ވެރިކަން ކުރުމުގެ ނިޒާމު ބަދަލު ކުރުމާ ގުޅޭ ގޮތުން ރައްޔިތުންގެ ފެންނަ ނުފެންނަ ވޯޓެއް ނެގުމުގެ ތައްޔާރީތަކަށް މަދުވެގެން 30 ދުވަސް ބޭނުންވާ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
ވެރިކަމުގެ ނިޒާމު ބަދަލުކުރުމަށް ފެންނަ ނުފެންނަ ވޯޓެއް ނަގަން ޑިމޮކްރެޓްސްގެ ފަރާތުން ރައްޔިތުންގެ މަޖިލިހަށް ގަރާރެއް ވަނީ ހުށަހަޅައިފަ އެވެ. އަދި ޑިމޮކްރެޓްސްގެ ފަރާތުން އެމްޑީޕީއަށް ހުށަހެޅީ ސެޕްޓެމްބަރު 30، ގައި އޮންނަ ރިޔާސީ އިންތިހާބުގެ ދެވަނަ ބުރުގެ ކުރިން އެފަދަ ވޯޓަކަށް ދިޔުމަށެވެ.
އެ ގަރާރުގެ މަސައްކަތް މަޖިލިހުގައި މިއަދު ކުރިއަށް ދަނިކޮށް ކޮމިޝަންގެ ނައިބު ރައީސް އިސްމާއީލް ހަބީބު ކުރެއްވި ޓްވީޓެއްގައި ވިދާޅުވީ މަދުވެގެން 30 ދުވަހާއި 45 ދުވަހުގެ މުއްދަތެއް ބޭނުންވަނީ ހޭލުންތެރިކުރުމުގެ މަސައްކަތުގެ އިތުރުން އާންމު އިންތިހާބުތަކޭ ބެހޭ ގާނޫނަށް ރިއާޔަތްކޮށްފައި ކަމަށެވެ.
އެ އިންތިހާބަށް އިތުރު 40 މިލިއަން ރުފިޔާ ހަރަދުވާނެ ކަމަށް ކޮމިޝަނުން ލަފާކުރެ އެވެ.
"އެންމެ މުހިންމު ކަމަކީ، މިފަދަ ވޯޓެއް ނެގުމުގެ މަގުސަދާމެދު ވޯޓުލާ މީހުން ހޭލުންތެރިކުރުވުން. ވަކި ނިޒާމަކަށް ތާއީދުކޮށް ވޯޓުލުމުގައި އެ ނިޒާމެއްގެ ފައިދާ އާއި ގެއްލުމާމެދު، ވޯޓުލާ މީހުން ހޭލުންތެރިކުރުވުމަކީ، އިލެކްޝަންސް ކޮމިޝަންގެ ގާނޫނީ ޒިންމާއެއް،" ހަބީބު ވިދާޅުވި އެވެ.
ބަރުލަމާނީ ނިޒާމެއް ގެނައުމަށް ވަކާލާތު ކުރައްވަމުން ގެންދަވާ ސިޔާސީ އިސް ލީޑަރަކީ މި ވަގުތު ރައްޔިތުންގެ މަޖިލީހުގެ ރައީސްގެ މަގާމު ވެސް ފުރުއްވާ މުހައްމަދު ނަޝީދެވެ. މީގެ ކުރިން ނަޝީދުގެ ވެރިކަމުގައި ވެސް ނިޒާމު ބަދަލު ކުރުމަށް ތާއީދުކުރައްވައި ވާހަކަ ދައްކަވާފައި ވެ އެވެ.
މީގެ ކުރިން 2007 ގައި ބޭއްވި ފެންނަ ނުފެންނަ ވޯޓުގައި ވެސް ނަޝީދާއި އޭރު އެމަނިކުފާނު ލީޑުކުރައްވަމުން ގެންދެވި އެމްޑީޕީން ވެސް ތާއީދުކުރީ ބަރުލަމާނީ ނިޒާމަކަށެވެ.
ރިޔާސީ އިންތިހާބުގެ ފުރަތަމަ ބުރުގައި ތިން ވަނައަށް އެންމެ ގިނަ ވޯޓު، ނަޝީދު އުފެއްދެވި ޑިމޮކްރެޓްސްއިން ހޯދާފައިވާއިރު ދެވަނަ ބުރުގައި ރައީސް ސޯލިހަށް ތާއީދު ކުރުމަށް އެ ޕާޓީން ހުށަހަޅާ ޝަރުތަކީ ވެސް ފެންނަ ނުފެންނަ ވޯޓު ނަގައިދިނުމެވެ.
ޑިމޮކްރެޓްސްއިން ޝަރުތުކުރީ ސެޕްޓެމްބަރު 30، ގައި އޮންނަ ދެވަނަ ބުރުގެ ކުރިން އެ ވޯޓު ނެގުމަށެވެ. ނަމަވެސް ރައީސް ސޯލިހު އެއްބަސްވީ ދެ ވަނަ ބުރުގެ ވޯޓަށް ފަހު އަދި އެމަނިކުފާނުގެ މި ދައުރު ނިމުމުގެ ކުރިން އެ ވޯޓު ބޭއްވުމަށެވެ. ޑިމޮކްރެޓްސްގެ އިންޓެރިމް ކައުންސިލުން ރޭ ނިންމީ އެ ޕާޓީގެ ހުށަހެޅުމާ އެއް ގޮތަށް މާދަމާއަށް އެއްބަސްނުވެއްޖެ ނަމަ ވަކި ބަޔަކަށް ތާއީދު ނުކޮށް ތިބުމަށެވެ.
