ބިދޭސީ މީހެއްގެ އަތުން ތެލުލިފަތް ކޮތަޅެއް ފޭރުނު ދެ މީހެއްގެ ބަންދަށް 15 ދުވަސް ޖަހައިފި އެވެ.
މި މައްސަލާގައި އިއްޔެ ހައްޔަރު ކުރީ 33 އަހަރުގެ ފިރިހެނަކާއި 34 އަހަރުގެ ފިރިހެނެކެވެ. މި ދެމީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން ކޮންމެ މީހެއްގެ ބަންދަށް 15 ދުވަހުގެ މުއްދަތެއް ވަނީ ޖަހާފަ އެވެ.
މި ދެމީހުން ހައްޔަރުކޮށްފައި ވަނީ ބިދޭސީއެއްގެ އަތުން 30 ޕެކެޓު ތެލުލިފަތް ހުރި ކޮތަޅެއް ފޭރުމުގެ ތުހުމަތުގަ އެވެ. އަދި މި ދެމީހުން އެ ކޮތަޅު ފޭރުނު އިރު ދުއްވި ސައިކަލަކީ، ވަގަށް ނަގައިފައިވާ ސައިކަލެއްކަން ވެސް ވަނީ ހާމަވެފަ އެވެ.
އެ ސައިކަލު މިހާރު ވަނީ އޭގެ ވެރި ފަރާތާ ހަވާލުކޮށްފަ އެވެ.
މި މައްސަލައިގައި ހައްޔަރުކޮށްފައިވާ 33 އަހަރުގެ ޒުވާނާ ވަނީ ވައްކަން، ފޭރުން އަދި މާރާމާރީ ފަދަ އެކި މައްސަލަތަކުގައި މީގެ ކުރިން 43 ފަހަރަކު ހައްޔަރުކޮށްފަ އެވެ. 14 ފަހަރު ވަނީ ބަންދުގެ މުއްދަތު އިތުރުކޮށްފަ އެވެ.
