އަންނަ އަހަރު އޮންނަ ރައްޔިތުންގެ މަޖިލީހުގެ އިންތިހާބުގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ކުރީގެ ގަވަރުނަރު ޑރ. ފަޒީލް ނަޖީބް ވާއްދަކުރައްވާނެ ކަން އިއުލާނުކުރައްވައިފި އެވެ.
ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާއަށް ވާދަކުރައްވަން ޕީޕީއެމް/ޕީއެންސީގެ ކެންޑިޑެސީއަށް ކުރިމަތިލައްވާނެކަން އިއުލާނު ކުރައްވަމުން ފަޒީލް ވިދާޅުވީ، މަޖިލިސް އިންތިހާބުގައި ވާދަކުރަން ނިންމީ އިންތިހާބީ ރައީސް ޑރ. މުހައްމަދު މުއިއްޒާއެކު އެމަނިކުފާނުގެ ރިޔާސީ ވައުދުތައް ތަންފީޒުކުރުމަށް މަސައްކަތްކުރުމުގެ ގޮތުން ކަމަށެވެ.
މަގާމަށް ކުރިމަތިލާން ނިންމެވީ ދިވެހި ރައްޔިތުން އަދި ހާއްސަކޮށް އޭނާ އުފަން ރަށް ފުވައްމުލަކުގެ ރައްޔިތުންނަށް ހިދުމަތްކުރުމުގެ ނިޔަތުގައި ކަމަށް ފަޒީލް ވިދާޅުވި އެވެ.
ފަޒީލް ވަނީ މަޖިލިސް އިންތިހާބު ކާމިޔާބުކުރުމުގައި ފުވައްމުލަކު އަދި ހާއްސަކޮށް ފުވައްމުލަކު ދެކުނު ދާއިރާގެ ރައްޔިތުންގެ ތާއީދަށް އެދިފަ އެވެ.
ފުވައްމުލަކަށް އުފަން ފަޒީލް އެމްއެމްއޭގެ ގަވަރުނަރުކަން ކުރެއްވީ އޮކްޓޯބަރު 2008 އިން ޑިސެމްބަރު 2013 ގެ ނިޔަލަށެވެ. އޭނާއަކީ އިންޓަނޭޝަނަލް މަނިޓަރީ ފަންޑުގެ މޯލްޑިވްސްގެ ގަވަރުނަރުގެ އިތުރުން ދެކުނު އޭޝިއާގެ މަރުކަޒީ ބޭންކުތަކުގެ ނެޓްވޯކެއް ކަމަށްވާ ސާކް ފައިނޭންސްގެ މިހާރުގެ ޗެއާމަން ވެސް މެއެވެ. އޭނާ އާންމު ހިދުމަތް ފެށީ 1987 ގައި މިނިސްޓްރީ އޮފް ޓްރޭޑް އެންޑް އިންޑަސްޓްރީގަ އެވެ.
ފަޒީލް ވަނީ ކޮމާޝަލް ލޯ (އިންޓެލެކްޗުއަލް ޕްރޮޕަޓީ) އިން ޕީއެޗްޑީ ހާސިލް ކުރައްވައި، އިންޓަނޭޝަނަލް ބިޒްނަސް ލޯ އިން އެލްއެލްއެމް އަދި އިކޮނޮމިކްސް އިން ބީއޭ އޮނަރސް ޑިގްރީ ހާސިލް ކުރައްވާފަ އެވެ. އޭނާ ތައުލީމު ހާސިލް ކުރެއްވީ އިނގިރޭސިވިލާތުންނެވެ.
