ފުލުހުން ޓޯ ކުރި ކާރެއް އޭގެ ވެރިފަރާތައް ނާންގައި ނައްތާލުމުން އޭނާއަށް 250،000ރ. ގެ ބަދަލެއް ދިނުމަށް ފުލުހުންގެ މައްޗަށް ސިވިލް ކޯޓުން އަމުރުކޮށްފި އެވެ.
މި މައްސަލާގައި ސިވިލް ކޯޓުން މިދިޔަ ބުދަ ދުވަހު ކުރި ހުކުމުގައި ބުނެފައިވާ ގޮތުން ފުލުހުން އެ ކާރު ނައްތާލާފައިވަނީ އެކަމަށް ހެދިފައި އޮތް ގާނޫނާ ހިލާފަށެވެ.
ފުލުހުން ނައްތާލި ކާރު ޓޯ ކުރީ ޖުލައި 16، 2019 ގައި އެވެ. އެ އަހަރުގެ މެއި 5، ފެށިގެން މެއި 24، އާ ހަމައަށް ކާރުގެ ވެރިފަރާތް ހުރީ މޯލްޑިވްސް ކަރެކްޝަން ސާވިސަސްގެ ބެލުމުގެ ދަށުގަ އެވެ.
ޓޯ ކުރާ އުޅަނދުތައް ނައްތައިލުމުގެ ކުރިން އުޅަނދުގެ މައުލޫމާތު އާންމު ކުރަންޖެހޭނެ ކަމަށް އެއްގަމު ދަތުރުފަތުރާބެހޭ ގާނޫނުގައި ބުނާއިރު، ކާރު ޓޯކޮށް އެކަން އެންގުމަށް ފުލުހުންގެ ވެބްސައިޓުގައި އިއުލާނުކުރީ ކާރު ނައްތާލިތާ 13 ދުވަސް ފަހުން، އޮކްޓޯވަރު 15، 2019 ގައި ކަމަށް ހުކުމުގައި ބުނެފައިވެ އެވެ.
ގާނޫނު ބުނާ ގޮތުން އުޅަނދެއް ޓޯ ކުރާތާ 24 ގަޑިއިރުތެރޭގައި އެ އުޅަނދެއްގެ މައުލޫމާތު ފަސޭހައިން ފެންނަ ގޮތައް ފުލުހުން އިއުލާނު ކުރަންޖެހޭނެ އެވެ. އަދި އުޅަނދު ނައްތާލުމުގެ ކުރިން އުޅަނދާއި ހަވާލުވާން އޭގެ ވެރިފަރާތައް 60 ދުވަހުގެ މުހުލަތެއް ދޭން ޖެހޭނެ އެވެ.
އެހެންކަމުން އެ ކާރާ ހަވާލުވުމަށް ކާރުގެ ވެރިފަރާތަށް ފުރުސަތު ލިބިފައި ނުވާ ކަމަށް ސިވިލް ކޯޓުގެ ހުކުމުގައި ބުނެފައިވެ އެވެ. އަދި ފުލުހުންގެ އެ އަމަލުގެ ސަބަބުން ކާރުގެ ވެރިފަރާތަށް އޭނާގެ މުދަލެއް ގެއްލިފައި ވާއިރު، އެ ކާރުގެ މައުލޫމާތު ފުލުހުން އާންމު ކުރި ނަމަ އެކަން އެ ގޮތަށް ދިމާވުމުގެ ފުރުސަތު ނެތީސް ކަން ފާހަގަ ކޮށް އެކަމުގެ ބަދަލު ފުލުހުން ދޭން ޖެހޭނެ ކަމަށް އެ ހުކުމުގައި ވަނީ ބުނެފަ އެވެ.
އެގޮތުން ކާރުގެ ވެރިފަރާތުން ކޯޓުގައި އެދުނީ އެ ބްރޭންޑްގެ ކާރެއް ނުވަތަ އޭގެ އަގު ހޯދުމަށް ކަމަށް ވާތީ އާއި އޭގެ އަގު ސާބިތުކުރަން ހެކި ހުށަހަޅާފައި ވާތީ ކޯޓުގެ ހުކުމުގައި ވަނީ އެ ބްރޭންޑްގެ ކާރެއްގެ އަގު ކަމަށްވާ 250،000ރ. އެއް މަސް ތެރޭގައި ކޯޓަށް ދެއްކުމަށް ފުލުހުންގެ މައްޗަށް އަމުރުކޮށްފަ އެވެ.
