އޮސްޓްރޭލިއާ އަންހެނެއްގެ ސިކުނޑީގެ ތެރެއިން އަށް ސެންޓިމީޓަރުގެ ދިރޭ ފަންޏެއް ނަގާފައިވާ ކަމަށް ސައިންސްވެރިން ބުނެފި އެވެ.
މިއީ މީގެ ކުރިން ދުވަހަކު ވެސް ދިމާވެފައިވާ ކަމެއް ނޫނެވެ. އަންހެން މީހާގެ ސިކުނޑީގައި ގެއްލުން ލިބިފައިވާ "ފްރަންޓަލް" ލޯބް" އިން ފަނި ނެގީ މިދިޔަ އަހަރެވެ.
އަންހެން މީހާގެ ސާޖަރީ ހެދި ޑރ. ހަރީ ޕްރިޔާ ބަންދީ ވިދާޅުވީ އެއީ ވެދާނެ ކަމަށް ހީކޮށްގެން ތިބި ގޮތެއް ނޫން ކަމަށާއި ފަނި ފެނުމުން އެންމެން ސިހުނު ކަމަށެވެ.
އުމުރުން 64 އަހަރުގެ އަންހެން މީހާ ސިކުނޑީގެ ސާޖަރީ ހެދުމުގެ ކުރިން ތަފާތު އެކި އުނދަގޫތައް ވަމުން ދިޔަ އެވެ. އެގޮތުން ބަނޑުގައި ރިއްސައި، ކެއްސައި، ރޭގަނޑު މާބޮޑަށް ދާހިތްލައި، ހަނދާން ނެތި، ޑިޕްރެޝަން ކުރިމަތިވި އެވެ.
އަންހެން މީހާ އެޑްމިޓް ކުރީ ޖެނުއަރީ 2021 ގަ އެވެ، ސިކުނޑީގެ ސްކޭނެއް ހެދި އިރު، ކަނާތް ފަރާތަށް ގެއްލުން ލިބިފައި ހުރި މަންޒަރު ފެނުނެވެ.
އެގޮތަށް ދިމާވީ ކީއްވެގެންކަން ޔަގީންކުރެވެނީ ޖޫން 2022 ގައި ސާޖަރީ ހެދުމުގެ ތެރެއިން ސިކުނޑީގެ ތެރެއިން ރަތްކުލައިގެ ފަނި ފެނުމުންނެވެ.
ޑޮކްޓަރުން ބުނީ ސާޖަރީއަށް ފަހު އަންހެން މީހާގެ ހާލު ރަނގަޅު ކަމަށެވެ. ސައިންސްވެރިން ބުނީ މި ކޭސްއިން އެނގެނީ ޖަނަވާރުންގެ ގައިން އިންސާނުންނަށް ބަލިތައް ފޯރުމުގެ ނުރައްކާ ކަމަށެވެ.
އަންހެން މީހާގެ ސިކުނޑިން ފެނުނު އޮފިޑަސްކެރިސް ރޮބޭޓްސީ ފަންޏަކީ ހަރުފައިގެ ބާވަތްތަކުގެ ހަށިގަނޑުން އާއްމުކޮށް ފެންނަ އެއްޗެކެވެ.
