ރިޔާސީ އިންތިހާބުގެ ދެ ވަނަ ބުރުގައި ވޯޓުލުމަށް މިހާތަނަށް 25،000 އަށް ވުރެ ގިނަ މީހުން ރީ-ރެޖިސްޓަވުމަށް ހުށަހަޅާފައިވާ ކަމަށް އިލެކްޝަންސް ކޮމިޝަނުން ބުނެފި އެވެ.
އެ ކޮމިޝަންގެ ނައިބު ރައީސް އިސްމާއީލް ހަބީބު މިއަދު ވިދާޅުވީ އިއްޔެ ނިޔަލަށް ޖުމުލަ 25،493 މީހުން ރީ-ރެޖިސްޓަ ވުމަށް ފޯމް ހުށަހަޅާފައިވާ ކަމަށެވެ. އެއީ ފުރަތަމަ ދުވަހު 9،206 މީހުން، ދެ ވަނަ ދުވަހު 16،287 މީހުންނެވެ. އެ ދެ ދުވަސްތެރޭގައި އޮންލައިންކޮށް ޖުމުލަ 18،349 މީހުން ހުށަހަޅާފައިވެ އެވެ.
ހަބީބު ވިދާޅުވީ ސެޕްޓެމްބަރު 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ވޯޓުލުމަށް ރީ-ރެޖިސްޓަވުމަށް އިތުރު ފުރުސަތެއް ހުޅުވާނުލެވޭނެ ކަމަށެވެ. ރީ-ރެޖިސްޓަކުރުމުގެ މުއްދަތު ހަމަވާނީ މިއަދު 4:00 ގަ އެވެ.
"ވަގުތެއް ވެސް އިތުރުކޮށް ނުދެވޭނެ،" އޭނާ ވިދާޅުވި އެވެ.
ދެ ވަނަ ބުރުގައި ވޯޓުލުމަށް ރީ-ރެޖިސްޓަ ވުމަށް ހުށަހެޅި ފަރާތްތަކުގެ ތެރެއިން މިހާތަނަށް 10،271 މީހުން ރީ-ރެޖިސްޓަ ކޮށްދެވިފައިވާ ކަމަށް ވެސް ހަބީބު ވިދާޅުވި އެވެ.
"ރީ-ރަޖިސްޓްރީ ކުރަން، ދެވަނަ ބުރުގައި ހުށަހެޅި ފޯމުތަކުން، އެކިއެކި ސަބަބުތަކާ ހުރެ، މިހާތަނަށް 1546 ފޯމު ރިޖެކްޓް ވެފައިވޭ. ފޯމުތައް ރިޖެކްޓް ވަނީ، ހުށަހަޅަންޖެހޭ ހުރިހާ މައުލޫމާތު ފުރިހަމަ ނުވާތީ،" ހަބީބު ވިދާޅުވި އެވެ.
"އޮންލައިންކޮށް ހުށަހަޅާފައިވާ ފޯމުތަކުން، ޕެންޑިން ކަމަށް ދައްކަނީ، އެ ފޯމުތަކުގެ ވެރިފިކޭޝަން މަރުހަލާ މުޅިން ނުނިމޭތީ. ފޯމުތަކުގެ ސައްހަކަން ކަށަވަރުވިހާ އަވަހަކަށް، ރީ-ރަޖިސްޓަރީ ކުރެވުނުކަމުގެ މެސެޖު ލިބޭނެ."
"ވަރަށް ގިނަ ފޯމްތައް ލިބެމުންދާތީ ޕްރޯސަސްކުރުމަށް ވެސް ވަގުތު ނަގަމުންދާތީ ޕެންޑިން އަރާފައި އެވަނީ."
ވޯޓުލުމަށް ރީ-ރެޖިސްޓަކުރި ފަރާތްތަކާއި ނުރާ ފަރާތްތަކުން ވެސް އެ މީހާ ވޯޓުލާ މަރުކަޒު ޗެކުކުރުމަށް ހަބީބު އިލްތިމާސް ކުރެއްވެވި އެވެ.
