އިއްޔެ ބޭއްވި ރިޔާސީ އިންތިހާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 އިންސައްތައަށް ވުރެ ގިނަ ވޯޓު ނުލިބޭތީ، އެންމެ ގިނަ ވޯޓު ލިބުނު ދެ ކެންޑިޑޭޓުންގެ މެދުގައި ބާއްވާ ދެ ވަނަ ބުރަށް ރީރަޖިސްޓްރީ ކުރަން ފުރުސަތު ހުޅުވާލާނެ ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު މިއަދު ކުރެއްވި ޓުވީޓެއްގައި ވިދާޅުވީ ދެ ވަނަ ބުރުގައި ރީރަޖިސްޓްރީކުރަން ހުޅުވާލާނީ ފުރަތަމަ ބުރުގައި ވޯޓުލީ ތަން ނޫން އެހެން ތަނެއްގައި، ދެ ވަނަ ބުރުގައި ވޯޓުލާން ބޭނުންވާ މީހުންނަށް ކަމަށެވެ.
"އެ ފުރުސަތު އިލެކްޝަންސް ކޮމިޝަނުން ވަރަށް އަވަހަށް ހުޅުވާލައި، އެ ކަން އާންމުކޮށް އިއުލާން ކުރާނެ،" ހަބީބު ލިޔުއްވާފައިވެ އެވެ.
ޓުވިޓާގައި އާންމު މީހަކު ކުރި ސުވާލަކާ ގުޅިގެން، ކޮމިޝަންގެ ރައީސް ފުއާދު ތައުފީގު ވެސް ވިދާޅުވީ ދެ ދުވަހުގެ މުއްދަތެއް ހުޅުވާލާނެ ކަމަށް ކޮމިޝަނުން މަޝްވަރާކުރަމުންދާ ކަމަށެވެ.
މި ވަގުތަށް ވިސްނާފައިވަނީ ސެޕްޓެމްބަރު 16،17 ހުޅުވާލަން،" ފުއާދު ވިދާޅުވި އެވެ.
މި އަހަރުގެ ރިޔާސީ އިންތިހާބުގެ ދެ ވަނަ ބުރު އޮންނާނީ ސެޕްޓެމްބަރު 30 ގަ އެވެ.
ރިޔާސީ އިންތިހާބުގެ ފުރަތަމަ ބުރުގައި އެންމެ ގިނަ ވޯޓު ހޯއްދެވީ އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒެވެ. ވަގުތީ ނަތީޖާ ދައްކާ ގޮތުން 100،691 ވޯޓު އޭނާ ހޯއްދެވިއިރު އެއީ ވޯޓުލީ މީހުންގެ 45.1 ޕަސެންޓެވެ. ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 85،260 ވޯޓެވެ. އެއީ ވޯޓުލީ މީހުންގެ 38.2 ޕަސެންޓެވެ.
އެހެންކަމުން ދެ ވަނަ ބުރުގައި ވާދަކުރައްވަނީ މާލޭގެ މޭޔަރަކަށް މިހާރު ހުންނެވި މުއިއްޒާއި ރައީސް ސޯލިހެވެ.
އިންތިހާބުގައި ތިންވަނައަށް އެންމެ ގިނަ ވޯޓު ލިބިވަޑައިގަތީ އެމްޑީޕީން ވަކިވި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ސަޕޯޓަރުން އުފެއްދި ޑިމޮކްރެޓްސްގެ ކެންޑިޑޭޓު އިލްޔާސް ލަބީބަށެވެ. އިލްޔާސަށް 15،528 ވޯޓު ލިބިވަޑައިގަތް އިރު އެއީ ވޯޓުލީ މީހުންގެ ހަތް އިންސައްތަ އެވެ.
ރިޔާސީ އިންތިހާބުގެ ފުރަތަމަ ބުރަށް ފަހު މީގެ ކުރިން ވެސް ދެން ހިނގާ އެއް ކަމަކީ، ފުރަތަމަ ބުރުގައި ތިންވަނައާއި ހަތަރުވަނަ ހޯދާ ކެންޑިޑޭޓު ނުވަތަ ޕާޓީއަކާ އެކު ކޯލިޝަން ހެދުމަށް ދެވަނަ ބުރުގައި ވާދަކުރާ ޕާޓީތަކުން މަސައްކަތް ކުރާނެ ކަމެވެ.
އިންތިހާބުގެ ފުރަތަމަ ބުރުގައި ވޯޓު ދިނުމުގެ ހައްގު 282,395 މީހުންނަށް ލިބޭއިރު ވޯޓުލީ ގާތްގަނޑަކަށް 78 އިންސައްތަ އެވެ. މިއީ 2008 ގައި ފެހި ގާނޫނު އަސާސީގެ ދަށުން މަލްޓި ޕާޓީ ޑިމޮކްރެސީގެ އަސާސްތަކާއެކު ރިޔާސީ އިންތިހާބު ބާއްވަން ފެށި ފަހުން ވޯޓުލީ މީހުންގެ ނިސްބަތް އެންމެ ދަށް ފަހަރެވެ.
