މި އަހަރުގެ މިހައިތަނަށް ރާއްޖެއަށް ޒިޔާރަތް ކުރި ފަތުރުވެރިންގެ އަދަދު 1.3 މިލިއަން ފަހަނައަޅައި ހިނގައްޖެ އެވެ.
އިމިގްރޭޝަނުން އާންމުކޮށްފައިވާ ތަފާސް ހިސާބުތަކަށް ބަލާއިރު، މިދިޔަ ސެޕްޓެމްބަރު މަހުގެ ނިިޔަލަށް ރާއްޖެއަށް 1،361،048 ފަތުރުވެރިން ޒިޔާރަތްކޮށްފައިވެ އެވެ. ސެޕްޓެމްބަރު މަހު އެކަނި ވެސް ދެލައްކައާ ގާތަށް ރާއްޖެއަށް ފަތުރުވެރިން ޒިޔާރަތްކޮށްފައިވެ އެވެ.
މިއަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެއަށް ޒިޔާރަތް ކުރީ ކޮވިޑުގެ ކުރިން އެ ލިސްޓުގައި ރަސްކަން ކުރަމުން އައި ޗައިނާއިންނެވެ. އެ ލިސްޓުގެ ދެވަނައިގައި އަވައްޓެރި އިންޑިއާ އޮތްއިރު، ތިންވަނައިގައި އޮތީ ރަޝިއާ އެވެ.
ޓުއަރިސަމް މިނިސްޓަރީގެ ތަފާސްހިސާބުތައް ދައްކާ ގޮތުން މިއަހަރު ރާއްޖެއަށް އެވަރެޖުކޮށް ކޮންމެ ދުވަހަކު ވެސް 5000 އަށްވުރެ ގިނަ ފަތުރުވެރިން ޒިޔާރަތް ކުރި އެވެ.
ސަރުކާރުން އަމާޒު ހިފާފައި ވަނީ މި އަހަރު ނިމުމުގެ ކުރިން ރާއްޖެއަށް 1.9 މިލިއަން ފަތުރުވެރިން ގެނެސް ތާރީހުގެ ތެރެއަށް ވަންނާށެވެ. އަހަރުގެ ބާކީ ތިން މަސް ދުވަސް އޮތްއިރު ކޮންމެ ދުވަހަކު އަންނަ ފަތުރުވެރިންގެ އެވަރެޖު ނިސްބަތް 100 ނުވަތަ 200 އަށް އިތުރު ކޮށްގެން މެނުއީ ސަރުކާރުން ކަނޑައަޅާފައިވާ ޓާގެޓަށް ވާސިލުވުން އެއީ ނާދިރު ކަމެކެވެ.
