އަންނަ މަހު ބާއްވަން ހަމަޖެހިފައިވާ ރިޔާސީ އިންތިހާބަށް ބޭނުންވާ އޮފިޝަލުން އަދިވެސް ހަމަނުވާ ކަމަށް އިލެކްޝަންސް ކޮމިޝަނުން ހާމަކޮށްފި އެވެ.
އީސީން ދަރުބާރުގޭގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ ނައިބު ރައީސް އިސްމާއިލް ހަބީބް ވިދާޅުވީ އުއްމީދުކުރިވަރަށް ވުރެ އިންތިހާބުގެ އޮފިޝަލުންނަށް ވުމަށް ލިބޭ ތަރުހީބު ކުޑަ ކަމަށެވެ. އެގޮތުން އިންތިހާބަށް ހަތަރު ހަފްތާއަށް ވެެފައިވާއިރު އީސީން އުއްމީދުކުރިވަރާ ގާތަށްވެސް އޮފިޝަލުންގެ އަދަދު ހަމަނުވާ ކަމަށް ހަބީބު ވިދާޅުވި އެވެ.
"ރިޔާސީ އިންތިހާބަށް ވަރަށް ބޮޑު އޮޕަރޭޝަނެއް ހިނގާއިރު ހަގީގަތުގައިވެސް އޮފިޝަލުންނަކީ ވަރަށް މުހިއްމު ބައެއް. ބައެއް ރަށްރަށުން އަދިވެސް ދަތިތަކެއް އެބަހުރި އޮފިޝަލުން ލިބުމުގެ. މިހާރުވެސް ފުރުސަތު ހުޅުވާލާފަ ވަނީ، ހާއްސަ ގޮތެއްގައި ރިސޯޓުތަކުގައި ހަރަކާތްތެރިވާނެ އޮފިޝަލުން ބޭނުންވޭ" ހަބީބް ވިދާޅުވި އެެވެ.
ހަބީބު ވިދާޅުވި ގޮތުގައި އިންތިހާބަށް ބޭނުންވާ އޮފިޝަލުން ހަމަނުވާއިރު އީސީއަށް އެންމެ ބޮޑަށް ދަތިވެފައިވަނީ އެ ކޮމިޝަނުގެ އޮފިޝަލުންގެ ގޮތުގައި ވޯޓުލާ މަރުކަޒުތަކުގައި ހަރަކާތްތެރިވާ މީހުން ނުލިބުމުގެ ދަތިކަމެވެ. އެކަމަށްޓަކައި ސިވިލް ސާވިސް މުވައްޒަފުންނާއި މިނިސްޓްރީ ތަކުގެ މުވައްޒަފުންނަށްވެސް ފުރުސަތު ހުޅުވާލާފައިވާ ކަމަށް ވިދާޅުވި އެވެ.
އަދި, އިންތިހާބުގެ މޮނީޓަރުންނާއި އޮބްޒާވަރުންގެ އަދަދުތައް އިތުރުުކުރުމުގެ ގޮތުުން މޮނީޓަރުންނާއި އޮބްޒާވަރުންނަށް ވުމަށް އެދި ހުށަހެޅުމުގެ މުއްދަތުވެސް އަންގާރަ ދުވަހުގެ ހަވީރު 15:00 އާ ހަމަޔަށް މިހާރު އިތުރުކޮށްފައިވާ ކަމަށާއި އެ މުއްދަތު އިތުރަށް އިތުރު ކުރުމުގެ ވިސްނުމެއް ކޮމިޝަނުން ނުގެންގުޅޭ ކަމަށް އޭނާ ވިދާޅުވި އެވެ.
"އަޅުގަނޑުމެން ވަރަށް ބޮޑަށް ބޭނުންވޭ މި އިންތިހާބުގެ ކަންކަން އަޅުގަނޑުމެން ކުރަނީ ރަނގަޅަށްތޯ ބެލުމަށް ވަރަށް ބޮޑަށް މީޑިއާ އާއި އޮބްޒާވަރުންނާއި ސިޔާސީ ޕާޓީތަކާއި މަދަނީ ޖަމިއްޔާތަކާއި ކަމާއި ގުޅުންހުރި އެހެނިހެން މުއައްސަސާތަކާއި އިންޓަނޭޝަނަލް އޮބްޒާވަރުން ވަރަށް ބޮޑަށް ފާރަވެރިވާން" ހަބީބް ވިދާޅުވި އެވެ.
ހަބީބް އިތުރަށް ވިދާޅުވީ ރިޔާސީ އިންތިހާބުގައި ހަރަކާތެތްތެރިވާ ބައިނަލްއަގުވާމީ އޮބްޒާވަރުންގެ އަދަދު އުއްމީދުކުރި ވަރަށްވުރެ އިތުރު ކަމަށެވެ. އެގޮތުން 150 އަށްވުރެ ގިނަ އިންޓަނޭޝަނަލް އޮބްޒާވަރުން ހަރަކާތްތެރިވާނެ ކަމަށް ބެލެވޭ ކަމަށާއިި ރާއްޖޭގެ އޮބްޒާވަރުންނާއި މޮނީޓަރުންގެ ގޮތުގައި ގާތްގަނޑަކަށް 5،000 ފަރާތްތަކުން ހަރަކާތްތެރިވާނެ ކަމަށް އުއްމީދުކުރައްވާ ކަމަށް ވިދާޅުވި އެވެ.
