ރިޔާސީ އިންތިހާބުގައި ވާދަ ކުރުމުގެ ބޭނުމަށް މިރޭ 9:00 ގެ ފަހުން ކުށުގެ ރިކޯޑު ސާފު ކުރަން ހުށަހަޅާ ނަމަ އެމީހެއްގެ ރިކޯޑު ސުންގަޑިއަށް ސާފުނުވެދާނެ ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ބުނެފި އެވެ.
ރިޔާސީ އިންތިހާބަށް ކުރިމަތިލާން ފޯމު ހުށަހަޅަންޖެހޭ ސުންގަޑި ހަމަވާނީ މާދަމާގެ ނިޔަލަށެވެ. މިރޭ 9:00 ގެ ފަހުން ހުށަހަޅައިފި ނަމަ ރިކޯޑު ސާފު ނުކުރެވިދާނެ ކަމަށް ޑީޖޭއޭއިން ބުނީ މިރޭ 8:17 ގަ އެވެ.
ޑީޖޭއޭއިން ބުނީ އެ އިދާރާއިން ކުށުގެ ރިކޯޑު ސާފު ކުރަނީ ހުރިހާ ކޯޓަކުން ވަކިން ކަމަށާއި އެ މަސައްކަތް ކުރަން ގުޅާލެވިފައިވާ ޑޭޓާބޭސްއެއް ނުހުންނަ ކަމަށެވެ. ދިވެހިރާއްޖޭގައި 194 މެޖިސްޓްރޭޓް ކޯޓު ހުރެ އެވެ.
މިހާތަނަށް ފޯމު ހުށަހެޅުއްވީ އެންމެ ތިން ކެންޑިޑޭޓުންނެވެ. އެއީ ރައީސް އިބްރާހިމް މުހައްމަދު ސޯލިހާއި ދަ ޑިމޮކްރެޓްސްގެ އިލްޔާސް ލަބީބާއި އެމްއެންޕީގެ މުހައްމަދު ނާޒިމެވެ.
ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އަމިއްލަ ގޮތުން ވާދަ ކުރައްވާނެ ކަމަށް ވިދާޅުވާ އެމްއާރްއެމްގެ ފާރިސް މައުމޫނާއި ކުރީގެ ހޯމް މިނިސްޓަރު އުމަރު ނަސީރުގެ ކެންޑިޑެސީ ފޯމު އަދި ހުށަހަޅާފައެއްނުވެ އެވެ.
ޕީއެންސީގެ ކެންޑިޑޭޓް މާލޭގެ މޭޔަރު ޑރ. މުހައްމަދު މުއިއްޒުގެ ކެންޑިޑެސީ ފޯމު މާދަމާ ހުށަހަޅާނެ ކަމަށް ވނީ ބުނެފަ އެވެ.
މި ނޫހަށް އެނގިފައިވާ ގޮތުގައި އިންތިހާބުގައި ވާދަ ކުރަން ބޭނުންވާ ކެންޑިޑޭޓުން ގެންދިޔައީ ކުށުގެ ރިކޯޑު ސާފު ކުރަމުންނެވެ. ވާދަ ކުރަން ނިންމާފައިވާ ކެންޑިޑޭޓަކު މިހާތަނަށް ރިކޯޑު ސާފުނުކޮށް އޮތްކަން އެނގިފައެއް ނެތެވެ.
