ރިޔާސީ އިންތިހާބުގެ ދެވަނަ ބުރުގައި ވޯޓުލުމަށް ބަހައްޓާ ބޫތުތަކުގެ ޑިޒައިނަށް ބަދަލުގެނެސްފައިވާ ކަމަށް އިލެކްޝަންސް ކޮމިޝަނުން މިއަދު ބުނެފި އެވެ.
މީގެ ކުރީގެ އިންތިހާބުތަކާ ހިލާފަށް މިއަހަރުގެ ރިޔާސީ އިންތިހާބުގައި ބޫތު ބަހައްޓާފައިވަނީ ވޯޓުލާ މީހާގެ ހަރަކާތްތައް އޮބްޒާވަރުންނާއި މޮނީޓަރުންނަށް ފެންނަ ގޮތަށެވެ. އޭގެ ސަބަބުން ވޯޓު ސިއްރު ވުމާމެދު ބައެއް ފަރާތްތަކުން ވަނީ ސުވާލު އުފައްދައިފަ އެވެ. އެހެންވެ ބޫތު ބަހައްޓާ ގޮތައް ބަދަލުތަކެެއް ގެންނާނެ ކަމަށް އީސީން ކުރިން ވެސް ބުންޏެވެ.
އީސީގެ ނައިބު ރައީސް އިސްމާއިލް ހަބީބް "އަދަދު" އަށް މިއަދު ވިދާޅުވީ ފުރަތަމަބުރުގައި އެކި ފަރާތްތަކުން ލިބުނު ޝަކުވާތަކަށް ބެލުމަށްފަހު ވޯޓުލާ ބޫތުގެ ޑިޒައިންއަށް ބަދަލުތަކެއް ގެނެސްފައިވާ ކަމަށެވެ. އެގޮތުން އެ ބޫތު ތަކުގެ އެންމެ ތިރިން ބައެއް ކަނޑާލައި ދެ އަަރިމަތިން ބޮޑަށް ނިވާ ވާ ގޮތައް ހަދާފައިވާނެ ކަމަށް ވިދާޅުވި އެވެ.
މިހެން ހެދުމުން ވޯޓުލާ މީހާއަށް ބޫތުގެ ތެރެއަށް ކޮންމެވެސް ވަރަކަށް ވަދެވޭނެ އެވެ. ނަމަވެސް ބޫތުތައް އަދިވެސް ބަހައްޓާނީ ވޯޓުލާ މީހާގެ ހަރަކާތްތައް އޮބްޒާވަރުންނާއި މޮނީޓަރުންނަށް ފެންނަ ގޮތަށެވެ.
ބޫތުގެ ޑިޒައިނަށް ބަދަލުގެނެސްފަ ހުންނާނީ. ދެން ފާހަގަ ޖަހާ ތަނުގެ މަތީގައި ބްރިޓްސްލް ބޯޑެއްވެސް ބާއްވާފައި އޮންނާނީ. ފަސޭހަވާނެ ފާހަގަޖަހަން. ދެން ގަލަން ހުންނާނީ އާ ގަލަން" އޭނާ ވިދާޅުވި އެވެ.
ހަބީބު ވިދާޅުވި ގޮތުގައި ވޯޓުލުމުގެ ކަންތައްތައް އަވަސް ކުރުމުގެ ގޮތުން އިތުރު އޮފިޝަލުންވެސް ނަގައި ތަމްރީނުކުރުމުގެ މަސައްކަތް އެ ކޮމިޝަނުން މިހާރު ދަނީ ކުރަމުންނެވެ.
"ރިޒާވް ޕޫލްގައި ތިބި ފުދޭވަރަކަށް ރަނގަޅު އޮފިޝަލުން. އޭގެން އޮފިޝަލުން ނަގައި ތަމްރީނުކުރުމުގެ މަސައްކަތް އިއްޔެއިން ފެށިގެން އަޅުގަނޑުމެން މިދަނީ ކުރަމުން" ހަބީބު ވިދާޅުވި އެވެ.
އޭނާ ވިދާޅުވީ 500 މީހުންނަށްވުރެ ގިނަ މީހުން ވޯޓުލާން ރަޖިސްޓްރީކޮށްފައިވާ ފޮށިތައް ބަހައްޓާފައި ހުންނަ މަރުކަޒުތަކުގެ ޖާގަ ބޮޑު ނަމަ ވޯޓު ކަރުދާސް ދޫކުރަންވެސް ދެ އޮފިޝަލުން ތިބޭނެ ކަމަށެވެ. އަދި ކިއު މެނޭޖުކުރުމަށްވެސް އިތުރު އޮފިޝަލުން ހަރަކާތްތެރިވަމުން ދާނެ ކަމަށް ވިދާޅުވި އެވެ.
