މާލޭ ރައްޔިތުންނަށް ވެރި ރަށް މާލޭ ސަރަހައްދުން ގޯތި ދިނުމަށް މިހާރު ކުރިއަށްގެންދާ ޕްރޮގްރާމަކީ އޮޅުވާލުމެއް ކަމަށާއި އޭގެ ބޭނުމަކީ ވޯޓަށް ނުފޫޒު ފޯރުވުން ކަމަށް އިދިކޮޅު ޕީޕީއެމް/ޕީއެންސީގެ ކެމްޕެއިން ޓީމުން ބުނެފި އެވެ.
ޕީޕީއެމް އޮފީހުގައި ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ކެންޑިޑޭޓު ޑރ. މުހައްމަދު މުއިއްޒުގެ ކެމްޕެއިނުގެ އެސިސްޓެންޓް މެނޭޖަރު މުއާޒް ރަޝީދު ވިދާޅުވީ، ހިކިފަސްތަންތަނުން ގޯތި ދިނީ ސަރުކާރުގެ ވެރިންނަށް ކަމަށެވެ.
"މި ސަރުކާރުގެ ބޮޑެތި ބޭފުޅުންނަށް، މި ސަރުކާރަށް ނިސްބަތްވާ ސަރުކާރުގެ ބޭފުޅުންނަށް އެކަނި ބިން އޮތް ތަނަކުން ގޯތި ދީފަ އާންމު ރައްޔިތު މީހުންނަށް ވުޖޫދުގައި ނުވެސް ނެތް ތަންތަނުން އެ އޮތީ ގޯތި ދިން ކަމަށް ހަދާފައި. މިއީ ވަރަށް ބޮޑު އޮޅުވާލުމެއް،" އޭނާ ވިދާޅުވި އެވެ.
"ހަމައެއާ އެކީގައި އަދިވެސް އިތުރު އެތައް ކަންތައްތަކެއް އިންތިހާބަށް ނުފޫޒު ފޯރުވުމަށްޓަކައި އެ ދަނީ ކުރަމުން. އޭގެ ތެރޭގައި ތިޔަ ބޭފުޅުންނަށް ފާހަގަވާނެ، އޭގެ ތެރޭގައި ތިޔަ ބޭފުޅުންނަށް ފާހަގަވާނެ މާލޭގެ ރައްޔިތުންނަށް ގޯތިތަކެއް."
އޭގެ އިތުރުން، ސެޕްޓެމްބަރު 9، ގައި ބާއްވާ އިންތިހާބާ ދިމާކޮށް ސަރުކާރުން ވަޒީފާތައް އިތުރު ކުރަމުންދާ ކަމަށް ވެސް މުއާޒް ތުހުމަތު ކުރެއްވި އެވެ.
"ސަރުކާރު ކުންފުނިތައް ބޭނުންކޮށްގެން މި އިންތިހާބަށް ނުފޫޒު ފޯރުވުމަށް އެތައް ވަޒީފާތަކެއް އެ ދަނީ ހަމަޖައްސަމުން. ހަގީގަތުގައި ނެތް ފައިސާއަކަށް، ދަރަންޏަށް ނަގައިގެން، އިންތިހާބަށް ނުފޫޒު ފޯރުވަން،" އޭނާ ވިދާޅުވި އެވެ.
އެ ބައްދަލުވުމުގައި ވާހަކަ ދައްކަވަމުން ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލް ވިދާޅުވީ، ގައުމު ތަރައްގީ ކުރުމުގައި ބޮޑެތި އާބާދީތަކަށް އިސްކަންދެއްވާނެ ކަމަށް ޑރ. މުއިއްޒު ވިދާޅުވި ނަމަވެސް ތަރައްގީ ގެނައުމުގައި އެއްވެސް ތަފާތެއް ނުގެންގުޅޭނެ ކަމަށެވެ.
"މައިގަނޑު ގޮތެއްގައއި ވަކި ރަށަކަށް ނިސްބަތް ކުރައްވާ ވާހަކަ ދެއްކެވި ނަމަވެސް އަޅުގަނޑުމެން، ޕީޕީއެމް/ޕީއެންސީ މެނިސފެސްޓޯގައި ހިމެނިފައި އެ ވަނީ މުޅި ރާއްޖެއަށް ކޮށްދެއްވާނެ ކަންކަން. އެއީ އަޅުގަނޑުމެން ވަކި ރަށެއް ތަފާތު ކުރުމެއް ނެތި، ބޮޑު އާބާދީއެއް، ކުޑައާބާދީއެއް ތަފާތު ކުރުމެއް ނެތި، ހުރިހާ ރަށަކަށް އަޅުގަނޑުމެން ކޮށްދޭނެ ކަންކަން،" ތޮލާލް ވިދާޅުވި އެވެ.
ޑރ. މުއިއްޒަށް ކުރީގެ ރައީސް އަބްދުﷲ ޔާމީންގެ ތާއީދެއް ނެތް ކަމަށް ވިދާޅުވާތީ އެކަމަށް ވެސް ތޮލާލް ރައްދު ދެއްވި އެވެ.
"ރައީސް ޔާމީންގެ ފުރިހަމަ ތާއީދު ޑރ. މުއިއްޒަށް އޮތްކަން ރައީސް ޔާމީނު ވަނީ އަޅުގަނޑުމެންނަށް އަންގަވާފަ. އަދި ޑރ. މުއިއްޒު ހޮވާދިނުމުގައި ދިވެހި ރައްޔިތުން އެކަތިގަނޑެއްގައި މަސައްކަތް ކުރުމަކީ ރައީސް ޔާމީންގެ އެދިވަޑައިގަތުމެއް،" އޭނާ ވިދާޅުވި އެވެ.
މުއިއްޒުގެ އިތުރުން އިންތިހާބުގައި ވާދަ ކުރައްވަނީ އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހާއި ޖުމްހޫރީ ޕާޓީގެ ގާސިމް އިބްރާހިމާއި ޑިމޮކްރެޓްސްގެ އިލްޔާސް ލަބީބާއި އެމްއެންޕީގެ މުހައްމަދު ނާޒިމެވެ.
އޭގެ އިތުރުން، ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި އުމަރު ނަސީރާއި ހަސަން ޒަމީލް ވެސް އެ އިންތިހާބުގައި ވާދަ ކުރައްވަ އެވެ. އެ ތިން ބޭފުޅުން ވާދަ ކުރައްވަނީ އަމިއްލަ ކެންޑިޑޭޓުންގެ ގޮތުގަ އެވެ.
