ރިޔާސީ އިންތިހާބުގައި އަމިއްލަ ގޮތުން ވާދަކުރައްވާނެ ކަމަށް އިއުލާނު ކުރައްވާފައިވާ އުމަރު ނަސީރު، އެ ކަމަށް ޓަކައި ހުށަހަޅަން ޖެހޭ ތާއީދު ސޮއިތައް ހަމަކޮށް މި ފެށޭ ހަފުތާ ކެންޑިޑެސީ ފޯމު ހުށަހަޅާނެ ކަމަށް އޭނާ ވިދާޅުވެއްޖެ އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހޯމް މިނިސްޓަރަކަށް ހުންނެވި އުމަރު މިއަދު ސޯޝަލް މީޑިޔާއަށް ދޫކޮށްލެއްވި އޯޑިއޯއެއްގައި ވިދާޅުވަނީ ތާއީދު ސޮއި ހޯދުމަށް ކުރަމުން ދިޔަ މަސައްކަތުގެ ތެރެއިން މިހާރު 2000 ސޮއި ހަމަކުރެވިފައިވާ ކަމަށެވެ.
ރިޔާސީ އިންތިހާބުގެ ގާނޫނު ބުނާ ގޮތުން ރާއްޖޭގައި ރަޖިސްޓްރީކޮށްފައިވާ ސިޔާސީ ޕާޓީއެއްގެ ޓިކެޓުގައި ވާދަކުރުމުގެ ބަދަލުގައި އަމިއްލަ ގޮތުން އެ އިންތިހާބަށް ވާދަކުރާނަމަ މަދުވެގެން 1،500 މީހުންގެ ސޮއި ހިމެނޭ ތާއީދު ފޯމުތައް އިލެކްޝަންސް ކޮމިޝަން (އީސީ) އަށް ހުށަހަޅަން ޖެހެ އެވެ.
ބޭނުންވާ އަދަދަށް ސޮއިހަމަވެފައި އޮވެ، ކެންޑިޑެސީ ފޯމުގެ މަސައްކަތާ ގުޅޭ ގޮތުން ސުވާލު ކުރުމުން އުމަރު "އަދަދު" ނޫހަށް ވިދާޅުވީ ފޯމުގެ މަސައްކަތްތައް ކުރިއަށްދާ ކަމަށެވެ. ފެށޭ ހަފުތާގެ ތެރޭގައި ފޯމު ހުށަހެޅޭނެ ކަމަށް އުމަރު ގަބޫލުކުރައްވަ އެވެ.
އުމަރު ވިދާޅުވީ މިއީ ވަކި މީހަކު ވެރިކަމުން ވަކިކުރުމަށް ފެށުނު ސިޔާސީ ހަރަކާތެއް ނޫން ކަމަށާއި، ރާއްޖޭގެ ސިޔާސީ މަސައްކަތުގައި ޒަމާންވީ މައްސަލަތައް ހައްލު ކުރުމަށާއި ގައުމު ކުރިއަށްދާ މިސްރާބު ބަދަލު ކުރުމުގެ އުންމީދުގައި ފެށިގެން އުޅޭ ހަރަކާތެއް ކަމަށެވެ.
"މިއީ ހަމައެކަނި ކެމްޕެއިނެއް ނޫން، ވަރަށް ބޮޑު ހަރަކާތަކަށް، މޫވްމަންޓަކަށް މި ކަން މި ވަނީ ބަދަލުވެފައި، އަޅުގަނޑުމެންނަށް ތާއީދުކޮށް ސޮއި ދެއްވި ހުރިހާ ބޭފުޅުންނަށް، އަދި މި މަސައްކަތުގައި އަޅުގަނޑާއެކު ވޮލިންޓިއާވެ އުޅުއްވާ މި އެންމެ ބޭފުޅުންނަށް ޝުކުރިއްޔާ،" ދިހަވަރަކަށް މީހުންނާއެކު މީޓިން ރޫމެއްގައި ތިބި މަންޒަރު ފެންނަ ވީޑިއޯގައި އުމަރު ވިދާޅުވި އެވެ.
ދެހާސްއަށް ވަނަ އަހަރު ބޭއްވި ރިޔާސީ އިންތިހާބުގައި ވެސް އުމަރު ވާދަކުރެއްވި އެވެ. އިސްލާމިކް ޑިމޮކްރެޓިކް ޕާޓީގެ ނަމުގައި އުމަރު އިސްވެ އުފެއްދެވި ޕާޓީގެ ޓިކެޓުގައި ވާދަކުރައްވައިގެން އޭރު ލިބިވަޑައިގަތީ 2,472 ވޯޓެވެ. އެއީ ޖުމުލަ ވޯޓުގެ އެންމެ 1.4 ޕަސެންޓެވެ.
ދެހާސްތޭރަ ވަނަ އަހަރު، ޕީޕީއެމްގެ ރިޔާސީ ޕްރައިމަރީގައި އުމަރު ވާދަކުރެއްވި އެވެ. ޕްރައިމަރީގައި އުމަރަށް 7،000 އެއްހާ ވޯޓު ލިބިވަޑައިގަތް އިރު އެ ޕްރައިމަރީގެ އިތުރުން އެ އަހަރުގެ ރިޔާސީ އިންތިހާބު ވެސް ކާމިޔާބުކުރެއްވި ކުރީގެ ރައީސް އަބްދުﷲ ޔާމީނަށް ޕްރައިމަރީގައި 13،000 އެއްހާ ވޯޓު ލިބިވަޑައިގަތެވެ.
އެ ދެ ނާކާމިޔާބީއަށް ފަހު 2018 ވަނަ އަހަރުގެ ރިޔާސީ އިންތިހާބުގައި ވެސް ވާދަކުރައްވާނެ ކަން އުމަރު އިއުލާން ކުރެއްވި އެވެ. އަދި އަމިއްލަ ގޮތުން ވާދަކުރަން ހުށަހަޅަން ޖެހޭ 1،500 ސޮއި ހަމަކުރި ކަން ވެސް އިއުލާން ކުރުމަށް ފަހު، އެންމެ ފަހު ވަގުތު ނިންމެވީ ވާދަނުކުރުމަށެވެ.
