ސެޕްޓެމްބަރު 9، ބާއްވާ ރިޔާސީ އިންތިހާބުގެ ސަލާމަތީ ކަންކަން ބެލެހެއްޓުމަށް މާލެއިން ރަށްރަށަށްދާ ފުލުހުން މިއަދު ފުރަން ފަށައިފި އެވެ.
ފުލުހުން ބުނީ އިންތިހާބީ ސަލާމަތަށްޓަކާ ދަތުރުކުރާ ފުލުހުން ފުރަން ފަށާފައިވަނީ ރޭ ފަތިހު ކަމަށެވެ. އަދި ރޭ ފަތިހުން ފެށިގެން މިއަދު މާލެއިން ފުރަން ހަމަޖެހިފައިވަނީ އުތުރުގެ އަތޮޅުތަކަށް ދަތުރުކުރާ ފުލުހުން ކަމަށް އެ ހިދުމަތުން ބުނެފައިވެ އެވެ.
ދެކުނުގެ އަތޮޅުތަކުގެ އިންތިހާބީ ސަލާމަތަށް ދަތުރުކުރާ ފުލުހުން މާލެއިން ފުރަން ފެށުން ހަމަޖެހިފައިވަނީ މާދަމާއިން ފެށިގެންނެވެ. މި އަހަރުގެ ރިޔާސީ އިންތިހާބުގެ ސަލާމަތީ ކަންކަން ބެލެހެއްޓުމަށް ރާއްޖޭގެ ހުރިހާ ރަށެއްގައި ވެސް ފުލުހުންގެ އޮފިޝަލުން ހަރަކާތްތެރި ވަމުންދާނެ ކަމަށް ވެސް ފުލުހުން ބުނެފައިވެ އެވެ.
"އިންތިހާބުގެ ސަލާމަތީ ކަންކަން ބެލެހެއްޓުމުގައި ރަށްރަށުގައި ފުލުހުން ހަރަކާތްތެރިވަމުން ދާއިރު، އިތުރު ފުލުހުން ބޭނުންވެއްޖެ ހާލަތެއްގައި އެ ރަށަކަށް ފޮނުވުމަށް ފުލުހުންގެ ޓީމެއް ކޮންމެ ރީޖަނެއްގައި ވެސް ވަނީ ގާއިމުކޮށްފަ،" ފުލުހުން ބުންޏެވެ.
ފުލުހުން އިތުރަށް ބުނީ އިންތިހާބުގެ ސަލާމަތީ ކަންކަމުގައި ހަރަކާތްްތެރިވާ ހުރިހާ ފުލުހުންނަކީވެސް ގާނޫނުން ލާޒިމްކުރާ ތަމްރީނާއި މައުލޫމާތު ލިބިފައިވާ ފަރާތްތައް ކަމަށާއި އިންތިހާބާ ގުޅިގެން ކުރިއަށް ގެންދާ ‘’އޮޕަރޭޝަން ބްލޫ ވޭވް'' ގެ ކޮމާންޑަރަކަށް ޗީފް ސްޕްރިންޓެންޑެންޓް އޮފް ޕޮލިސް އަހުމަދު ޝާކިރު އަދި ޑެޕިއުޓީ ކޮމާންޑަރަކަށް ސްޕްރިންޓެންޑެންޓް އޮފް ޕޮލިސް އަޙްމަދު މުސްލިމް ހަމަޖައްސާފައިވާ ކަމަށެވެ.
