތަކެއް ވެސް ބައިވެރިވެވަޑައިގަންނަވާނެ ކަމަށް އެ އޮފިޝަލް މައުލޫމާތު ދެއްވި އެވެ.
މިއީ ރިޔާސީ އިންތިހާބު ކާމިޔާބު ކުރެއްވި ފަހުން ޑރ. މުއިއްޒު ރާއްޖޭން ބޭރަށް ކުރައްވާ ފުރަތަމަ ދަތުރުފުޅެވެ. އެހެންކަމުން, ސިންގަޕޫރަކީ ރައީސުލްޖުމްހޫރިއްޔާގެ ހުވާ ކުރެއްވުމުގެ ކުރިން އެމަނިކުފާނު ވަޑައިގަންނަވާނެ ފުރަތަމަ ގައުމެވެ.
