އިގްތިސާދީ އަދި އިޖުތިމާއީ ގޮތުން ކަނބަލުން ބާރުވެރިކޮށް ކުރިއެރުވުމުގެ ގިނަ ވައުދުތަކަކާއެކު ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ މެނިފެސްޓޯ މިރޭ ލޯންޗުކޮށްފި އެވެ.
ރިޔާސީ އިންތިހާބަށް މުއިއްޒު ހުށަހަޅާ "ދިވެހީންގެ ރާއްޖެ ކަނބަލުންނަށް" މެނިފެސްޓޯ ލޯންޗުކުރީ މިރޭ އާޓިފިޝަލް ބީޗުގައި ބޭއްވި ހާއްސަ ކެމްޕެއިން ހަރަކާތުގަ އެވެ. މި ހަރަކާތުގައި ކުރީގެ ރައީސް އަބްދުﷲ ޔާމީންގެ އަނބިކަބަލުން ފާތުމަތު އިބްރާހިމް ވެސް ބައިވެރިވެވަޑައިގެންނެވި އެވެ.
މުއިއްޒުގެ "ދިވެހީންގެ ރާއްޖެ ކަނބަލުންނަށް" މެނިފެސްޓޯގައި ހިމަނާފައިވާ ފާހަގަކޮށްލެވޭ ބައެއް ކަންކަން;
- ސިވިލް ސާވިސްގެ ވެރިންގެ ލެވެލްގައި މަސައްކަތްކުރާ ކަނބަލުންގެ ނިސްބަތް އިތުރުކުރުން
- ހުރިހާ އަތޮޅު ހޮސްޕިޓަލެއްގައި މެމޯގްރަފީ އާއި އެކްސްރޭގެ ހިދުމަތް
- އަންހެނުންނަށް ހާއްސަ ހޮސްޕިޓަލެއް
- އެންޑޯމެޓްރިއޯސިސް އާއި ޕީސީއޯއެސްގެ ފަރުވާ އާސަންދައިން
- ރިސޯޓު މާހައުލު ކަނބަލުންނަށް ރައްކާތެރި ތަންތަނަށް ހެދުން
- އައިޓީ ދާއިރާގައި ހަރަކާތްތެރިވާ އަންހެނުން އިތުރުކުރުން
މީގެ އިތުރުންވެސް އެކަނިވެރި މައިންނާ އެކަނިވެރި ބަފައިންނަށް ދޭ އިނާޔަތް 12،000ރ އަށް ހަމަޔަށް ބޮޑުކޮށް ކޮންމެ ދަރިއަކަށް ދޭ މިންވަރު 3،000ރ އަށް އިތުރުކުރުމަށް ވަނީ ވައުުދު ވެފަ އެވެ.
އަދި, އަލަށް ފަށާ ސޯޝަލް ހައުސިން ސްކީމު ތަކުގައ ޒުވާން އާއިލާތަކަށް ހާއްސަ ދެ ކޮޓަރީގެ 3،000 ޕްލެޓާއި އެކަނިވެރި މައިންނާ އެކަނިވެރި ބަފައިންނަށް ހާއްސަ 1،000 ފްލެޓާއި އަންހެނުން ވިޔަފާރި ދާއިރާއަށް ނެރުމަށް ލުއިލޯނު ދޫކުރުމަށް އެއް ބިލިއަން ރުފިޔާގެ ސްކީމެއް ތައާރަފްކުރުމަށްވެސް މި މެނިފެސްޓޯގައި ވަނީ ވައުދުވެފަ އެވެ.
