އިޒްރޭލުން ފަލަސްތީނާ ދެކޮޅަށް ހިންގަމުންދާ ގަތުލުއާންމުގައި ހާލުގައި ޖެހިފައިވާ ގާޒާގެ ރައްޔިތުންނަށް އިންޑިއާއިން 38.5 ޓަނުގެ އިންސާނީ އެހީ ފޮނުވައިފި އެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާނު ކުރެއްވި ޓުވީޓެއްގައި ވިދާޅުވީ، އެހީ ހިފައިގެން ދާ އިންޑިއާގެ އަސްކަރީ ވައިގެ އުޅަނދު މިހާރު ދަތުރުކުރަމުންދަނީ މިސްރުގެ އަލް އަރިޝް އެއާޕޯޓަށް ކަމަށެވެ. ގާޒާއަށް އެހީ ފޯރުކޮށްދިނުމަށް ބޭނުންކުރަމުންދަނީ މިސްރުގެ ރަފާހު ބޯޑަރެވެ.
އެގޮތުން، އިއްޔެ އިންސާނީ އެހީ ހިފައިގެން ދިޔަ 20 ޓްރަކެއް ވަނީ ގާޒާއަށް ވަދެފަ އެވެ. މިއީ މި މަހުގެ ހަތްވަނަ ދުވަހު އިޒްރޭލުން ދޭން ފެށި ހަމަލާތަކަށްފަހު އެ ރަށަށް ލިބުނު ފުރަތަމަ އެހީ އެވެ.
އިޒްރޭލުން ވަނީ ގާޒާއަށް ދެމުންދިޔަ ކަރަންޓާއި ފެން ކަނޑާލާއި އެހީ ލިބޭނެ ދޮރުތައް ބަންދުކޮށްފަ އެވެ. ރަފާހު ބޯޑަރު ހުރަސްކޮށް އެހީ ފޯރުކޮށްދޭ އުޅަނދުތަކަށް ހަމަލާދޭނެ ކަމަށްވެސް އިޒްރޭލުން މީގެ ކުރިން ވަނީ ބުނެފަ އެވެ. އެކި ގައުމުތަކާއި ޖަމާއަތްތަކުން ފޯރުކޮށްދީފައިވާ އެހީ ހިފައިގެން އުޅަނދުތައް ވަނީ އެ ބޯޑަރު ކައިރިއަށް ތޮއްޖެހިފަ އެވެ.
އިންޑިއާއިން ގާޒާއަށް ފޮނުވި އެހީގެ ތެރޭގައި ހިމެނެނީ 6.5 ޓަނުގެ ބޭސްފަރުވާގެ އެހީ އާއި ކާރިސާތަކަށް ބޭނުންވާ 32 ޓަނުގެ އެހީ އެވެ. އޭގެ ތެރޭގައި މުހިންމު ބޭހާއި، ސާޖަރީތަކަށް ބޭނުންވާ ސާމާނާއި، ޓެންޓު، ސްލީޕިން ބޭގު، ފެން ސާފުކުރާ ސާމާނު ފަދަ މުހިންމު އެހީ ހިމެނޭކަމަށް އިންޑިއާއިން ވަނީ ބުނެފަ އެވެ.
މިފަދަ އެތައް އެހީއެއް މިސްރަށް ފޮނުވި ނަމަވެސް، ގާޒާއަށް މި އެހީތައް ލިބޭނީ ރަފާހު ބޯޑަރު އަލުން ހުޅުވި އިންސާނީ އެހީ ފޯރުކޮށްދިނުމަށް ހަމަލާތައް މެދުކަނޑާލައިގެންނެވެ. އެފަދައިން އަމަލުކުރުމަށް އެދި އދ. ގެ ސަލާމަތީ ކައުންސިލަށް ރަޝިއާ އަދި ބްރެޒިލް އިން ހުށަހެޅި ގަރާތުތައް އެމެރިކާއިން ވަނީ ބޭރުކޮށްލާފަ އެވެ. އަދި އިއްޔެ މިސްރުގައި ބޭއްވި ސުލްހައިގެ މަހާސިންތާގައި ވެސް އެމެރިކާ އަދި އިޒްރޭލުން ބައިވެރިވެފައެއް ނުވެ އެވެ.
މި މަހުގެ ހަތް ވަނަ ދުވަހު ފެށި ހަނގުރާމައިގައި މިހާތަނަށް ފަލަސްތީނުގެ 4،400 އަށް ވުރެ ގިނަ މީހުން ޝަހީދުކޮށްލައިފައިވެ އެވެ. ފަލަސްތީނުގެ ހަމާސް ޖަމާއަތުން ދިން ހަމަލާތަކުގައި އިޒްރޭލުން މަރުވި މީހުންގެ އަދަދު 1400 އަށްވުރެ މައްޗަށް އަރާފައިވާއިރު ހަމާސްއިން ވަނީ އިޒްރޭލުން 200 އަށްވުރެ ގިނަ މީހުން ރަހީނުކޮށްފަ އެވެ.
