ސެޕްޓެމްބަރު 30، ގައި އޮންނަ ރިޔާސީ އިންތިހާބުގެ ދެ ވަނަ ބުރުގައި ވޯޓު ލެވޭ މީހުންގެ ލިސްޓު އާންމުކޮށް ޝަކުވާ ހުށަހަޅައި، ލިސްޓް ޗެކް ކުރުމަށް ވަގުތު ދޭނެކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
ރީރަޖިސްޓާ ކުރުމަށް ހުޅުވާލުމާއިއެކު، ދެވަނަ ބުރުގައި ވޯޓު ލުމަށް ރީރަޖިސްޓާ ކުރި މީހުންގެ އަދަދު ގިނަވުމާއި ގުޅިގެން އެކި ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ. އެކަމާ ގުޅިގެން އީސީގެ ރައީސް ފުއާދު ތައުފީގް މިއަދު ކުރެއްވި ޓުވީޓެއްގައި ވިދާޅުވީ ދެ ވަނަ ބުރުގައި ވޯޓު ލެވޭ މީހުންގެ ލިސްޓު އާންމުކޮށް، ޝަކުވާ ހުށަހަޅައި، ޗެކް ކުރުމަށް އެ ކޮމިޝަނުން ފުރުސަތު ދޭނެ ކަމަށެވެ.
އެގޮތުން ޕާޓީތަކުންނާއި، ކެންޑިޑޭޓުން އަދި އަމިއްލަ ފަރުދުންނަށް ވޯޓާސް ލިސްޓަށް ޝަކުވާ ހުށަހަޅައި، ޗެކް ކުރުމަށް ދެ ދުވަހުގެ މުއްދަތެއް އީސީން ދޭނެ ކަމަށް ފުއާދު ވިދާޅުވި އެވެ.
ދެ ވަނަ ބުރުގެ ވޯޓަށް ރީރަޖިސްޓްރީކުރަން ބޭނުންވާ މީހުންނަށް ކޮމިޝަނުން ހުޅުވާލީ ހުކުރު ދުވަހުން ފެށިގެން އިއްޔެގެ ހަވީރު 16:00 އާއި ހަމައަށެވެ. އެ މުއްދަތުގެ ތެރޭގައި 47،714 މީހުން ވަނީ ދެ ވަނަ ބުރުގައި އެހެން ތަނެއްގައި ވޯޓު ލާން ފޯމު ހުށަހަޅާފަ އެވެ.
މިއީ ފުރަތަމަ ބުރުގައި ރީރަޖިސްޓަކުރި މިންވަރަށް ވުރެ ގިނަ އަދަދެކެވެ.
ރިޔާސީ އިންތިހާބުގެ ދެވަނަ ބުރުގައި ޖުމުލަ 282،803 މީހުންނަށް ވޯޓު ލެވޭނެ ކަމަށާއި، އޭގެ ތެރޭގައި އަލަށް ވޯޓު ލެވޭ 408 ޒުވާނުން ހިިމެނޭކަމަށް އީސީން މައުލޫމާތުދެ އެވެ.
ރިޔާސީ އިންތިހާބުގެ ފުރަތަމަ ބުރުގައި އެންމެ ގިނަ ވޯޓު ހޯއްދެވީ އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒެވެ. އޭނާ 101،635 ވޯޓު ހޯއްދެވިއިރު އެއީ ވޯޓުލީ މީހުންގެ 46.06 ޕަސެންޓެވެ. ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 86،161 ވޯޓެވެ. އެއީ ވޯޓުލީ މީހުންގެ 39.05 ޕަސެންޓެވެ.
އެހެންކަމުން ދެ ވަނަ ބުރުގައި ވާދަކުރައްވަނީ މާލޭގެ މޭޔަރަކަށް މިހާރު ހުންނެވި މުއިއްޒާއި ރައީސް ސޯލިހެވެ.
