ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒުގެ ދޮންމަންމަ، އަވަށްޓެރި ސިލޯނަށް އުފަން، ޖީ ސްކީލާން ހުސެއިން، ރާއްޖެއަށް އެތެރެ ނުވެވޭ ގޮތަށް ބްލެކްލިސްޓުކޮށް ޑީޕޯޓުކޮށްލުމާ ގުޅޭ ގޮތުން އަދަދު ނޫހުން ހެދި ތަހުގީގީ ޑޮކިއުމެންޓަރީ އިއްޔެ ރިލީޒްކުރުމާއެކު، ގިނަ ބައެއްގެ ސަމާލުކަން ލިބި، އެކަމަށް މުއިއްޒު ރައްދު ދޭންޖެހިވަޑައިގަތެވެ.
މުއިއްޒުގެ ބައްޕަ، ޝެއިޚް ހުސައިން އަބްދުއްރަހުމާން 2015 ވަނަ އަހަރު ނިޔާވުމަށް ފަހު، ހުވަފަތް އަނބިކަނބަލުން ސްކީލާން ރާއްޖެ ދޫކޮށް ދާންޖެހުނު ގޮތާއި އޭނާ ބްލެކްލިސްޓްކުރި ގޮތާއި ކުރެވޭ ތުހުމަތު، ހެއްކާއި، އެ އަންހެން މީހާގެ އިންޓަވިއުއާއެކު ޑޮކިއުމެންޓަރީގައި ގެނެސްދީފައިވެ އެވެ.
އިއްޔެ މެންދުރު ޑޮކިއުމެންޓްރީ ނެރުމާއެކު މުއިއްޒަށް ފާޑުކިޔުމާއި ނުރުހުން ސޯޝަލް މީޑިއާގައި އޮއްސާލިއިރު، މުއިއްޒުގެ ސަޕޯޓަރުންގެ ފާޑުކިޔުން އަމާޒުކުރީ އަދަދު ނޫހަށެވެ.
ޑޮކިއުމެންޓަރީގެ ހުލާސާ
- ސްކީލާން އާއި ޝެއިޚް ހުސައިން އަބްދުއްރަހުމާން ކައިވެނި ބައްލަވައިގެން 13 އަހަރު އުޅުއްވި
- ޝެއިޚު ހުސައިން އަވަހާރަވީ ސެޕްޓެމްބަރު 29، 2015 ގައި
- ތަރިކައިގެ މައްސަލަ ފެމިލީ ކޯޓަށް ހުށަހެޅީ އޮކްޓޯބަރު 11، 2015
- މައްސަލަ ނިންމީ ނޮވެމްބަރު 29، 2015 ގައި
- ސްކީލާން ރާއްޖޭން ފުރީ ޖެނުއަރީ 12، 2016
- އެނބުރި ރާއްޖެ އައީ މާޗް 4، 2016 ގައި (އޭގެ ދެ ދުވަސް ކުރިން މާޗް 2، 2016 ބްލެކްލިސްޓްކުރި)
- ސްކީލާން ތުހުމަތު ކުރަނީ މުއިއްޒުގެ މައްޗަށް
- ސްކީލާން ބްލެކްލިސްޓު ކުރީ، ގާނޫނާ ހިލާފަށް ވަގުފާރީގެ ތުހުމަތުގައި
- އެ ބޮޑު ތުހުމަތުގެ އެއްވެސް ތަހުގީގެއް ނެތް
- އެކަމާ ގުޅޭ އެއްވެސް ލިޔުމެއް އިމިގްރޭޝަންގައި ވެސް ނެތް
- ސްކީލާން ސިލޯނަށް ދިޔަ ފަހުން މުއިއްޒުގެ އާއިލާ އޭނާއާ ގުޅުން ކަނޑާލި ކަމަށް ބުނޭ. މުވާސަލާތީ ހުރިހާ ވަސީލަތަކުން އޭނާ ބްލޮކްކުރި ކަމަށް ބުނޭ
- މަރު ދުވަހާ ހަމައަށް ބަލާނެ ކަމަށް މުއިއްޒު ވިދާޅުވި ނަމަވެސް އެއްވެސް އެހީއެއް ނުލިބޭ ކަމަށް އޭނާ ބުނޭ
މި ތުހުމަތުތައް ކޮށްފައި ވަނިކޮށް، ކެމްޕޭނުގައި މުއިއްޒު ފުވައްމުލަކަށް ވަޑައިގެން ރޭ ވިދާޅުވީ އެއްވެސް މީހެއްގެ ހައްގަކަށް ދުވަހަކުވެސް އަރައިގަނެފައި ނޯންނާނެ ކަމަށެވެ.
މުހިންމު ބައެއް ހަބަރުތައް
