ބައެއް ރަށްރަށުގައި ހިނގާފައިވާ ކުދިކުދި ހާދިސާތައް ފިޔަވައި މިއަދު މުޅި ރާއްޖޭގައި ވެސް ރިޔާސީ އިންތިހާބުގެ ވޯޓުލުން ކުރިއަށްދަނީ އަމާންކޮށް ކަމަށް އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބު ވިދާޅުވެއްޖެ އެވެ.
އިލެކްޝަންސް ކޮމިޝަނުން މިއަދު މެންދުރު ބޭއްވި ނޫސްވެރިންގެ ބައްދަލުވުމުގައި، ހަބީބު ވަނީ މިހާތަނަށް ވޯތުލާ މަރުކަޒުތަކުގައި ހިނގި ބައެއް ހާދިސާތައް ހިއްސާކޮށްފަ އެވެ. އޭނާ ވިދާޅުވި ގޮތުގައި، އެ ކުދިކުދި ހާދިސާތައް ފިޔަވައި ވޯޓުލުން ކުރިއަށްދަނީ އޮމާންކޮށެވެ.
"މިއަދު ވޯޓުލުން ފެށިގެންދާއިރު ހަމަ ރަނގަޅަށް އަމާންކަމާއި އޮމާންކަމާއެކު ކުރިއަށްއެބަދޭ. އެހެންނަމަވެސް، ބައެއް ތަންތަނުގައި ބައެއް ކުދިކުދި ހާދިސާތައް އެބަ ހުރި ހިނގާފައި،" ހަބީބު ވިދާޅުވި އެވެ.
މިއަދުގެ އިންތިހާބުގައި ހަމަނުޖެހުމެއް ހިނގައިދިޔަ އެއް ރަށަކީ ރަސްދޫ އެވެ. ހަބީބު ވިދާޅުވިގޮތުގައި އެރަށުގައި އެ ހާދިސާ ހިނގީ ދެ ވޯޓު ފޮށްޓެއް ކައިރީގައި ތިބި އޮބްޒާވަރުން އިގުރާރާ ހިލާފުވުމުންނެވެ. އިގުރާރާ ހިލާފުވި ކަމަށް ދެ ބޭފުޅުން ވެސް އެއްބަސްވާ ކަމަށް ވެސް އޭނާ ވިދާޅުވި އެވެ. އެހެންނަމަވެސް، އެ މައްސަލަ ހައްލުކޮށް މިހާރު ރަސްދޫގައި ވޯޓުލުން ކުރިއަށް އެބަގެންދެ އެވެ.
ތުޅާދޫގައި ވެސް ވޯޓުލާން އައި މީހަކު ވޯޓު ކަރުދާހުގެ ފޮޓޯ ނެގި ކަމުގެ މައުލޫމާތު ލިބިގެން އެކަން އޮފިޝަލުން ބަލާފައި ވަރަށް އަވަހަށް އެ ރަށުގައި ވެސް ވޯޓުލުމުގެ ކަންކަން ފެެށިގެން ކުރިއަށްދާނެ ކަމަށް އޭނާ ވިދާޅުވި އެވެެ.
އޭގެ އިތުރުން، ކ. ގުރައިދޫގައި ހާއްސަ އެހީއަށް ބޭނުންވާ މީހަކަށް ވޯޓު ނުލެވުނު މައްސަލައެއް ފެންމަތިވެފައިވާ ކަމަށް އޭނާ ވިދާޅުވި އެވެ. އެކަމާ ގުޅިގެން ހަބީބު ވިދާޅުވީ، ވޯޓުލާން ރަޖިސްޓްރީކޮށްފައި ތިބި އެންމެންނަށް ވޯޓުލެވޭނެ ކަމަށެވެ.
ވޯޓުލާ މަރުކަޒުތަކުން ދިމާވާ ބައެއް މީހުން، ވޯޓިން ބޫތުތައް ބަހައްޓާފައި ހުންނަ ތަނާ މެދު ކަންބޮޑުވުންފާޅުކުރާ ކަމަށް ވެސް ހަބީބު ވިދާޅުވި އެވެ.
އެގޮތުން، މީހަކު ވޯޓުލާގޮތް ފެންނަ ގޮތަށް ފޮޓޯ ނެގުމަށްފަހު ބޫތުތައް ހުންނަ ގޮތުން ވޯޓުލާތަން ފެންނަ ކަމަށް ނޫސްވެރިއަކު ބުނި ކަމަށް ވެސް ހަބީބު ވިދާޅުވި އެވެ. ހަބީބު ފާހަގަކުރެއްވީ އެގޮތަށް ފޮޓޯ ނެގުމަކީ ޖިނާއީ ކުށެއް ކަމެވެ.
މި އިންތިހާބުގައި ވޯޓިންގ ބޫތުތައް ބަހައްޓާފައި ހުރީ އިންތިހާބާ ބެހޭ ގައުމީ ލަފާދޭ ކޮމިޓީގެ ލަފައާ އެއްގޮތަށެވެ. އެގޮތަށް ވޯޓު ފޮށި ބެހެއްޓީ ވޯޓު ކަރުދާހުގެ ފޮޓޯ ނެގުން ފަދަ ކަންކަން ކުރުމުގެ ފުރުސަތު ހަނިކުރުމުގެ ގޮތުންނެވެ.
މިފަހަރުގެ އިންތިހާބުގައި ވޯޓުލުމުގެ ހައްގު ލިބެނީ 282،395 މީހަކަށެވެ. ޖުމްލަ 574 ވޯޓުފޮށި ބެހެއްޓުމަށް ކޮމިޝަނުން ވަނީ ނިންމާފަ އެވެ. އޭގެ ތެރޭގައި ހިމެނެނީ، މާލެ ސަރަހައްދުގައި ބެހެއްޓޭ 176 ފޮއްޓާއި އަތޮޅު ތެރޭގައި ބެހެއްޓޭ 319 ފޮށިީގެ އިތުރުން، ރިސޯޓުތަކުގައި 65 ފޮށި، ރާއްޖެއިން ބޭރުގައި އަށް ފޮށި، އަދި ޖަލުތަކާއި ސިނާއި ރަށްރަށުގައި ހަ ފޮއްޓެވެ.
