ސެޕްޓެމްބަރު 9، ގައި އޮންނަ އިޔާސީ އިންތިހާބުގައި ވާދަކުރުމަށް ޑިފެންސް މިނިސްޓްރީގެ ނައިބަކަށް ކުރިން ހުންނެވި ހަސަން ޒަމީލާއި އޭނާގެ އަނބިކަބަލުން ފޯމު ހުށަހަޅައިފި އެވެ.
ހަސަން ޒަމީލް (މއ. މާވެޔޮ ވިލާ)ގެ ރަނިން މޭޓަކީ އޭނާގެ އަނބިކަަބަލުން މަރިޔަމް އަލީމް (ގ. ދާސްތާން) އެވެ. އަދި ޒަމީލްގެ އިންތިހާބީ އޭޖެންޓަކީ އޭނާގެ ދަރިކަލުން އަހްމަދު މަހްރާން ޒަމީލެވެ.
ޒަމީލުގެ ފޯމާއި އީސީގެ ފަރާތުން ހަވާލުވެވަޑައިގަތީ ރައީސް ފުއާދު ތައުފީގެވެ. އޭނާ ހުށަހެޅުއްވީ 1,670 ތާއީދު ސޮޔާއެކު އެވެ.
ފޯމު ހަވާލުކުރެއްވުމަށްފަހު ވާހަކަދައްކަވަމުން ޒަމީލް ވިދާޅުވީ ކޮންމެ ބޭފުޅަކު ރިޔާސީ އިންތިހާބު ކާމިޔާބު ކުރެއްވި ނަމަވެސް، އެދެނީ އެބޭފުޅަކީ ގައުމަށް ރަނގަޅު މަސައްކަތްތަކެއް ކޮށްދެއްވާ ފަރާތަކަށް ވުން ކަމުގަ އެވެ.
"އަޅުގަނޑު މި މަސައްކަތް ފެށީ، ރާއްޖޭގެ ސިޔާސީ މަސްރަހް މިވަތުގު އޮތް ގޮތުން، ޕާޓީ ކޯލިޝަނަކުން އުފައްދާ ސަރުކާރަކުން ޤައުމުގެ ކަންކަން ރަނގަޅު ނުކުރެވޭނެތީ. ވީމާ، ޕާޓީ ކޯލިޝަނަކާ އަޅުގަނޑު ނުގުޅޭނެކަމުގެ ޔަޤީންކަން އަރުވަން," ޒަމީލްގެ ރަސްމީ ކެމްޕޭން ފޭސްބުކް ޕޭޖުގައި ބުނެފައިވެ އެވެ.
އޭނާ މި ސަރުކާރުގެ ޑިފެންސް މިނިސްޓްރީގެ ނައިބުގެ މަގާމަށް ރައީސް އައްޔަނު ކުރެއްވީ ފެބްރުއަރީ 20, 2019 ގަ އެވެ. އެ މަގާމުން އިސްތިއުފާ ދެއްވީ ޖުލައި 13, 2023 ގަ އެވެ. އޭގެކުރިން އޭނާ ވަނީ ޓޫރިޒަމް މިނިސްޓްރީގެ ޑިރެކްޓަރު ޖެނެރަލްގެ މަގާމާއި އެ މިނިސްޓްރީގެ ޑެޕިއުޓީ ޑިރެކްޓަރުކަން ވެސް ކުރައްވާފަ އެވެ. އޭނާ ވަނީ ގާނޫނީ ދާއިރާއިން މާސްޓާސް ފުރިހަމަ ކުރައްވާފަ އެވެ.
ޒަމީލްގެ ރަނިން މޭޓް މަރިޔަމް އަލީމް ވަނީ 21 އަހަރުގެ ދިގު މުއްދަތަކަށް މިނިސްޓްރީ އޮފް އެޓޯލް ޑިވެލޮޕްމެންޓުގައި މަސައްކަތް ކުރައްވާފަ އެވެ. އަދި އޭގެފަހުން 11 އަހަރު ޕީޖީ އޮފީހުގައި ވެސް މަސައްކަތް ކުރައްވާފައިވެ އެވެ.
