ހުޅުމާލޭގެ ދެ ވަނަ ފިޔަވަހީގައި ހުންނަ ހިޔާގެ ޓަވަރަކުން ވެއްޓުނު ކުއްޖާ ކާރަށް އަރުވަން ދެކޮޅު ހެދި ކަމަށް ބުނާ ޓެކްސީ ޑްރައިވަރުގެ މައްސަލަ ތަހުގީގު ކުރަމުންދާ ކަމަށް ފުލުހުން މިއަދު ބުނެފި އެވެ.
ހިޔާ އެޗު-6 ޓަވަރުގެ 12 ވަނަ ފަންގިފިލާގެ 15 ވަނަ އެޕާޓްމަންޓުން މަގުމައްޗަށް އެ ކުއްޖާ ވެއްޓުނީ ހޮނިހިރު ދުވަހުގެ ރޭ 11:45 ހާއިރު އެވެ. ވެއްޓުމާއެކު އެ ސަރަހައްދުގައި އެވަގުތު ތިބި ޒުވާނުންތަކެއް އެކުއްޖާ ހޮސްޕިޓަލަށް ގެންދިޔަ އެވެ.
ނަމަވެސް، އެ ކުއްޖާ ހޮސްޕިޓަލަށް ގެންދިއުމަށްޓަކައި އެހީއަށް އެދުނު ފުރަތަމަ ކާރުގެ ޑްރައިވަރު އެކަމަށް އިންކާރުކުރި ކަމަށް އެ ސަރަހައްދުގައި ތިބި މީހުން މި ނޫހަށް މައުލޫމާތު ދެ އެވެ. ލޭ އުނގުޅި ކާރުގެ ސީޓު ހަޑިވެދާނެ ކަމަށް އެ ކާރުގެ ޑްރައިވަރު ބުނި ކަމަށް، ނިޔާވި ކުއްޖާ ހޮސްޕިޓަލަށް ގެންގޮސްދިން ޒުވާނުން ބުނެ އެވެ.
އެކަމާ ގުޅޭގޮތުން "އަދަދު" ނޫހުން ސުވާލު ކުރުމުން ފުލުހުންގެ މީީޑިއާ އޮފިޝަލަކު ބުނީ އިހުމާލުވި ޑްރައިވަރުގެ މައްސަލަ ވެސް، އެ ކުއްޖާ ޓަވަރުން ވެއްޓުނު މައްސަލައިގެ ތެރެއިން ބަލަމުން އަންނަ ކަމަށެވެ.
"އެ މައްސަލައިގެ ތެރެއިން ބަލަމުން އަންނަނީ. ހުރިހާ މައްސަލައެއް ވެސް ތަހުގީގު ކުރަމުން ދަނީ،" މީޑިއާ އޮފިޝަލް ވިދާޅުވި އެވެ.
ޓަވަރުން ވެއްޓުނު ކުއްޖާއަށް ލިބުނު އަނިޔާތަކުގައި އޭނާ ނިޔާވިކަން ހުޅުމާލެ ހޮސްޕިޓަލުން ކަށަވަރު ކޮށްދިނީ ވެއްޓުނުތާ ގަޑިއެއްހާއިރު ފަހުން 12:45 ގަ އެވެ.
އެ ހާދިސާގައި އެ ކުއްޖާގެ ބޮލަށާއި ފަޔަށް ވަރަށް ބޮޑެތި ޒަހަމުތަކެއް ލިބުނު ކަމަށް މަންޒަރު ދުށް މީހުން މި ނޫހުގެ ނޫސްވެރިންނަށް ކިޔައިދިނެވެ. އެ ކުއްޖާ ވެއްޓިފައި އޮތް ތަނުގައި ވެސް ވަރަށް ބައިވަރު ލޭ އޮހުރިފައި އޮތެވެ.
ހއ. ދިއްދޫއަށް އުފަން އެ ކުއްޖާގެ ޖަނާޒާ ބާއްވާފައި ވަނީ އާދީއްތަ ދުވަހުގެ ހެނދުނު 10:00 ގައި ހުޅުމާލެ ސަހަރާ މިސްކިތުގަ އެވެ.
