މިއަހަރު އެކަނި ވެސް މޫސުން ގޯސްވެ ވިއްސާރަވުމުގެ ސަބަބުން ގިނަ ރަށްތަކަށް ވަނީ ބޮޑެތި ގެއްލުންތަކަކާ ކުރިމަތިލާން ޖެހިފަ އެވެ. ގެތަކަށް ފެން ވަނުމާއި ރަށްރަށުގައި ފެންބޮޑުވެ ވަގުތީ ހިޔާތަކަށް މީހުން ބަދަލުކުރަންޖެހުނެވެ. މިފަދަ ކާރިސާތަކާއި ކުރިމަތިވަމުން ދާއިރު، އެ ކަންކަމުން އަރައިގަތުމަށް ކުރަންޖެހޭ ހަރަދާއި މެދު ވެސް ވިސްނާލަންޖެހެ އެވެ.
މޫސުމަށް އަންނަމުންދާ ބަދަލުތަކާއެކު ދިވެހިރާއްޖެއަށް މާލީ ގޮތުން ތަފާތު ހިރާސްތައް ކުރިމަތިވަމުން އަންނަ ކަން ފައިނޭންސް މިނިސްޓްރީން އާންމުކޮށްފައިވާ "ފިސްކަލް ހިރާސްތަކުގެ ބަޔާން 2023" ގައި ވެސް ވަނީ ފާހަގަކޮށްފަ އެވެ. އެގޮތުން ތިމާވެއްޓަށް އަންނަމުންދާ ބަދަލުތައް އެ ރިޕޯޓުގައި ވަނީ ކިޔައިދީފަ އެވެ.
އޭގެ ތެރޭގައި ކަނޑުގެ ލޮނުގަނޑު އުފުލުމާއި، މުރަކަ ހުދުވުން އަދި ރަށްގިރުން ފަދަ މައްސަލަތައް ހިމެނެ އެވެ. އަދި މިފަދަ ކާރިސާތަކުގެ ސަބަބުން ރާއްޖޭގެ އުފެއްދުންތެރިކަމުގެ 60 ޕަސެންޓު ހިއްސާކުރާ ފަތުރުވެރިކަމުގެ ސިނާޔަތަށް ގޮންޖެހުންތައް ކުރިމަތިވާނެ ކަމަށް ބުނެފައިވެ އެވެ.
އެގޮތުން މި ގަރުނު ނިމޭއިރު، ދުނިޔޭގެ ކަނޑުގެ ލޮނުގަނޑު އެއް މީޓަރަށް އުފުލޭނެ ކަމަށް އިންޓަގަވަމެންޓަލް ޕެނަލް އޮން ކްލައިމެޓް ޗޭންޖް (އައިޕީސީސީ) އިން ކޮށްފައިވާ ދިރާސާގެ ސަބަބުން ރާއްޖޭގެ އެއާޕޯޓުތަކާއި ބަނދަރުތަކަށް އަސަރު ފޯރާނެ ކަމަށް މި ބަޔާނުގައި ވަނީ ފާހަގަކޮށްފަ އެވެ. އޭގެ ސަބަބުން އުމްރާނީ ތަރައްގީގެ މަޝްރޫއުތަކަށް ކުރަންޖެހޭ ހަރަދު އިތުރުވެގެން ދާނެ ކަމަށް ވެސް ވަނީ ލަފާކޮށްފަ އެވެ.
މިއަހަރުގެ މިހާތަނަށް މޫސުމަށް އަންނަމުންދާ ބަދަލުތަކާއި ގުޅިގެން ހިނގާފައިވާ ކާރިސާތަކަށް 146.3 މިލިއަން ހަރަދުކޮށްފައިވާކަމަށް ފައިނޭންސް މިނިސްޓްރީގެ ތަފާސްހިސާބުތަކުން ދައްކަ އެވެ. އަދި ފާއިތުވެދިޔަ 10 އަހަރުގެ ތެރޭގައި މޫސުމަށް އަންނަ ބަދަލުތަކާއި ގުޅިގެން ކުރިމަތިވާ ހާދިސާތަކަށް އެތައް ބިލިއަނެއް ހަރަދުކޮށްފައިވާކަން ތަފާސްހިސާބުތަކުން އެނގެ އެވެ.
ގްރެފިކްސް -- ރައްޔާން މުހައްމަދު
މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ހާދިސާތަކުގެ އިތުރުން، ރާއްޖޭގެ ނާޒުކު ތިމާވެށި ހިމާޔަތް ކުރުމަށް ވެސް ދައުލަތުން ކޮންމެ އަހަރު އެތައް ފައިސާއެއް ހަރަދު ކުރެ އެވެ. އެގޮތުން މިއަހަރު އެކަނި ވެސް، ތިމާވެށި ރައްކާތިކުރުމަށް 2،017.2 މިލިއަން ރުފިޔާ ހަރަދުކުރުމަށް ވަނީ ދައުލަތުގެ ބަޖެޓުގައި ހިމަނާފަ އެވެ. ތިމާވެށި ރައްކާތެރިކުރުމަކީ، މޫސުމީ ބަދަލުތަކުން ލިބޭ ގެއްލުންތައް ކުޑަކުރުމަށް އަޅަންޖެހޭ މުހިންމު ފިޔަވަޅެކެވެ.
ގުދުރަތީ ހާދިސާތަކުން ކުރިމަތިވާ މިފަދަ މާލީ ގޮންޖެހުންތައް ކުޑަކޮށް، ނައްތައިލުމަށްޓަކައި ޖައްވަށް ދޫކުރާ ވިހަ ގޭސްތައް ހުއްޓުވުމަށްޓަކައި ފޮސިލް ފިއުލް ބޭނުންކުރެވޭ މިންވަރު ކުޑަކޮށް ސޯލާ އެނާޖީއަށް އިންވެސްޓް ކުރާ މިންވަރު އިތުރުކުރަންޖެހޭ ކަމަށް "ފިސްކަލް ހިރާސްތަކުގެ ބަޔާން 2023" ގައި ބުނެފައިވެ އެވެ. އަދި ކާބަން ޓެކްސް ފަދަ ޓެކްސަތައް ތައާރަފުކުރެއްވިއްޖެ ނަމަ، މި ހިރާސް ކުޑަކުރެވޭނެ ކަމަށް ވެސް ބަޔާނުގައި ފާހަގަކޮށްފައިވެ އެވެ.
