ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ ކުރީގެ ރައީސް އަބްދުﷲ ޔާމީންގެ ވެރިކަމުގައި ހޯމް މިނިސްޓަރަކަށް ހުންނެވި އުމަރު ނަސީރުގެ ކެންޑިޑެސީ ފޯމު އިލެކްޝަންސް ކޮމިޝަން (އީސީ) އަށް ހުށަހަޅައިފި އެވެ.
ކެންޑިޑެސީ ފޯމު އީސީގެ ރައީސް ފުއާދު ތައުފީގާއި ހަވާލުކުރެއްވީ އުމަރު އަދި އޭނާގެ ރަނިން މޭޓް މާޒް ސަލީމްގެ އިތުރުން އޭނާއަށް ތާއީދުކުރާ ލީޑަރުންނެވެ.
ފޯމު ހަވާލުކުރުމަށްފަހު މީޑިއާއަށް މައުލޫމާތު ދެއްވަމުން އުމަރު ވިދާޅުވީ، އޭނާގެ ވެރިކަމެއްގައި ރާއްޖެއަށް މިހާރު ކުރިމަތިވެފައިވާ މަސްތުވާތަކެތި، މީހުން މެރުން އަދި އެހެން ގައުމުތަކުގެ ސިފައިން ރާއްޖޭގައި ތިބުން ފަދަ ގޮންޖެހުންތައް ހައްލުކުރާނެ ކަމަށެވެ. އަދި މުޅިން އާ މިސްރާބަކަށް ދިވެހިރާއްޖެ ގެންގޮސްދޭނެކަމަށެވެ.
ރިޔާސީ އިންތިހާބުގެ ގާނޫނު ބުނާ ގޮތުން ރާއްޖޭގައި ރަޖިސްޓްރީކޮށްފައިވާ ސިޔާސީ ޕާޓީއެއްގެ ޓިކެޓުގައި ވާދަކުރުމުގެ ބަދަލުގައި އަމިއްލަ ގޮތުން އެ އިންތިހާބަށް ވާދަކުރާނަމަ މަދުވެގެން 1،500 މީހުންގެ ސޮއި ހިމެނޭ ތާއީދު ފޯމުތައް އިލެކްޝަންސް ކޮމިޝަން (އީސީ) އަށް ހުށަހަޅަން ޖެހެ އެވެ.
އެގޮތުން ރިޔާސީ އިންތިހާބުގައި ވާދަކުރުމަށް ތާއީދު ސޮއި ހޯދުމަށް ކުރަމުން ދިޔަ މަސައްކަތުގެ ތެރެއިން 2،000 ސޮއި ހަމަކުރެވިފައިވާ ކަމަށް އުމަރު ވަނީ ވިދާޅުވެފަ އެވެ.
ދެހާސް އަށްވަނަ އަހަރު ބޭއްވި ރިޔާސީ އިންތިހާބުގައި ވެސް އުމަރު ވާދަކުރެއްވި އެވެ. އިސްލާމިކް ޑިމޮކްރެޓިކް ޕާޓީގެ ނަމުގައި އުމަރު އިސްވެ އުފެއްދެވި ޕާޓީގެ ޓިކެޓުގައި ވާދަކުރައްވައިގެން އޭރު ލިބިވަޑައިގަތީ 2,472 ވޯޓެވެ. އެއީ ޖުމުލަ ވޯޓުގެ އެންމެ 1.4 ޕަސެންޓެވެ.
ދެހާސްތޭރަ ވަނަ އަހަރު، ޕީޕީއެމްގެ ރިޔާސީ ޕްރައިމަރީގައި އުމަރު ވާދަކުރެއްވި އެވެ. ޕްރައިމަރީގައި އުމަރަށް 7،000 އެއްހާ ވޯޓު ލިބިވަޑައިގަތް އިރު އެ ޕްރައިމަރީގެ އިތުރުން އެ އަހަރުގެ ރިޔާސީ އިންތިހާބު ވެސް ކާމިޔާބުކުރެއްވި ކުރީގެ ރައީސް އަބްދުﷲ ޔާމީނަށް ޕްރައިމަރީގައި 13،000 އެއްހާ ވޯޓު ލިބިވަޑައިގަތެވެ.
އެ ދެ ނާކާމިޔާބީއަށް ފަހު 2018 ގެ ރިޔާސީ އިންތިހާބުގައި ވެސް ވާދަކުރައްވާނެ ކަން އުމަރު އިއުލާން ކުރެއްވި އެވެ. އަދި އަމިއްލަ ގޮތުން ވާދަކުރަން ހުށަހަޅަން ޖެހޭ 1،500 ސޮއި ހަމަކުރި ކަން ވެސް އިއުލާން ކުރުމަށް ފަހު، އެންމެ ފަހު ވަގުތު ނިންމެވީ ވާދަނުކުރުމަށެވެ.
