އެއްފަހަރާ ހުށަހަޅާ ގިނަ އަދަދެއްގެ ރީ ރަޖިސްޓްރޭޝަން ފޯމުތަކުގެ ސައްހަކަން ކަށަވަރު ކުރުމަށް އިލެކްޝަންސް ކޮމިޝަނުން ފޯނު ކުރަމުންދާނެ ކަމަށް އެ ކޮމިޝަނުން މިރޭ ބުނެފި އެވެ.
އެ ކޮމިޝަނުގެ ސްޕޯކްސްޕާސަން އަދި ނައިބު ރައީސް އިސްމާއިލް ހަބީބު ވިދާޅުވީ، ކޮމިޝަނުން ގުޅާނީ ފޯމު ހުށަހެޅި ފަރާތަށް ކަމަށާއި ގުޅާނީ އެ ކޮމިޝަނުގެ ނަމްބަރަކުން ކަމަށެވެ.
"ރިޔާސީ އިންތިހާބު 2023 ގެ ދެވަނަބުރުގެ ރީ-ރެޖިސްޓަރ ކުރުމަށް، ގިނަ އަދަދެއްގެ ފޯމު ހުށަހަޅާ ފަރާތްތަކުން، ގެންނަ ފޯމުގެ ސައްހަކަން ކަށަވަރު ކުރުމުގެ ގޮތުން، އިލެކްޝަންސް ކޮމިޝަންގެ ފޯނު ނަންބަރަކުން، ފޯމު ހުށަހަޅާ ފަރާތްތަކަށް ގުޅާނެ ވާހަކަ ދަންނަވަން،" ހަބީބު މިރޭ ކުރެއްވި ޓުވީޓެއްގައި ވިދާޅުވި އެވެ.
ހަބީބު ވިދާޅުވީ ސައްހަ ނޫން ފޯމެއް އެއްވެސް މީހަކު ހުށަހަޅައިފި ނަމަ އެމީހަކަށް އެ ކޮމިޝަނުން ފިޔަވަޅު އަޅާނެ ކަމަށެވެ.
"އިލެކްޝަންސް ކޮމިޝަނުން އެދެނީ، އެއްވެސް މީހެއްގެ ވޯޓުލުމުގެ ހައްގަށް އެއްވެސް ފަރާތަކުން ހުރަސް ނޭޅުމަށް،" ހަބީބު ވިދާޅުވި އެވެ.
ރިޔާސީ އިންތިހާބުގެ ފުރަތަމަ ބުރު މިދިޔަ ހޮނިހިރު ދުވަހު ބޭއްވިއިރު ދެ ވަނަ ބުރު ބާއްވަނީ ސެޕްޓެމްބަރު 30، ގަ އެވެ. ފުރަތަމަ ބުރުގައި 46 ޕަސެންޓު ވޯދު ހޯދައިގެން ކުރި ހޯއްދެވީ އިދިކޮޅު ކެންޑިޑޭޓު ޑރ. މުހައްމަދު މުއިއްޒެވެ. ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 39 ޕަސެންޓެވެ.
