އަންނަ އަހަރު ބާއްވާ ރައްޔިތުންގެ މަޖިލިސް އިންތިހާބުގައި މަސައްކަތް ކުރުމަށް އިލެކްޝަން ކޮމިޝަނުން 296 މުވައްޒަފުން ހޯދަން އިއުލާނު ކޮށްފި އެވެ.
އިލެކްޝަން ކޮމިޝަނުން ވަކިވަކިން އިއުލާނުކޮށްފައި ވަނީ، ލޮޖިސްޓިކް އޮފިސަރުންނާއި، ޓެކް އޮފިސަރުންނާއި، އެސިސްޓެންޓް އޮފިސަރުން އަދި އޮފިސަރުން ފަދަ ގިނަ މަގާމުތަކަކަށް މީހުން ހޯދުމަށެވެ. އޭގެ ތެރޭގައި މެނޭޖަރަކު ހޯދަން ވެސް އިއުލާނުކޮށްފައިވެ އެވެ.
އެ 296 މުވައްޒަފުންގެ ތެރެއިން ކޮންމެ މުވައްޒަފަކު ވެސް ނެގުމަށް ހަމަޖެހިފައި ވަނީ ކޮންޓްރެކްޓު އުސޫލުންނެވެ. ކޮންޓްރެކްޓުގެ މުއްދަތަކީ 2024 ގައި ބާއްވާ ރައްޔިތުންގެ މަޖިލިސް އިންތިހާބު ނިމުމާ ހަމައަށެވެ.
މަޖިލިސް އިންތިހާބު ބާއްވާ ތާރީހެއް އަދި އިލެކްޝަން ކޮމިޝަނުން ހާމަކޮށްފައި ނުވާއިރު، އިންތިހާބުގައި 93 ގޮނޑިއަށް ވާދަކުރާނެ އެވެ.
މިހާރު ހިނގަމުންދާ ރައްޔިތުންގެ މަޖިލީހުގައި ތިއްބަވަނީ 87 މެމްބަރުންނެވެ. ނަމަވެސް 2024 ގައި ހޮވާ މަޖިލީހަށް ހަ ގޮނޑިއެއް އިތުރު ކުރުމަށް އިލެކްޝަންސް ކޮމިޝަނުން ނިންމުމާއެކު, ދެން އިންތިހާބު ކުރާ މަޖިލީހުގެ ޖުމްލަ ގޮނޑީގެ އަދަދު 93 އަށް އަރާނެ އެވެ.
އެންމެ ފަހުން 2019 ގައި ހޮވި 19 ވަނަ ރައްޔިތުންގެ މަޖިލީހުގެ އިންތިހާބުގެ ކުރިންވެސް، 18 ވަނަ މަޖިލީހުގައި ތިބި ޖުމްލަ 85 މެންބަރުންގެ އަދަދަށް ދެ ގޮނޑި އިތުރުކުރި އެވެ.
