ސެޕްޓެމްބަރު 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ރީ-ރަޖިސްޓްރީވުމަށް 50،000 އަށް ވުރެ ގިނަ ފޯމު ހުށަހެޅިއިރު، އޭގެ ތެރެއިން 11،000 އަށް ވުރެ ގިނަ ފޯމުގެ ސައްހަކަން ކަށަވަރު ނުކުރެވުނު ކަމަށް އިލެކްޝަންސް ކޮމިޝަނުން ބުނެފި އެވެ.
އެ ކޮމިޝަންގެ ނައިބު ރައީސް އިސްމާއީލް ހަބީބު މިރޭ ވިދާޅުވީ ރީ-ރަޖިސްޓާކުރަން ދިން މުއްދަތުގައި ޖުމުލަ 50،047 ފޯމް ހުށަހެޅި ކަމަށާއި އެއީ އޮންލައިންކޮށް ހުށަހެޅި 26،011 މީހުންނާއި، ކަރުދާސް ފޯމް ފުރާފައި ހުށަހެޅި 24،036 ހުށަހެޅުން ކަމަށެވެ.
އެ ފޯމުތަކުގެ ތެރެއިން ސައްހަވީ ޖުމުލަ 38،763 ފޯމެވެ. އެއީ އޮންލައިންކޮށް ހުށަހެޅި 20،902 އަދި ކަރުދާހުން ހުށަހެޅި 17861 ފޯމެވެ. މި ފޯމުތަކުގެ ތެރެއިން ސައްހަކަން ކަށަވަރު ނުވެ އޮތީ އޮންލައިން ހުށަހެޅި 5109، އަދި ކަރުދާހުން ހުށަހެޅި 6175 ފޯމެވެ. އެއީ 11284 ފޯމެވެ.
"ކުރިޔަށް އޮތް 48 ގަޑިއިރު، (ހުކުރު ދުވަހާއި ހޮނިހިރު ދުވަހު)، ކޮންމެ ބޭފުޅަކުވެސް އެބޭފުޅަކު ރީ-ރަޖިސްޓަރީ ވެފައިވަނީ ކޮންތަނަކަށްތޯ ކަށަވަރު ކުރެއްވުމަށް ފަރުދީ ޒިންމާ އަދާކުރެެއްވުމަށް އިލެކްޝަންސް ކޮމިޝަނުން އިލްތިމާސް ކުރައްވާ،" ހަބީބު ކުރެއްވި ޓްވީޓުގައިވެ އެވެ.
އޮންލައިން ހުށަހެޅުންތަކުގެ ތެރެއިން ސައްހަކަން ކަށަވަރު ނުވި ހުށަހެޅުންތަކުގެ ތެރޭގައި ހިމެނެނީ، ފޮޓޯ އިން މީހާ ކަށަވަރު ނުވުމާއި، މުއްދަތު ހަމަވެފައިވާ ޑޮކިއުމަންޓް ހުށަހެޅުމާއި، ދެ ނިޒާމުން ތަކުރާރުކޮށް ހުށަހެޅުމެވެ.
ފޯމުގެ ސައްހަކަން ކަށަވަރު ނުވި ސަބަބުތަކުގެ ތެރޭގައި ހިމެނެނީ، ފިންގަޕްރިންޓް ނެތުމާއި، ހެކިންގެ މައުލޫމާތު ދިމާ ނުވުމާއި، ގުޅާނެ ފޯނު ނަންބަރެއް ނެތުމާއި، މުއްދަތު ހަމަވެފައިވާ ޑޮކިއުމަންޓް ހުށަހެޅުމާއި، ދެ ނިޒާމުން ތަކުރާރުކޮށް ފޯމު ހުށަހެޅުން ކަމަށް ވެސް ހަބީބު ވިދާޅުވެ އެވެ.
ރިޔާސީ އިންތިހާބުގެ ދެވަނަ ބުރުގައި 282،803 މީހަކަށް ވޯޓު ލުމުގެ ހައްގު ލިބެ އެވެ. މީގެ ތެރޭގައި އަލަށް ވޯޓު ލުމުގެ ފުރުސަތު ލިބޭ 403 ޒުވާނުން ހިމެނެ އެވެ.
