މާދަމާ ބާއްވާ މި އަހަރުގެ ރިޔާސީ އިންތިހާބަށް އިލެކްޝަންސް ކޮމިޝަން އޮތީ ފުރިހަމައަށް ތައްޔާރަށް ކަމަށާއި، ކެންޑިޑޭޓުންގެ ކެމްޕޭނުތައް ނިންމުމަށް މިއަދު ހަވީރު މާލޭގައި ބާއްވާ ހަރަކާތްތައް ސުލްހަވެރިކޮށް ކުރިއަށް ގެންދިޔުމަށް އެ ކޮމިޝަނުން ގޮވާލައިފި އެވެ.
އިންތިހާބުގެ އެންމެ ފަހުގެ ތައްޔާރީތަކާ ގުޅޭ މައުލޫމާތު "އަދަދު" އަށް ދެއްވަމުން އީސީގެ ރައީސް އިސްމާއިލް ހަބީބު ވިދާޅުވީ، އިއްޔެ އާއި މިއަދު ވޯޓުފޮށި ބަހައްޓާ ރިސޯޓުތަކަށް އޮފިޝަލުން ފޮނުވުމުގެ މަސައްކަތް ނިމިފައިވާ ކަމަށެވެ.
އިންތިހާބުގެ ކަންކަން ބެލުމަށް ބޭރުގެ ގައުމުތަކާއި ޖަމާއަތްތަކުން ޒިޔާރަތްކުރި ފަރާތްތަކަށް ރޭ މައުލޫމާތު ދެވިފައިވާނެ ކަމަށާއި އެ ފަރާތްތައް އަތޮޅުތަކަށް ފުރުން މިހާރު ކުރިއަށްދާ ކަމަށް ހަބީބު ވިދާޅުވި އެވެ.
އޭގެ އިތުރުން އެންމެ މުހިންމު ކަމެއްގެ ގޮތުގައި ހަބީބު ވަނީ މިއަދު ހަވީރުގެ ހަރަކާތްތައް ސުލްހަވެރިކޮށް ކުރިއަށް ގެންގޮސްދިނުމަށް ކެންޑިޑޭޓުން އަދި ޕާޓީތަކުގައި އެދިލައްވާފަ އެވެ.
"މިއަދު ހަވީރު މާލޭގައި ހުރިހާ ކެންޑިޑޭޓުންހެން އެބަ ކުރިއަށް ގެންދޭ ކެމްޕޭން ނިންމާ ހަރަކާތެއް. އަޅުގަނޑުމެން އެދެނީ ހުރިހާ ޕާޓީތަކުން ވެސް، ކެންޑިޑޭޓުން ވެސް ސުލްހަވެރިކޮށް އެކަންކަން ކުރިއަށް ގެންދިޔުމަށް،" ހަބީބު ވިދާޅުވި އެވެ.
މި އަހަރުގެ ރިޔާސީ އިންތިހާބުގެ ފުރަތަމަ ބުރުގެ ވޯޓުލުން އޮންނާނީ މާދަމާ އެވެ. ދެ ވަނަ ބުރަކަށް ގޮސްފި ނަމަ އެ އިންތިހާބު ބާއްވާނެ ތާރީހެއްގެ ގޮތުގައި ކަނޑައަޅާފައިވަނީ ސެޕްޓެމްބަރު 30، އެވެ. މި ފަހަރުގެ އިންތިހާބުގައި ވޯޓުލުމުގެ ހައްގު ލިބޭ މީހުންގެ އަދަދު 282،000 އަށް އަރަ އެވެ.
ރިޔާސީ އިންތިހާބުގައި މިފަހަރު ޖުމްލަ 574 ވޯޓުފޮށި ބެހެއްޓުމަށް ކޮމޝަނުން ވަނީ ނިންމާފަ އެވެ. އޭގެ ތެރޭގައި ހިމެނެނީ، މާލެ ސަރަހައްދުގައި ބެހެއްޓޭ 176 ފޮއްޓާއި އަތޮޅު ތެރޭގައި ބެހެއްޓޭ 319 ފޮށިީގެ އިތުރުން، ރިސޯޓުތަކުގައި 65 ފޮށި، ރާއްޖެއިން ބޭރުގައި އަށް ފޮށި، އަދި ޖަލުތަކާއި ސިނާއި ރަށްރަށުގައި ހަ ފޮއްޓެވެ.
މި އަހަރުގެ ރިޔާސީ އިންތިހާބުގައި އެމްޑީޕީގެ ރައީސް ސޯލިހުގެ އިތުރުން ސިޔާސީ ޕާޓީތަކުން ވާދަ ކުރައްވަނީ ޕީޕީއެމް ޕީއެންސީގެ މުހައްމަދު މުއިއްޒާއި ޖުމްހޫރީ ޕާޓީގެ ގާސިމް އިބްރާހިމާއި ޑިމޮކްރެޓްސްގެ އިލްޔާސް ލަބީބާއި އެމްއެންޕީގެ މުހައްމަދު ނާޒިމެވެ. އޭގެ އިތުރުން، ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި ކުރީގެ ހޯމް މިނިސްޓަރު އުމަރު ނަސީރާއި ހަސަން ޒަމީލް އަމިއްލަ ގޮތުން ވާދަކުރައްވަ އެވެ.
ރިޔާސީ އިންތިހާބު ކާމިޔާބު ކުރެވެނީ ވޯޓުލީ މީހުންގެ 50 ޕސެންޓުގެ އިތުރުން އެއް ވޯޓު ލިބިގެނެވެ. އެ ވަރަށް އެއްވެސް ކެންޑިޑޭޓަކަށް ވޯޓު ނުލިބޭނަަމަ، ފުރަތަމަ ބުރުގައި އެންމެ ގިނަ ވޯޓު ލިބުނު ދެ ކެންޑިޑޭޓުންގެ މެދުގައި ދެވަނަ ބުރެއް ބާއްވަން ޖެހެ އެވެ.
