ދެހާސްސަތާރަ ވަނަ އަހަރު ފަހުކޮޅު އަވައްޓެރި ގައުމެއްގައި ޓެރަރިސްޓް ހަމަލާއެއް ދޭން ހަތަރު ދިވެއްސަކު ރާވައި ބޭރުގެ ޓެރަރިސްޓް ޖަމާއަތަކަށް މާލީ އެހީތެރިކަން ފޯރިކޮށްދީ އެ އަމަލު ހިންގުމަށް އެހީތެރިކަން ފޯރުކޮށްދިން ކަމަށް ބުނާ މައްސަލައަކާ ގުޅިގެން މާލޭގައި އޮޕަރޭޝަނެއް ހިންގައި ތިން މީހެއްގެ ޑިޖިޓަލް ޑިވައިސްތައް ހިފަހައްޓައިފި އެވެ.
އެ އޮޕަރޭޝަނާ ބެހޭގޮތުން މިރޭ ނޫސްތަކަށް ފޮނުވި ކުރު ބަޔާނެއްގައި ފުލުހުން ބުނީ އެ އޮޕަރޭޝަން ކުރިއަށް ގެންގޮސްފައި ވަނީ ރާއްޖޭގެ އަވައްޓެރި ދެ ދައުލަތަކުން ފޯރުކޮށްދީފައިވާ ތަހުގީގީ މައުލޫމާތާއި ހެކީގެ އަލީގައި ކަމަށެވެ.
މިރޭ ކުރިއަށް ގެންދިޔަ އޮޕަރޭޝަނުގައި މާލޭގެ ތިން ތަނެއް ބަލައި ފާސްކޮށް ތިން މީހެއްގެ ޑިޖިޓަލް ޑިވައިސްތައް ތަހުގީގީ ބޭނުމަށް ހިފަހައްޓާފައިވާ ކަމަށް އެ ބަޔާނުގައި ފުލުހުން ބުންޏެވެ. ނަމަވެސް އެއީ ކޮންކޮން ތަންތަނެއް ކަމެއް ނުވަތަ ހިފެހެއްޓި ޑިޖިޓަލް ޑިވައިސްތައް ހިފެހެއްޓީ ކޮންކޮން ބައެއްގެ ކަމެއް ފުލުހުން ހާމަކޮށްފައެއް ނުވެ އެވެ.
ފުލުހުން ބުނީ އެ މައްސަލަ އިތުރަށް ތަހުގީގު ކުރުމުގެ މަސައްކަތް ކުރަމުން އަންނަ ކަމަށާއި އެކަމާ ގުޅިގެން އެހީތެރިކަން ފޯރުކޮށްދެމުންދީފައިވާ ގައުމުތަކަށް ރާއްޖޭގެ ފަރާތުން ވެސް މައުލޫމާތު ފޯރުކޮށްދެމުންދާ ކަމަށެވެ.
ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތުގައި މިއަދު މާލޭގައި ހާއްސަ އޮޕަރޭޝަނެއް ހިންގާފައިވާއިރު މިމަހުގެ އެއްވަނަ ދުވަހު ޔޫއެސް ޑިޕާޓްމަންޓް އޮފް ޓްރެޝަރީޒް އޮފީސް އެންޑު ފޮރެއިން އެސެޓްސް (އޯފެކް) އިން ވަނީ 29 ދިވެއްސަކު ޓެރަރިސްޓުންގެ ގޮތުގައި ކަނޑައަޅައި ދިވެހި 30 ކުންފުންޏަކަށް ފިޔަވަޅު އަޅަން ނިންމައިފަ އެވެ. ނަމަވެސް އެ ނިންމުމާ ގުޅިގެން މިހާތަނަށް ރާއްޖޭގެ ސަރުކާރުން ވެސް އަދި ތަންފީޒީ އިދާރާއަކުން ވެސް އެއްވެސް އެއްޗެއް ބުނެފައެއް ނުވެ އެވެ.
