ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ލާ ވޯޓުގެ ސިއްރުކަން ގެއްލުވާލަން ބަޔަކު މަސައްކަތް ކުރާކަމަށް ބުނެ އެމްއެންޕީ އާއި ޕީޕީއެމް/ޕީއެންސީން އިލެކްޝަން ކޮމިޝަން (އީސީ) އަށް ހުށަހެޅި ޝަކުވާ ބަލަމުންދާކަމަށް އެކޮމިޝަނުން ބުނެފި އެވެ.
އީސީގެ ނައިބު ރައީސް އިސްމާއިލް ހަބީބް "އަދަދު"އަށް މިއަދު ވިދާޅުވީ، ވޯޓުގެ ސިއްރުކަން ގެއްލުވާލަން ބަޔަކު މަސައްކަތް ކުރާ ކަމަށް ބުނެ އެ ކޮމިޝަނަށް ޕީޕީއެމް/ޕީއެންސީ ކޯލިޝަނުން ޝަކުވާ ހުށަހަޅާފައި ވާކަމަށެވެ. ހަމަ އެފަދަ ޝަކުވާއެއް އިއްޔެ އެމްއެންޕީން ވެސް ހުށަހަޅާފައި ވާ ކަމަށް އޭނާ ވިދާޅުވި އެވެ.
"އެކަން[ވޯޓު ސިއްރުކަން ގެއްލޭކަމަށް ބުނެ ޕާޓީތަކުން ހުށަހެޅި މައްސަަލަ] ޖަލްސާއަށް ހުށަހަޅައިގެން ކޮމިޝަނުން ތިކަމާ މަޝްވަރާކުރާނެ. އެބޭފުޅުން [ޕީޕީއެމް/ޕީއެންސީ ކޯލިޝަނުން] ހުށަހަޅާފަ އޮތީ ލަފާދޭ ކޮމެޓީގެ ބައްދަލުވުމުގަ އެޖެންޑާކުރަން އެ މައްސަަލަ. ދެން އެންމެ އަވަހަށް ބާއްވާ ކޮމެޓީ ބައްދަލުވުމެއްގައި އެޖެންޑާކުރާނެ" ހަބީބް ވިދާޅުވި އެވެ.
އެމްއެންޕީއިން ޝަކުވާ ހުށަހަޅަން އީސީއަށް ފޮނުވި ސިޓީ އެޕާޓީން އާއްމުކުރި އެވެ. އެ ސިޓީގައި ތުހުމަތުކޮށްފައިވާ ގޮތުގައި ސަރުކާރު ހިއްސާވާ ކުންފުނިތަކުން އަންނަނީ އެކުންފުނީގެ އިސްވެެރިން ބުނާ ވަކި ކުލައެއްގެ ގަލަމެއް ނުވަތަ މާކަރަކުން ވޯޓުލާން މުވައްޒަފުންނަށް އަންގަމުންނެވެ.
"އެ ކުންފުނިތަކުގެ އިސްވެރިން އެދޭ ވަކި ކުލައެއްގެ މާކަރެއް ނުވަތަ ގަލަމަކުން ވޯޓު ކަރުދާހުގައި ފާހަގަޖެހުމަށް މަޖުބޫރުކުރަމުންދާކަމުގެ ޝަކުވާ އެކުންފުނިތަކުގެ މުވައްޒަފުން އަންނަނީ ކުރަމުންނެވެ" އެމްއެންޕީއިން ހުށަހެޅި ޝަކުވާގެ ސިޓީގައި ބުންޏެވެ.
ރިޔާސީ އިންތިހާބުގައި ވޯޓުލެވޭ މީހުންގެ ލިސްޓުގައި 282،395 މީހުންގެ ނަން އެބަ އޮތެވެ. އޭގެ ތެރޭގައި އަލަށް ރިޔާސީ އިންތިހާބުގައި ވޯޓު ލެވޭ މީހުންގެ އަދަދަކީ 27,006 އެވެ.
މިއީ ފެހި ގާނޫނު އަސާސީއާ އެކު 2008 ގެ ފަހުން ރިޔާސީ އިންތިހާބެއްގައި އެންމެ ގިނަ ކެންޑިޑޭޓުން ވާދަކުރާނެ ފަހަރެވެ. މީގެ ކުރިން 2008 ގައި ހަ ކެންޑިޑޭޓުން، 2013 ގައި ހަތަރު ކެންޑިޑޭޓުން، އަދި 2018 ގައި ދެ ކެންޑިޑޭޓުން ވާޑަދަކުރެއްވި އެވެ.
