ރާއްޖެއަށް އަންނަ ބޭރުގެ ސަފާރީތަކާއި ޔޮޓް އަދި ކްރޫޒްލައިނާތައް ރާއްޖޭގެ ކަނޑުގެ ސަރަހައްދުގައި ދުއްވުމާއި ބަނދަރުކުރުމާ ބެހޭ އާ ގަވާއިދެއް ނެރެފި އެވެ.
މިދިޔަ ބުރާސްފަތި ދުވަހު ގެޒެޓުުރި "ދިވެހިރާއްޖެއަށް އަންނަ ބޭރުގެ ޓޫރިސްޓް އުޅަނދުފަހަރު ރާއްޖޭގެ ސަރަހައްދުގައި ދުއްވުމާއި ބަނދަރުކުރުމާބެހޭ ގަވާއިދު" އާއެކު ބޭރުގެ ޓޫރިސްޓު އުޅަނދުތަަކަށް ރާއްޖޭގައި ކްރޫޒިން ޕާމިޓް ދޫކުރާ މުއްދަތާއި އެކަމަށް ދައްކަންޖެހޭ ފީތަކަށް ވަނީ ބޮޑެތި ބަދަލުތަކެއް ގެނެސްފަ އެވެ.
އެގޮތުންް 20 މީޓަރަށްވުރެ ކުދި ބޭރުގެ ޓޫރިސްޓު އުޅަނދުފަހަރުތަކަށް އެއްވެސް ފީއަކާ ނުލައި ރާއްޖޭގެ ސަރަހައްދުގައި 90 ދުވަސްވަންދެން ދުއްވައި ބަނދަރުކުރެވޭނެ އެެވެ. އިންޓަނޭޝަނަލް މެރިޓައިމް އޮގަނައިޒޭޝަންގައި ރަޖިސްޓްރީކޮށްފައިވާ އުޅަނދެއް ނަމަ 90 ދުވަސް ހަމަވުމުން މުއްދަތު އިތުރުކުރާ ކޮންމެ ދުވަހަކަށް 50 ޔޫއެސް ޑޮލަރުގެ ފީއެއް ދައްކާގޮތައް 275 ދުވަހާ ހަމަޔަށް ކްރޫޒިން ޕާމިޓްގެ މުއްދަތު އިތުުރުކުރެވޭނެ އެެވެ.
އެއާ ހިލާފަށް 20 މީޓަރަށްވުރެ ދިގު އުޅަނދުތަކަށް ކްރޫސިން ޕާމިޓް ދޫކުރާނީ 1،000 ޔޫއެސް ޑޮލަރުގެ ފީއެއް ދެއްކުމުންނެވެ. މި ޕާމިޓުގެ މުއްދަތަކީ އިންވާޑް ކްލިއަރެންސް ދޭ ދުވަހުން ފެށިގެން 90 ދުވަހެވެ. މި އުޅަނދުތައް ރާއްޖޭގެ ސަރަހައްދުގައި ދުއްވައ،ި ބަނދަރުކޮށްހަދާ މުއްދަތަށް، ދުވާލަކަށް 100 ޔޫއެސް ޑޮލަރުގެ ފީއެއް ދައްކަންޖެހޭނެ އެވެ.
އިންޓަނޭޝަނަލް މެރިޓައިމް އޯގަނައިޒޭޝަންގައި ރަޖިސްޓްރީކޮށްފައިވާ 20 މީޓަރަށްވުރެ ދިގު އުޅަނދެއް ނަމަ ކްރޫޒިން ޕާމިޓް އެއް އަހަރަށް އިތުރުކުރެވިދާނެ އެވެ. ނަމަވެސް އެ ހުއްދަ އެއް އަހަރަށްވުރެ އިތުރުކުރާ ނަމަ 3،500 ޔޫއެސް ޑޮލަރުގެ ފީއެއް ދައްކަންޖެހޭނެ އެވެ.
މި އާ ގަވާއިދާއެކު "ޗާޓަ ލައިސެންސް" ދޫކުރާ އަގުތަކަށް ވެސް ވަނީ ބަދަލުގެނެސްފަ އެވެ. އެގޮތުން:
- 20 މީޓަރާއި އެއަށްވުރެ ކުދި އުޅަނދުތައް - ދުވާލަކު 100 ޔޫއެސް ޑޮލަރު
- 21-35 މީޓަރުގެ އުޅަނދުތައް - ދުވާލަކަށް 250 ޔޫއެސް ޑޮލަރު
- 36-45 މީޓަރުގެ އުޅަނދުތައް - ދުވާލަކަށް 400 ޔޫއެސް ޑޮލަރު
- 46-75 މީޓަރުގެ އުޅަނދުތައް - ދުވާލަކަށް 550 ޔޫއެސް ޑޮލަރު
- 76-100 މީޓަރުގެ އުޅަނދުތައް - ދުވާލަކަށް 700 ޔޫއެސް ޑޮލަރު
- 101 މީޓަރަށްވުރެ ދިގު އުޅަނދުތައް - ދުވާލަކަށް 850 ޔޫއެސް ޑޮލަރު
އާ ގަވާއިދާއެކު ކުރިން އަމަލުކުރަމުން އައި "ދިވެހިރާއްޖެއަށް އަންނަ ބޭރުގެ ޓޫރިސްޓް އުޅަނދުފަހަރު ރާއްޖޭގެ ސަރަހައްދުގައި ދުއްވައި ބަނދަރުކުރުމާބެހޭ ގަވާއިދު" ވަނީ އުވާލާފަ އެވެ.
އެ ގަވާއިދާ ހިލާފުވާ އުޅަނދުފަހަރުތައް ޖޫރިމަނާ ކުރާނެ އަދަދުތައް ވެސް ވަނީ ކަނޑައަޅާފަ އެވެ. އެގޮތުން ފުރަަތަަމަ ފަހަރަށް 1،000 ޔޫއެސް ޑޮލަރު އަދި ދެވަނަ ފަހަރަށް 2،000 ޔޫއެސް ޑޮލަރުން ޖޫރިމަނާ ކުރާނެ އެވެ. އަދި ދެ ފަހަރަށްވުރެ އިތުރަށް ގަވާއިދާ ހިލާފުވާ ކޮންމެ ފަހަރަކު 6,000 ޔޫއެސް ޑޮލަރުން ޖޫރިމަނާ ކުރާނެ އެވެ.
މީގެ ފަހުން އަމަލުކުރާނީ ބުރާސްފަތި ދުވަހު ގެޒެޓު ކުރި އާ ގަވާއިދަށެވެ. އަދި މި ގަވާއިދަށް އަމަލުކުރަން ފަށާއިރު ރާއްޖޭގެ ސަރަހައްދުގައި ދުއްވައި ބަނދަރުކުރުމަށް ހުއްދަ ދީފައިވާ އުޅަނދުތަކުގެ މައްޗަށް މި ގަވާއިދު ހިނގަން ފަށާނ،ީ އެ އުޅަނދަކަށް ކުރިން ދޫކޮށްފައިވާ ހުއްދައިގެ މުއްދަތު ހަމަވާ ތާރީހުން ފެށިގެންނެވެ.
