ރިޔާސީ އިންތިހާބުގެ ހަރަދުތަކަށް ކޮންމެ ކެންޑިޑޭޓަކު ވަކި ބޭންކް އެކައުންޓެއް ހުޅުވަންޖެހޭއިރު ބޭންކު އެކައުންޓުތަކުން ދުވާލަކަށް ފައިސާ ނެގޭ ލިމިޓުގެ ސަބަބުން ހަރަދުކުރަން ދިމާވެދާނެ ދަތިތަކަށް ހައްލެއް ހޯދައިދޭނެ ކަމަށް އިލެކްޝަންސް ކޮމިޝަންގެ ނާއިބު ރައީސް އިސްމާއިލް ހަބީބް މިއަދު ވިދާޅުވެއްޖެ އެވެ.
ރިޔާސީ އިންތިހާބުގެ ގައުމީ ލަފާދޭ ކޮމިޓީގެ ތިންވަނަ ބައްދަލުވުން މިއަދު ބޭއްވިއިރު އެ ބައްދަލުވުމުގައި ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމްގެ ފަރާތުން ބައިވެރިވި މަންދޫބު ވިލުފުށީ ދާއިރާގެ ކުރީގެ މެމްބަރު ރިޔާޒް ރަޝީދު ވަނީ، އެކައުންޓުތަކުން ދުވާލަކަށް ފައިސާ ނެގޭ ވަކި ލިމިޓެއް ބޭންކުތަކުން ކަނޑައަޅާފައިވާތީ އޭގެ ސަބަބުން ކެމްޕެއިން ހަރަދުތައް ކުރުމަށް ދަތިތަކަކާއި ކުރިމަތިވާނެ ކަމަށް ވިދާޅުވެ އެކަމަށް ހައްލެއް ހޯއްދަވައި ދެއްވުމަށް އެދިވަޑައިގެންފަ އެވެ.
ރިޔާޒުގެ އެ ހުށަހެޅުމާ ގުޅޭގޮތުން އީސީގެ ނާއިބު ރައީސް ހަބީބް ވިދާޅުވީ ރިޔާސީ ކެންޑިޑޭޓުންގެ ހަރަދުތައް ބެލެހެއްޓުމަށް އެ ކޮމިޝަނާއި އޮޑިޓާ ޖެނެރަލް އޮފީހާއި އެމްއެމްއޭ ގުޅިގެން ވަރަށް ރަނގަޅު އުސޫލުތަކެއް ކަނޑައަޅައި ރަނގަޅު މަސައްކަތްތަކެއް ކުރެވިއްޖެ ކަމަށާއި ހަރަދުކުރާ މިންވަރު ބެލުމަށް ކެންޑިޑޭޓުން ވަކި އެކައުންޓެއް ހުޅުވުމުގެ އުސޫލަކީ އޭގެ އެއް މިސާލު ކަމަށެވެ.
ނަމަވެސް ރިޔާޒު ފާހަގަކުރެއްވި ގޮތަށް ރިޔާސީ ކޮންމެ ކެންޑިޑޭޓަކަށް ހަރަދުކުރެވޭނެ ވަކި އަދަދެއް ކަނޑައަޅާފައިވާއިރު ބޭންކު ތަކުން ދުވާލަކަށް ދެ ލައްކަ ރުފިޔާ ދޫކުރާ އުސޫލު އޮންނަ ނަމަ އެކަމުގެ ސަބަބުން ކެންޑިޑޭޓުންނަށް ދަތިތަކެއް ކުރިމަތިވާނެ ކަމަށެވެ.
"އެކަމަށްޓަކައި އިލެކްޝަންސް ކޮމިޝަނުން އަޅުގަނޑުމެންނަށް ކޮށްދެވެން އޮތް ކަމެއް ވިއްޔާ ކޮށްދޭނަން" ހަބީބު ވިދާޅުވި އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ޖުމްލަ އަށް ކެންޑިޑޭޓުން ވާދަ ކުރައްވަ އެވެ. އޭގެ ތެރެއިން ޕާޓީތަކުން ވާދަ ކުރައްވަނީ އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހާއި ޖުމްހޫރީ ޕާޓީގެ ގާސިމް އިބްރާހިމް އާއި ޑިމޮކްރެޓްސްގެ އިލްޔާސް ލަބީބާއި ޕީޕީއެމް/ޕީއެންސީގެ ޑރ. މުހައްމަދު މުއިއްޒާއި އެމްއެންޕީގެ މުހައްމަދު ނާޒިމެވެ.
ރިޔާސީ އިންތިހާބުގައި އަމިއްލަ ގޮތުން ވާދަ ކުރައްވަނީ ފާރިސް މައުމޫނާއި އުމަރު ނަސީރާއި ހަސަން ޒަމީލެވެ.
