އަންނަ ހޮނިހިރު ދުވަހު އޮންނަ ރިޔާސީ އިންތިހާބަށް ބޭނުންވާ އަދަދަށް އޮފިޝަލުން ހަމަވެފައިވާ ކަމަށާއި، އޮފިޝަލުން ތަމްރީނުކޮށް ވެސް ނިމިފައިވާކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
އީސީން ދަރުބާރުގޭގައި ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ ނައިބު ރައީސް އިސްމާއިލް ހަބީބް ވިދާޅުވީ އިންތިހާބަށް ބޭނުންވާ އޮފިޝަލުން ފައިނަލްވެފައިވާ ކަމަށެވެ.
"ވޯޓުލުމުގެ ކަންކަމުގަ ހަރަކާތްތެރިވާ އޮފިޝަލުންގެ ކަންކަމަށް ބަލާއިރު، މިހާރު މިހިރީ ހުރިހާ އޮފިޝަލުން ތަމްރީނުކޮށް ނިމިފަ. އަތޮޅުތަކުގެ އޮފިޝަލުން ވެސް ފައިނަލްކޮށް ނިމިފަ އޮތީ،" ހަބީބް ފާހަގަކުރެއްވި އެވެ.
އެގޮތުން މިދިޔަ އޮގަސްޓް 20، ވަނަ ދުވަހުން ފެށިގެން 27 ގެ ނިޔަލަށް އަތޮޅުތަކުގައި އޮފިޝަލުން ތަމްރީނުކުރުމުގެ މަސައްކަތް ކުރިއަސްގެންގޮސްފައިވާ ކަމަށް ހަބީބް ވިދާޅުވި އެވެ. އަދި, މާލޭގައި ވެސް އޮފިޝަލުން ތަމްރީނުކޮށް ނިމިފައިވާކަން ފާހަގަކުރެއްވި އެވެ.
އަދި ރިޒާވް ޕޫލަށް ބޭނުންވާ އޮފިޝަލުން ތަމްރީނުކުރުމުގެ އެއް ޓްރެއިނިން މާލޭގައި ބާއްވާނެ ކަމުގައި ހަބީބް ވިދާޅުވި އެވެ.
ހަބީބް އިތުރަށް ވިދާޅުވީ، ލިސްޓުތަކާއި ވޯޓު ކަރުދާސް ފަދަ އިންތިހާބަށް ބޭނުންވާ ހުރިހާ ތަކެތި ކ. އަތޮޅު ފިޔަވާ ރާއްޖޭގެ އެހެން ހުރިހާ އަތޮޅަކަށް ފޮނުވާ ނިމިއްޖެ ކަމަށެވެ. އަދި, އަންނަ ހޯމަ ދުވަހު ކ. އަތޮޅުގެ ހުރިހާ ރަށަކަށް މި ތަކެތި ފޮނުވާނެ ކަމުގައި ވިދާޅުވި އެވެ.
އޭގެ އިތުރުން ރާއްޖެއިން ބޭރަށް ގެންދާ ވޯޓު ކަރުދާސް އަދި އެ ގައުމުތަކަށް ދާ އޮފިޝަލުން އަންނަ ބުދަ އަދި ބުރާސްފަތި ދުވަހު ފުރާނެ ކަމުގައި ހަބީބް ފާހަގަކުރެއްވި އެވެ. ރިސޯޓުތަކުގައި ހަރަކާތްތެރިވާ އޮފިޝަލުން ފުރުމަށް ހަމަޖެހިފައިވަނީ ސެޕްޓެމްބަރު 8، ގަ އެވެ.
ރިޔާސީ އިންތިހާބުގައި ވޯޓުލެވޭ މީހުންގެ ލިސްޓުގައި 282،395 މީހުންގެ ނަން އެބަ އޮތެވެ. އޭގެ ތެރޭގައި އަލަށް ރިޔާސީ އިންތިހާބުގައި ވޯޓު ލެވޭ މީހުންގެ އަދަދަކީ 27,006 އެވެ.
މިއީ ފެހި ގާނޫނު އަސާސީއާ އެކު 2008 ގެ ފަހުން ރިޔާސީ އިންތިހާބެއްގައި އެންމެ ގިނަ ކެންޑިޑޭޓުން ވާދަކުރާނެ ފަހަރެވެ. މީގެ ކުރިން 2008 ގައި ހަ ކެންޑިޑޭޓުން، 2013 ގައި ހަތަރު ކެންޑިޑޭޓުން، އަދި 2018 ގައި ދެ ކެންޑިޑޭޓުން ވާދަކުރެއްވި އެވެ.
