ކޮރަޕްޝަންގެ މައްސަލައެއް ސާބިތުވެ 11 އަހަރުގެ ޖަލު ހުކުމެއްގައި ހުންނެވި ކުރީގެ ރައީސް ޔާމީން އަބްދުލްގައްޔޫމްގެ ބަންދަށް ސަރުކާރުން ލުއި ދެއްވުމާއެކު ރޭ ޕީޕީއެމްގެ އޮފީހަށް ވަޑައިގެން ސަޕޯޓަރުންނާ ބައްދަލު ކުރެއްވެވި އެވެ.
ކުއްލި ގޮތަކަށް ޕީޕީއެމްގެ އޮފީހަށް ވަދެވަޑައިގެން އެ މަނިކުފާނު ވަނީ އެތަނުގައި ތިއްބެވި ސަޕޯޓަރުންނާއި ޕީޕީއެމްގެ އިސް ބައެއް ބޭފުޅުންގެ އިތުރުން ޕީޕީއެމް/ޕީއެންސީގެ ކޯލިޝަނަށް ނިސްބަތްވާ ބައެއް މަޖިލިސް މެންބަރުންނާ ވެސް ބައްދަލު ކުރައްވައިފަ އެވެ.
އެ ބައްދަލުވުމުގައި ރައީސް ޔާމީން ވަރަށް ދިގުކޮށް ވާހަކަފުޅު ދައްކެވި އެވެ. އެމަނިކުފާނު ވިދާޅުވީ ކުރިއަށް މިއޮތް ފަސް އަހަރަކީ ހަމަޖެހިގެން ތިބެންވީ ފަސް އަހަރު ނޫން ކަމަށާއި މިހާރުން ފެށިގެން ޕާޓީ ވަރުގަދަ ކުރުމަށް މަސައްކަތް ފަށަން ޖެހޭ ކަމަށެވެ.
މަސައްކަތް ކުރަމުން އައި ގޮތް ބަދަލުކޮށް ޒުވާނުންނަށް އިސްކަން ދީގެން، އެ ކުދިންނާ ވާހަކަ ދައްކައިގެން، ހުރި ކަންބޮޑުވުންތައް ދެނެގަނެ އެކަންކަމުގެ ތެރެއިން އެ ކުދިންގެ ތާއީދު ހޯދުމަށް މަސައްކަތް ކުރުމަށް ސަޕޯޓަރުންގެ ކިބައިން ރައީސް ޔާމީން އެދިވަޑައިގެންނެވި އެވެ.
"ކޮންމެ ބޭފުޅަކު އަޅުގަނޑަށް ޔަގީންކަން ދެއްވާ، ކޮންމެ ބޭފުޅަކު 50 ނުވަތަ 40 ކުދިން ގޮވައިގެން، ކޮފީއަކަށް އަރާލައިގެންވިޔަސް އެކުދިންނާ ވާހަކަ ދައްކައިލައި ހަދަން،" ރައީސް ޔާމީން ވިދާޅުވި އެވެ.
ޔާމީން ވިދާޅުވީ ނިމިދިޔަ އިންތިހާބުގެ ނަތީޖާއާ މެދު އުފާ ކުރައްވާ ކަމަށެވެ. ނަމަވެސް, އިންތިހާބުގައި ވާދަކުރި ޑިމޮކުރެޓްސްއިން އެމްޑީޕީއާ ގުޅުނު ނަމަ ނަތީޖާ ބަދަލުވީސް ކަމަށާއި ބޭނުންވަނީ އެފަދަ ހާލަތަކަށް ނުގޮސް އިންތިހާބެއް ކާމިޔާބު ކުރެވޭނެ ވަރަށް ތައްޔާރުވުން ކަމަށެވެ.
"އިންތިހާބެއް ކުރިމަތިވީމާ އެކަންޏެއް ނޫން ދެއްތޯ މަސައްކަތް ކުރަން ޖެހެނީ؟ އަބަދުވެސް އެ މަސައްކަތް ކުރަން އެބަޖެހޭ، ކޮންމެ ފަސް އަހަރަކުން ވެރިކަން ބަދަލު ވާން ވެއްޖެއްޔާ ކޮބައިތޯ ހަމަޖެހުމެއް؟،" ޔާމީން ވިދާޅުވި އެވެ.
އަލަށް އުފެދޭ ޑރ. މުއިއްޒުގެ ސަރުކާރުގެ ވާހަކައަށް އަލިއަޅުވާލައި ޔާމީން ވިދާޅުވީ އެ ވެރިކަމުގައި މިނިސްޓަރުންނަށް ވެވަޑައިގަންނަވާ ބޭފުޅުންނަށް ގޮންޖެހުންތައް އިދިކޮޅު ޕާޓީ ކުރިމަތި ކުރާނެ ކަމަށެވެ. ނަމަވެސް އެ ގޮންޖެހުންތަކާ ދެކޮޅަށް މަސައްކަތް ކޮށްލުމުގެ ހިތްވަރު ހުންނަން ޖެހޭނެ ކަމަށެވެ.
ރައީސް ޔާމީންގެ ބަންދަށް ސަރުކާރުން އެންމެ ފުރަތަމަ ލުޔެއް ދީ ގޭބަންދަށް ބަދަލުކުރީ މިމަހުގެ އެއްވަނަ ދުވަހު އެވެ. އެއަށްފަހު ރޭގައި ވަނީ ކަރެކްޝަންސްގެ އޮފިސަރަކާ ނުލައި ހޮސްޕިޓަލަށް ގޮސް ޑޮކްޓަރަށް ދެއްކުން ފަދަ ކަންކަން ކުރެވޭ ގޮތަށް ލުއިތަކެއް ދީފަ އެވެ.
ރައީސް ޔާމީން އެންމެފަހުން ސަޕޯޓަރުންނާ ބައްދަލު ކުރައްވައި ވާހަކަދައްކަވައިފައި ވަނީ މިދިޔަ އަހަރުގެ ޑިސެމްބަރު 23 ގައި އޮތް ޖަލްސާއެއްގަ އެވެ. އާރަށުގެ މުއާމަލާތުގެ މައްސަލައިގައި އެ މަނިކުފާނު 11 އަހަރަށް ޖަލަށް ލުމަށާއި ފަސް މިލިއަން ޑޮލަރުން ޖޫރިމަނާ ކުރީ ޑިސެމްބަރު 25 ވަނަ ދުވަހު އެވެ.
މުހިންމު ބައެއް ހަބަރު
ދުވަހުގެ ފޮޓޯ
ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން އިއްޔެ އެޖެންޑާކުރި ޖަލްސާގެ ކުރިއަށް ނުގެންދިޔުމުން އެމްޑީޕީގެ މެމްބަރުން ނުރުހުން ފާޅުކުރުމުގެ ތެރޭގައި މަރަދޫ ދާއިރާގެ މެމްބަރު އިބްރާހިމް ޝަރީފު ރިޔާސަތުގެ މޭޒުކައިރީގައި. އިއްޔެގެ ޖަލްސާ ކުރިއަށް ނުގެންދެވުނީ އެ ޖަލްސާގެ ރިޔާސަތު ބަލަހައްޓަވަންޖެހޭ މަޖިލީހުގެ ނައިބު ރައީސް އީވާ އަބްދުﷲ އާލާސްކަންފުޅާ އުޅުއްވާ ކަމަށް ވިދާޅުވެ ހާޒިރުވެވަޑައިނުގަތުމުން.
