ސެޕްޓެމްބަރު 30 ގައި ބާއްވާ ރިޔާސީ އިންތިހާބުގެ ދެވަނަ ބުރުގައި ވޯޓު ފޮށި ބަހައްޓާ އަދަދު އިތުރުވާނެ ކަމަށް އިލެކްޝަން ކޮމިޝަނުން ބުނެފި އެވެ.
އިލެކްޝަން ކޮމިޝަނުގެ ސެކްރަޓްރީ ޖެނެރަލް ހަސަން ޒަކަރިއްޔާ ވިދާޅުވީ ރީ-ރަޖިސްޓްރީކުރުމުން ފޮށިތަކުގައި ރަޖިސްޓްރީވެފައިވާ އަދަދުތަކަށް އަންނަ ބަދަލާ އެކު ވޯޓު ފޮށިތައް އިތުރުވާނެ ކަމަށެވެ.
ޒަކަރިއްޔާ ވިދާޅުވީ ރީ-ރަޖިސްޓްރީ ވުމަށް ހުޅުވާލުމުން ބައެއް ފޮށިތަކަށް ރަޖިސްޓްރީވެފައިވާ އަދަދު އިތުރުވެފައި ވާތީ ވޯޓު ފޮށިތަކުގެ އަދަދު އިތުރުވާނެ ކަމަށާއި، އިތުރުވާ ފައިނަލް އަދަދު ހާމަކުރެވެނީ މިބުރުގައި ރީ-ރަޖިސްޓާ ކުރާ މީހުންގެ ލިސްޓު ފައިނަލް ކުރެވުމުން ކަމަށެވެ.
އަދި ބައެއް ސަބަބުތަކާ ހެދި ވޯޓު ފޮށި ބަހައްޓާ ތަންތަން ބަދަލުވާނެ ކަމަށް ވެސް އޭނާ ވިދާޅުވި އެވެ. ލިސްޓު ފައިނަލްކޮށް އެ މައުލޫމާތު ވެސް އާންމުކުރާނެ ކަމަށް ހަސަން ވިދާޅުވި އެވެ.
ކުރިން ރިޔާސީ އިންތިހާބުތަކުގައި ވޯޓު ފޮއްޓަކަށް ރަޖިސްޓްރީ ކުރަނީ 1،000 މީހުން ކަމަށް ވިޔަސް، މި ފަހަރު ފޮއްޓަކަށް ރަޖިސްޓްރީ ކުރާ އަދަދަކީ 800 އެވެ.
ރީ-ރަޖިސްޓާކުރަން ދިން މުއްދަތުގައި ޖުމުލަ 50،047 ފޯމު ހުށަހެޅި އެވެ. އެ ފޯމުތަކުގެ ތެރެއިން ސައްހަވީ ޖުމުލަ 38،763 ފޯމެވެ.
އެއީ އޮންލައިންކޮށް ހުށަހެޅި 20،902 އަދި ކަރުދާހުން ހުށަހެޅި 17861 ފޯމެވެ. މި ފޯމުތަކުގެ ތެރެއިން ސައްހަކަން ކަށަވަރު ނުވެ އޮތީ އޮންލައިން ހުށަހެޅި 5109، އަދި ކަރުދާހުން ހުށަހެޅި 6175 ފޯމެވެ. އެއީ 11284 ފޯމެވެ.
ރިޔާސީ އިންތިހާބުގެ ދެވަނަ ބުރުގައި 282،803 މީހަކަށް ވޯޓު ލުމުގެ ހައްގު ލިބެ އެވެ. މީގެ ތެރޭގައި އަލަށް ވޯޓު ލުމުގެ ފުރުސަތު ލިބޭ 403 ޒުވާނުން ހިމެނެ އެވެ.
