ބައެއް ފިލްމުތަކާއި ލަވަތަކުން ފެންނަ އަދި ސިޔާސީ އެކްޓިވިސްޓެއްގެ ގޮތުގައި މަސައްކަތް ކުރާ އަލީ ޝާހިދު (ސްޓެޕް އައްޔަ) ފޯޖަރީގެ މައްސަލައެއްގައި ހޯދަން ފުލުހުން މިއަދު އިއުލާނުކޮށްފި އެވެ.
ފުލުހުން އޭނާ ހޯދަން ކުރި އިއުލާނުގައިވާ ގޮތުން އޭނާ ހޯދަމުންދަނީ ފުލުހުންގެ އިކޮނޮމިކް ކްރައިމް ޑިޕާޓްމެންޓުން ބަލަމުންދާ ފޯޖަރީގެ މައްސަލައަކާ ގުޅިގެނެވެ. ފޯޖަރީއަކީ ސައްހަ ނޫން ލިޔުމެއް އުފެއްދުމުގެ ކުށެވެ.
ތަހުގީގަށް މީހަކު ހާޒިރުކުރުމަށް ބޭނުންވެ، އުޅޭ ވަކިތަނެއް ނޭނގޭތީ ފުލުހުންގެ އިއުލާނުގައި އަންގާފައި ވަނީ މި މަހުގެ 24 ވަނަ ދުވަހުގެ މެންދުރު 11:30 އަށް ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންއަށް ހާޒިރުވުމަށެެވެ.
މިދިޔަ އަހަރުގެ މާޗު މަހުގެ ތެރޭގައި ވެސް ފުލުހުން އޭނާ ހޯދަން އިއުލާނު ކުރި އެވެ. އެއީ ސިވިލް ކޯޓުގެ ހުކުމް ތަންފީޒު ކުުރުމުގެ މައްސަލައަކާ ގުޅިގެން އޭނާ ބަންދުގައި ބަހައްޓައިގެން ކޯޓަށް ހާޒިރު ކުރުމަށެވެ.
މީގެ ކުރިން އެމްޑީޕީ، އަދި ޕީޕީއެމްގެ ހަރަކާތްތަކުގައި ވެސް އުޅުނު ސްޓެޕް އައްޔައަކީ މިހާރު މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ)ގެ އެކްޓިވިސްޓެކެވެ.
