ރާއްޖޭން އިނގިރޭސިވިލާތަށާއި ޔޫރަޕަށް އެކްސްޕޯޓުކުރާ މަހުން ނަގާ ޑިއުޓީ ކަނޑާލާނެކަން ކަށަވަރުވުމާ އެކު މިއަދުން ފެށިގެން ސަރުކާރުގެ މަސް ކުންފުނި މިފްކޯއިން މަސް ގަންނަ އަގު 25ރ. އަށް ބޮޑުކުރުމަށް ނިންމި ކަމަށް ރިޕޯޓުކުރި އެވެ.

އެ ކުންފުނިން މިހާރު މަސް ގަންނަމުން އަންނަނީ ކިލޯއެއް 17ރ. ގެ ރޭޓުންނެވެ. ނަމަވެސް, ޔޫރަޕަށް އެކްސްޕޯޓުކުރާ މަހުން ނަގާ ޑިއުޓީ ކަނޑާލާނެކަން ސަރުކާރަށް ވަނީ ކަށަވަރު ކުރެވިފަ އެވެ. އެއާއެކު, މަހުގެ އަގުބޮޑުކުރަން ނިންމީ ކަމަށް މިފްކޯއިން މައުލޫމާތު ދެ އެވެ.

މަސް ގަންނަ އަގު ބޮޑުކުރަން ނިންމީ ގިނަ މަސްވެރިންތަކެއްގެ ކަންބޮޑުވުންތަކަށް އަޑުއެހުމަށް ފަހު ކަމަށް މިފްކޯއިން މައުލޫމާތު ދެ އެވެ.

މިފްކޯއިން މިހާރު ވެސް ދަނީ މަސްވެރިކަމުގައި ހުރި ޒަމާންވީ މައްސަލަތައް ހައްލުކޮށް މަސް ގަންނަ ކެޕޭސިޓީ އިތުރުކުރުމުގެ މަސައްކަތް ކުރަމުންނެވެ.

މަހުގެ އަގު ބޮޑު ކުރުމަށް ސަރުކާރުން ނިންމިއިރު އިންތިހާބަށް ހުށަހެޅި މެނިފެސްޓޯގައި އެމްޑީޕީން ވަނީ މަސްވެރިކަމަށް ހާއްސަ މިނިސްޓްރީއެއް އުފައްދާނެ ކަމަށް ބުނެފަ އެވެ.

މަސްވެރިކަމުގެ ދާއިރާއަށް އެމްޑީޕީން ހުށަހަޅާ ކަންކަމުގެ ތެރޭގައި ސްކޫލު ދައުރުން ފެށިގެން މަސްވެރިކަމަށް ކުދިން އަހުލުވެރި ކުރަން ފެށުމާއި މަސްވެރިންނަށް ދިމާޥާ ހާދިސާތަކުން ލިބޭ ގެއްލުންތަކުންނާއި ސިއްހީ ގޮތުން ދިމާވެދާނެ ކަންކަމުން އަރައިގަންނަން އެހީވެދޭނެ ހާއްސަ އިންޝުއަރެންސެއް ތައާރަފުކުރުން ހިމެނެ އެވެ.

އޭގެ އިތުރުން މަސްވެރިކަމުގެ ވިޔަފާރި ކުރިއެރުވުމަށާއި މަސް ދޯނި ފަހަރު ތަރައްގީކުރުމަށް ފަސޭހައިން ފައިސާ ހަމަޖެހޭނެ ގޮތްތަކަށް ތައާރަފުކުރަން ވެސް އެ ޕާޓީގެ މެނިފެސްޓޯގައި ވެ އެވެ. އޭގެ ތެރޭގައި ދިވެހި މަސްއޮޑި ފަހަރު ޒާމާނީ ފެންވަރަށް ގެންނަން ފަރުމާކޮށްފައިވާ ފިފްތު-ޖެނެރޭޝަން މަސް ދޯނި ފަހަރު ބަނުމަށް ލޯން ސްކީމް ތައާރަފްކުރުން ހިމެނެ އެވެ.

އެމްޑީޕީން މަސްވެރިކަމުގެ ދާއިރާއަށް ހުށަހަޅާފައިވާ އިތުރު ކަންކަމުގެ ތެރޭގައި ހިމެނެނީ:

ކަސްޓަމްސް އިން ލިބޭ އާމްދަނީގެ އިންސައްތައެއް މަސްވެރިކަން މާކެޓް ކުރުމަށްޓަކައި ބޭނުންކުރުން

• މަސްވެރިކަން "އެޑްވެންޗަރ ސްޕޯޓް" އެއްގެ ގޮތުގައި ޕްރޮމޯޓްކުރުން
• ދިވެހި މަސްވެރިކަމުގެ ދެމެހެއްޓެނިވިކަން ރަމްޒުކޮށްދޭ ލޭބަލެއް ހަދާ، ބޭރުގެ ސަޕްލަޔަރުން ބަލައިގަންނަ ބްރޭންޑިންއެއް ތައާރަފްކުރުން
• މެރިކަލްޗާ އަދި އެކުއަކަލްޗާއަށް ޕްރައިވެޓް ސެކްޓާ އިންވެސްޓްކުރުމުގެ އައު ފުރުސަތުތައް ހުޅުވައިދިނުން

އެމްޑީޕީގެ މެނިފެސްޓޯގައި ޔޫރަޕާއި އިނގިރޭސިވިލާތަށް ރާއްޖެއިން ބޭރުކުރާ މަހުން ނަގާ ޑިއުޓީ ކަނޑާލުން ވެސް ހިމަނާފައި ވެ އެވެ.

މުހިންމު ބައެއް ހަބަރު