ސެޕްޓެމްބަރު 9, ގައި ބާއްވާ ރިޔާސީ އިންތިހާބުގައި ބަހައްޓާނީ ޖުމްލަ 574 ވޯޓުފޮށި ކަމަށް އިލެކްޝަންސް ކޮމިޝަނުން ހާމަކޮށްފި އެވެ.
އެ ކޮމިޝަނުން ނިންމީ މި އިންތިހާބުގައި 609 ވޯޓް ފޮށި ބެހެއްޓުމަށެވެ. ނަމަވެސް, ފޮށީގެ އަދަދު 574 މަދުކޮށްފައިވާކަން އީސީން ވަނީ އިއްޔެ ހާމަކޮށްފަ އެވެ.
އީސީން ބުނި ގޮތުގައި ރީ ރެޖިސްޓްރޭޝަންގެ އަދަދުތަކަށް ބަލައި އެ ކޮމިޝަނުން ވަނީ މާލޭ ސިޓީގެ އެކި ސަރަހައްދުތަކުގަ އާއި ރާއްޖޭން ބޭރުގައި ވޯޓުލުމަށް ރަޖިސްޓަރީ ކޮށްފައިވާ 40 ވޯޓު ފޮށްޓަކަށް ބަދަލު ގެނެސްފަ އެވެ. އަދި ބައެއް ފޮށިތަކަށް ވޯޓުލުމަށް ރީ ރަޖިސްޓަރީކޮށްފައިވާ މީހުން ގިނަވުމުގެ ސަބަބުން، އެތަން ތަނުގައި އިތުރު ހަތް ވޯޓުފޮށި ބެހެއްޓުމަށް ނިންމީ ކަމަށްވެސް ބުންޏެވެ.
އިންތިހާބަށް ބަހައްޓާ ވޯޓު ފޮށިތަކުގެ ތެރެއިން މާލޭގައި ބަހައްޓާނީ ޖުމްލަ 176 ވޯޓްް ފޮށްޓެވެ. އަތޮޅު ތެރޭގައި 319 ފޮށި ހުންނައިރު ރާއްޖެއިން ބޭރުގައި އަށް ފޮށި ބެހެއްޓުމަށް އިސީން ވަނީ ނިންމަވާފައެވެ. އޭގެއިތުރުން 65 ރިސޯޓަކާއި ޖަލުތަކުގައި ފަސް ފޮއްޓަކާއި ހުޅުލޭގައި އެއް ފޮށި ހުންނާނެ ކަމަށް ވެސް އީސީން ބުންޏެވެ.
މާލޭ ސަރަހައްދުގައި ބަހައްޓާ ފޮށިތައް ބެހިފައިވާ ގޮތް
- މާލޭގައި 142 ފޮށި
- ހުޅުމާލެ ފޭސް 1ގައި 21 ފޮށި
- ހުޅުމާލެ ފޭސް 2ގައި 6 ފޮށި
- ވިލިމާލޭގައި 7 ފޮށި
ވޯޓް ފޮށި ބަހައްޓާ ގައުމުތައް
ސްރީލަންކާ/ކޮލަމްބޯ 2 ފޮށި
- އިންޑިއާ/ޓްރިވެންޑްރަމް 1 ފޮށި
- އިނގިރޭސިވިލާތް/ލަންޑަން 1 ފޮށި
- މެލޭޝިޔާ/ކުއަލަލަމްޕޫރް 3 ފޮށި
- ޔޫއޭއީ/އަބޫދާބީ 1 ފޮށި
އޭގެ އިތުރުން މާފުށީ ޖަލުގައި ދެ ފޮށި، ހުޅުމާލެ ޖަލުގައި އެއް ފޮށި އައްސޭރި ޖަލުގައި އެއް ފޮށި އަދި ދޫނިދޫ ޖަލުގައި އެއް ފޮށި ބެހެއްޓުމަށް އީސީން ވަނީ ނިންމާފަ އެވެ.
ރިޔާސީ އިންތިހާބުގައި ވޯޓު ލުމުގެ ހައްގު 280،000 މީހުނަށް ލިބެ އެވެ. ފުރަތަމަ ބުރުގެ ވޯޓު ލުން ސެޕްޓެމްބަރު 9، ގައި އޮންނަ އިރު ދެވަނަ ބުރަކަށް ދާން ޖެހިއްޖެނަމަ ދެވަނަ ބުރުގެ ވޯޓު ލުން އޮންނާނީ ސެޕްޓެމްބަރު 30، ގަ އެވެ.
އަށް ކެންޑިޑޭޓުންގެ ވާދަވެރި މި އިންތިހާބުގައި ވޯޓު ލުމުގެ ހައްގު ލިބޭ މީހުންގެ ލިސްޓު އާންމުކޮށް ޝަކުވާ ހުށަހެޅުމުގެ ފުރުސަތުވެސް އީސީން މިހާރު ވަނީ ހުޅުވާލާފަ އެވެ. މި ލިސްޓަށް ޝަކުވާ ހުށަހެޅޭނީ މިއަދު 15:00 ގެ ނިޔަަލަށެވެ.
