އިލެކްޝަންސް ކޮމިޝަން (އީސީ) ގެ މެމްބަރު ކަމަށް އިތުރު ދައުރަކަށް އަލީ ނަޝާތު އައްޔަން ކުރުމަށް ރައްޔިތުން މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ފާސްކޮށްފި އެވެ.
މިއަދު ބޭއްވި އެ ކޮމިޓީގެ ބައްދަލުވުމުގައި ބައިވެރިވީ 11 މެންބަރުންނެވެ. ނަޝާތުއަށް އިތުރު ދައުރެއް ދޭން ކޮމިޓީގެ އަށް މެންބަރަކު ފެންނަ ކަމަށް ވޯޓުދެއްވި އެވެ.
ނަޝާތުގެ ދައުރު ހަމަވާތީ އޭނާ އިތުރު ދައުރަކަށް އައްޔަން ކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ މެއި 29، ގައި ވަނީ މަޖިލީހަށް ފޮނުއްވައިފަ އެވެ. އެކަމަކު، އެ މައްސަލައަށް ގޮތެއް ނުނިންމާ ޖޫން 22 ގައި މަޖިލިސް ވަނީ ޗުއްޓީއަށް ގޮސްފަ އެވެ.
އެއަށް ފަހު އިއްޔެ ރައްޔިތުންގެ މަޖިލީހުގެ އިދާރާއިން ކުރި އިއުލާނެއްގައި ވަނީ ނިޝާތު އިތުރު ދައުރަކަށް އީސީއަށް އައްޔަން ކުރުމާ މެދު އާންމުންގެ ޝަކުވާއެއްވޭތޯ ބެލުމަށް ހުޅުވާލާފައިވާ ކަމަށެވެ.
އޭނާއާ މެދު އެއްވެސް ޝަކުވާއެއް ވާ ނަމަ މިއަދު 14:00ގެ ކުރިން ޝަކުވާ ހުށަހަޅާ ފަރާތުގެ ނަމާއި ދާއިމީ އެޑްރެހާއި ފޯނު ނަމްބަރު އެނގޭނެ ގޮތަށް ލިޔުމުން ނުވަތަ އީމެއިލް މެދުވެރިކޮށް ހުށަހެޅުމަށް އިއްޔެ މަޖިލީހުން އެދުނެވެ.
އިތުރު ދައުރަކަށް ނަޝާތު އައްޔަން ކުރުމަށް މިނިވަން މުއައްސަސާ ކޮމިޓީން ފާސްކުރުމާ އެކު ދެން އޮންނާނީ އޭނާ އަށް ތާއީދު އޮތްތޯ ބެލުމަށް ތަޅަމަށް ފޮނުވުމެވެ.
ކުރީގެ ރައީސް އަބްދުﷲ ޔާމީނުގެ ވެރިކަމުގައި ޖުލައި 25، 2018 ގައި އީސީއަށް އައްޔަން ކުރި ނަޝާތުގެ ދައުރު ހަމަވީ މި އަހަރުގެ ޖުލައި 25ގަ އެވެ.
