މިއަދު ކުރިއަށްދާ ރިޔާސީ އިންތިހާބުގައި މިވަގުތާ ހަމައަށް ވޯޓުލާ މީހުންގެ ތެރެއިން 46 ޕަސެންޓު މީހުން ވޯޓުލާފައިވާ ކަމަށް އިލެކްޝަންސް ކޮމިޝަން (އީސީ) ގެ ތަފާސްހިސާބުތަކުން ދައްކައިފި އެވެ.
އެ ކޮމިޝަނުން ހާމަކޮށްފައިވާ ތަފާސްހިސާބުތަކުން ދައްކާ ގޮތުގައި 129,975 މީހުން ވޯޓުލާފައިވާ ކަމަށެވެ. އެއީ ވޯޓުލުމުގެ ހައްގު ލިބިފައިވާ މީހުންގެ 46.03 ޕަސެންޓެވެ. އޭގެ ތެރެއިން 23.63 ޕަސެންޓު މީހުންނަކީ ފިރިހެނުންނެވެ. އަދި, އަންހެނުންގެ ނިސްބަތަކީ 22.41 ޕަސެންޓެވެ.
"މާލޭގެ ވޯޓުލާ ބައެއް މަޒުކަޒުތަކަށް އަޅުގަނޑުމެން ޒިޔާރަތްކުރިން. ކުރި އިރު ހުރިހާ މަރުކަޒުތައް ވެސް ހަމަ މީހުން ފުރިފައި އޮތީ. ކިއުގައި ވެސް ހަމަ ވަރަށް ގިނަ އަދަދަކަށް މީހުން ތިބި ހެނދުނު ހެނދުނާ،" މިއަދު ބޭއްވި ނޫސްވެރިންގެ ބައްދަލުވުމެއްގައި އީސީގެ ނައިބު ރައީސް އިސްމާއީލް ހަބީބު ވިދާޅުވި އެވެ.
ހަބީބު ވިދާޅުވީ ކިއުގައި މީހުން ތިބެން ޖެހޭ ވަގުތު ގިނަ ވެގެން ޝަކުވާ އައުމުން އިތުރު އޮފިޝަލުން މަރުކަޒުތަކަށް ފޮނުވާފައިވާ ކަަމަށެވެ. އެހެންވެ ވޯޓުލުމުގެ ޕްރޮސެސް މެންދުރުފަހުން އަވަސްވާނެ ކަަމަށް ވެސް އޭނާ ވިދާޅުވި އެވެ.
ވޯޓުލުމުގެ ޕްރޮސެސް އަވަސްކުރުމަށް ޓަކައި އީސީން ވަނީ އެއް ފޮއްޓަށް ވޯޓުލާ މީހުންގެ އަދަދު މީގެ ކުރިން ބޭއްވި އިންތިހާބުތަކަށް ވުރެ މަދުކޮށްފައިވާ ކަމަށެވެ. ކުރީގެ އިންތިހާބުތަކުގައި އެއް ފޮއްޓަށް 1200 މީހުން ވޯޓު ލި ކަަމަށާއި މިފަހަރު އެއް ފޮށްޓަށް އެންމެ ގިނަވެގެން ވޯޓުލާނީ 750 މީހުން ކަމަށް އޭނާ ވިދާޅުވި އެވެ.
ބައެއް މަރުކަޒުތަކުގައި ކުދިކުދި ހާދިސާތައް ހިނގި ނަމަވެސް، ވޯޓުލުން ކުރިއަށް ދަނީ އަމާންކަމާ އެކުގައި ކަމަށް ވެސް ހަބީބް ވިދާޅުވި އެވެ.
