މިއަދު ކުރިއަށްދާ ރިޔާސީ އިންތިހާބުގައި ވޯޓުލާ މަރުކަޒުތަކުގެ ތެރެއިން ކިޔުތައް ދިގު ވޯޓު ފޮށިތަކުގެ ވޯޓުލުމުގެ ކަންކަން އަވަސްކުރަން އިތުރު އޮފިޝަލުން ފޮނުވަން ރާވާފައިވަ ކަަމަށް އިލެކްޝަންސް ކޮމިޝަނުން ބުނެފި އެވެ.
އިންތިހާބާ ގުޅޭގޮތުން ނޫސްވެރިންނަށް މައުލޫމާތުދެމުން އީސީގެ ނައިބު ރައީސް އިސްމާއިލް ހަބީބް ވިދާޅުވީ ވޯޓުލާ މަރުކަޒުތަކުގެ ބޭރުގައި ކިޔުތައް ދިގު ކަމުގެ ޝަކުވާ ލިބޭ މިންވަރު އިތުރު ކަމަށާއި އެފަދަ ފޮށިތައް ފާހަގަކޮށް ވޯޓުލުމުގެ ކަންތައްތައް އަވަސްކުރުމަށް އިތުރު އޮފިޝަލުން މިހާރު ފޮނުވާފައިވާ ކަމަށެވެ.
ހަބީބު ވިދާޅުވީ މިއަދު މެންދުރު 12:00 ހަމަޔަށް ވޯޓުލީ، ވޯޓުުލުމުގެ ހައްގު ލިބިފައިވާ މީހުންގެ 46 ޕަސެންޓު ކަމަށެވެ. އަދި މެންދުރު ފަހު ވޯޓުލާން ނުކުންނަ މީހުން އިތުރުވެ ކިޔުތައް ދިގުވެދާނެތީ އެކަމަށް އީސީން ތައްޔާރަށް އޮތް ކަމަށް ހަބީބު ވިދާޅުވި އެވެ. އެގޮތުން ކިޔު ނެތް ފޮށިތައް ކައިރީގައި ހަރަކާތްތެރިވާ ބައެއް އޮފިޝަލުން ކިޔުތައް ދިގު ފޮށިތަކަށް ފޮނުވަން ރާވާފައިވާ ކަމަށް ވިދާޅުވި އެވެ.
"އެގޮތައް ފާހަގަކުރެވުުނު ހަތަރު ފަސް ތަނަކަށް ވާނީ އޮފިޝަލުން ފޮނުވާފަ މަސައްކަތް އަވަސްކުރަން. އަދިވެސް ބަލާފަ އިތުރު އޮފިޝަލުން ބޭނުންވާ ތަންތަނަށް ފޮނުވާނަން،" ހަބީބް ވިދާޅުވި އެވެ.
ރިޔާސީ އިންތިހާބުގެ ވޯޓުުލުން މިއަދު ހެދުނު 8:00 އިން ފަށައިގެން ކުރިއަށްދާއިރު މާލޭގެ ބައެއް ވޯޓިން ސްޓޭޝަންތަކުގައި ދިގު ކިޔުތައް ހަދާފައިވާކަން ފާހަގަކުރެވެ އެވެ. ކިޔު ދިގުވުމުގެ ސަަބަބުން ވޯޓުލާން ދާ މީހުން ގިނައިރު ތިބެންޖެހެނީ ކޮޅަށެވެ.
ކުރީގެ އިންތިހާބުތަކަށް ބަލައި މި އިންތިހާބުގެ ވޯޓުލުމުގެ ޕްރޮސެސް އަވަސްކުރުމަށް ޓަކައި އީސީން ވަނީ އެއް ފޮއްޓަށް ވޯޓުލާ މީހުންގެ އަދަދުވެސް މަދުކޮށްފަ އެވެ. އެގޮތުން ކުރީގެ އިންތިހާބުތަކުގައި އެއް ފޮއްޓަށް 1200 މީހުން ވޯޓުލެވޭ ގޮތައް ހަދާފައިވީ ނަމަވެސް މިފަހަރު އެއް ފޮށްޓަށް އެންމެ ގިނަވެގެން ވޯޓުލާނީ 750 މީހުން ކަމަށް އީސީން ބުންޏެވެ.
މިއަދުގެ އިންތިހާބުގައި ޖުމްލަ އަށް ބޭފުޅަކު ވާދަކުރައްވަ އެވެ. އެއީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހު، ޕީއެންސީގެ ކެންޑިޑޭޓް ޑރ.މުހައްމަދު މުއިއްޒު، ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމް، ޑިމޮކްރެޓްސްގެ ކެންޑިޑޭޓް އިލްޔާސް ލަބީބް، އެމްއެންޕީގެ ކެންޑިޑޭޓް މުހައްމަދު ނާޒިމު އަދި އަމިއްލަ ގޮތުން ވާދަކުރައްވާ އުމަރު ނަސީރު، ފާރިސް މައުމޫނު އަދި ހަސަން ޒަމީލެވެ.
