ކުރިއަށް އޮތް ރިޔާސީ އިންތިހާބުގައި އެމީހެއްގެ ރަށް ނޫން އެހެން ތަނަކަށް އޮންލައިންކޮށް ރެޖިސްޓާ ވުމަށް އިލެެކްޝަންސް ކޮމިޝަން (އީސީ)އިން ހުޅުވާލި ފުރުސަތުގައި 22،882 ފޯމު ހުށަހަޅާފައިވާ ކަމަށް އެ ކޮމިޝަނުން ބުނެފި އެވެ.
އީސީން މިއަދު ބުނީ ރޭ މެންދަމު 12:00 އާ ހަމައަށް ރީރެޖިސްޓުރޭޝަން ކުރުމުގެ މުއްދަތު ހަމަވިއިރު، ހުށަހަޅާފައިވާ ޖުމުލަ ފޯމުތަކުގެ ތެރެއިން ރެޖިސްޓާ ކޮށްފައި ވަނީ 18،088 ފޯމަ ކަމަށެވެ. އަނެއްބައި ބާތިލުކުރީ ފުރިހަމަ ކުރަންޖެހޭ މައުލޫމާތުތައް ފުރިހަމަ ނުވާ ފޯމުތައް ކަމަށް އެކޮމިޝަނުގެ ނަިއބު ރައީސް އިސްމާއިލް ހަބީބް ވިދާޅުވި އެވެ.
"ބާތިލު ކުރި ފޯމުތަކުގެ ތެރޭގައި ހިމެނެނީ ކުރިން ރެޖިސްޓާ ކޮށްފައި އޮތް ތަނަށް ރެޖިސްޓާވުމަށް ހުށަހެޅި ފޯމުތަކާއި ފޯމާއެކު ހުށަހަޅާ ފޮޓޯއާއި އައިޑީ ކާޑުގައި އިންނަ ފޮޓޯއާ ދިމާނުވުން ފަދަ މައްސަލަތައް،" ހަބީބް ވިދާޅުވި އެވެ.
އިލެކްޝަންސް ކޮމިޝަނުން އަންދާޒާ ކޮށްފައި ވަނީ މިފަހަރުގެ ރިޔާސީ އިންތިހާބަށް ރީރެޖިސްޓަރީ ކުރާ މީހުންގެ އަދަދު 100،000 އަށްވުރެ މައްޗަށް ދާނެ ކަމަށެވެ. ނަމަވެސް ކަރުދާހުން ރީރެޖިސްޓާ ކުރުމުގެ ފުރުސަތު އަންނަ ހޮނިހިރު ދުވަހަށް ހަމަވާއިރު އެ އަދަދު އަދި ހުރީ ތިރީސް ހާހުގަ އެވެ.
ރިސޯޓުތަކާއި ރާއްޖެއިން ބޭރުގައި ބަހައްޓާ ވޯޓުފޮށިތަކުގެ އަދަދު ކަނޑައެޅޭނީ ރީ ރެޖިސްޓްރޭޝަންގެ މުއްދަތު ހަމަވުމުންނެވެ. މިހާތަނަށް ރެޖިސްޓަރީ ކޮށްފައިވާ މީހުންގެ އަދަދަށް ބެލުމަށްފަހު ރާއްޖެއިން ބޭރުގެ ހަތަރު ގައުމެއްގައި ވޯޓު ފޮށި ބެހެއްޓުމަށް އިލެކްޝަންސްއިން ވަނީ ނިންމައިފަ އެވެ.
އެހެން ފަހަރުތަކާ ހިލާފަށް ރީ ރެޖިސްޓަރީވާ މީހުންގެ މައުލޫމާތު އިލެކްޝަންސް ކޮމިޝަނުން މިފަހަރު އާންމު ކުރާނެ އެވެ. އެއީ ވީހާވެސް އިންސާފުވެރިކޮށް ދެފުށް ފެންނަ ގޮތަށް އިންތިހާބުގެ ކަންކަން ކުރިއަށް ގެންދިއުމަށް ކަމަށް އެ ކޮމިޝަނުން މީގެ ކުރިން ބުނެފައިވެ އެވެ.
ރިޔާސީ އިންތިހާބުގެ ފުރަތަމަ ބުރުގެ ވޯޓުލުން އޮންނާނީ ސެޕްޓެމްބަރު، 9 ގަ އެވެ. ދެވަނަ ބުރަކަށް ގޮސްފި ނަމަ އިންތިހާބު ބޭއްވުމަށް ކަނޑައަޅާފައި ވަނީ ސެޕްޓެމްބަރު، 30 އެވެ.
މިފަހަރުގެ އިންތިހާބުގައި ވޯޓުލުމުގެ ހައްގު ލިބެނީ 282،395 މީހުންނަށެވެ. މިއަހަރުގެ ރިޔާސީ އިންތިހާބުގައި ހަ ސަތޭކައަށް ވުރެ ގިނަ ވޯޓުފޮށި ބަހައްޓަން ޖެހޭނެކަމަށް އިލެކްޝަންސްއިން ލަފާ ކުރެ އެވެ.
