ކުރިއަށް އޮތް ރިޔާސީ އިންތިހާބުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީނަށް ވާދަ ކުރެއްވުމުގެ ޝަރުތު ހަމަ ނުވާ ކަމަށް އިލެކްޝަންސް ކޮމިޝަނުން ނިންމި ނިންމުން ބާތިލުކުރަން ސުޕްރީމް ކޯޓަށް ހުށަހެޅުއްވި މައްސަލައިގެ އަޑުއެހުން ނިންމާލައި، ސާފު ކުރަން އިތުރު ކަމެއް ނެތް ނަމަ، ދެން އޮންނާނީ ހުކުމް ކުރުން ކަމަށް ރޭ އުއްތަމަ ފަނޑިޔާރު މުއުތަސިމް އަދުނާނު ކަނޑައެޅުއްވި އެވެ.
އީސީގެ ނިންމުން ބާތިލުކުރަން ސުޕްރީމް ކޯޓަށް ހުށަހެޅުއްވީ ރައީސް ޔާމީން މިހާރު ތަންފީޒު ކުރަމުން ގެންދާ 11 އަހަރުގެ ޖަލު ހުކުމް، ޝަރުއީ ދާއިރާގެ ތިން މަރުހަލާއިން ނިންމާފައި ނުވާތީ އެ މަނިކުފާނަށް އިންތިހާބުގައި ވާދަކުރެއްވުމުގެ ހައްގު ލިބިވަޑައިގަންނަވަންޖެހޭ ކަމަށް ގަބޫލުކުރައްވައިގެންނެވެ.
އެ މައްސަލައިގައި ޔާމީންގެ ވަކީލުންނާއި، ޕީޕީއެމްގެ ފަރާތުންނާއި، އިލެކްޝަންސް ކޮމިޝަން އަދި ބަންޑާރަ ނައިބުގެ ފަރާތްޕުޅުން އިއްޔެގެ އަޑުއެހުމުގައި ވާހަކަ ދެއްކެވި އެވެ.
ހަވީރު 4:00 އިން ފެށިގެން ހަތް ގަޑިއިރަށް ވުރެ ދިގުކޮށް ކުރިއަށް ގެންދިޔަ އަޑުއެހުމުގައި ފަނޑިޔާރުން ވަނީ މައްސަލަ ހުށަހެޅުއްވި ފަރާތަށާއި، ރައްދުވާ ފަރާތަށް ހޫނު ސުވާލުތަކެއް ކުރައްވައިފަ އެވެ.
ގާނޫނީ އަސާސީގެ އެ މާއްދާގައި އެ ބުނާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއް ކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވުމެވެ.
މި މާއްދާގެ ބަހުސް އާއި، ޔާމީނު ދައްކަންޖެހޭ ގޮތަށް ކޮށްފައިވާ ފަސް މިލިއަން ރުފިޔާގެ ޖޫރިމަނާއަކީ ސާބިތު ދަރަންޏެއްތޯ ނޫންތޯގެ ބަހުސް ވެސް އިއްޔެގެ އަޑުއެހުމުގައި ކުރިއަށް ދިޔަ އެވެ.
މި މައްސަލައިގެ ހުކުމް ކުރާނެ ވަގުތެއް ސުޕްރީމް ކޯޓުން ހާމަ ނުކުރެއްވިޔަސް، ހުކުމް ކުރުން ވަރަށް އަވަހަށް ތާވަލް ކުރާނެ ކަމަށް ބެލެވެ އެވެ. އެއީ މިހާރު އިލެކްޝަންސް ކޮމިޝަނުން ކަނޑައަޅާފައިވާ ގޮތުން އިންތިހާބުގައި ވާދަކުރާ ފަރާތްތަކުން ކެންޑިޑެސީ ފޯމް ހުށަހެޅުމުގެ ފަހު ދުވަހަކީ ހޯމަ ދުވަހަށް ވާތީ އެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
ޕީޕީޕީއެމް/ޕީއެންސީގެ ރިޔާސީ ކެންޑިޑޭޓު، 11 އަހަރުގެ ޖަލު ހުކުމެއްގައި ހުންނެވި ކުރީގެ ރައީސް އަބްދުﷲ ޔާމީނަށް އިންތިހާބުގައި ވާދަ ކުރެއްވުމަށް ސުޕްރީމް ކޯޓުން ފުރުސަތު ނުދެއްވައިފި ހާލަތެއްގައި، ޕީޕީއެމްއިން ކެންޑިޑޭޓެއް ނެރޭނެ ކަމަށް އެ ޕާޓީގެ ނައިބު ރައީސް، ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވި އެވެ.
ޕްލޭން ބީ އެ އޮތީ ސުޕްރީމް ކޯޓުގައި ރައީސް ޔާމީންގެ ފަރާތްޕުޅުން އެދިފައި. ރައީސް ވެސް ބޭނުންފުޅު ވަނީ ޕީޕީއެމްގެ ކެންޑިޑޭޓެއް ނެރެން. އެކަމަކު، އެ ޕްރޮސެސް ދާނީ ކޮންމެ ގޮތެއް ވިޔަސް ސުޕްރީމް ކޯޓުގެ ހުކުމާ ގުޅިގެންތާ. ޕްލޭން ސީ މިދިޔައީ އޭގެ ކުރީގައި. ޕްލޭން ސީގަ ވާ ގޮތަކީ ޕީއެންސީގެ ކެންޑިޑޭޓެއް ޕްލޭން ސީގައި މި އޮތީ. އެނގިވަޑައިގަންނަވާނެ ޕީއެންސީއާ ޕީޕީއެމްއާ އެއްކޮށް މި މަސައްކަތް ކުރީ މިހާ ހިސާބަށް އެކަމަކު ކޮންމެ ގޮތެއް ވިޔަސް ޕީއެންސީން ކެންޑިޑޭޓެއް ނެރޭ ހިސާބުން އަޅުގަނޑުމެން ހެދިފައި އޮތް އަންޑަސްޓޭންޑިން އެ ދިޔައީ ޕީޕީއެމްއާ ޕީއެންސީއާ،"
ދުވަހުގެ ފޮޓޯ
ޕީޕީއެމް/ޕީއެންސީގެ ރިޔާސީ ކެންޑިޑޭޓު، ކުރީގެ ރައީސް އަބްދުﷲ ޔާމީނަށް ރިޔާސީ އިންތިހާބުގައި ވާދަ ނުކުރެއްވޭނެ ކަމަށް އީސީން ނިންމި ނިންމުން ބާތިލު ކުރަން ހުށަހެޅި މައްސަލައިގައި ސުޕްރީމް ކޯޓުން އިއްޔެ ބޭއްވި އަޑުއެހުމުގައި ޔާމީން ވާހަކަ ދައްކަވަނީ.
